Ayup 27 - Ala Wone Peenok Peebi Mbanak

¹ Yoge nagagerik, Ayup nen wone ambinom kunik-kunik aret yorage logonet,

² “At naana'le liirogon mbanggeelik eenik menggerak Ala endage paga, At niniki andi lombok eerogo panggerak Omaawi Lombok Menggerak endage paga, Wone ambi yokkira o.

³ An kangga'lek neenik awo wonage neegak, Ala ambebubu nogobak me mambanege kenok,

⁴ Noone paga nen maluk ugun kilirogo wumbege, Namili paga nen pilit wone agan nage,

⁵ Kit nen, Maluk eekendak, yo'nugwi nogo, Ti abet aret yo'nugwi, kinombake, Eerigin lek aret o. Ata, An maluk eerulik, ari neegak kambi nage,

⁶ An aap abe, ari nogo mbo pega'lek porogo wonage, Maluk eekirak, niniki penggenggagak eeka'lek wonage, Eeke logonet kambigin aret o.

^7-10 Togop aret ari neegak, It aap Ala mugurok noorak ineebi mbakwi nogo, Ala nen inenggaawak lek eerogo piige, Kambuurak eyom koonogo pemenggerak nogo, a'me lik yi nage, Eeke kenok, Iniki lunik lek logonet kanggwi nogo lek a? At Omaawi Lombok Menggerak inikilom mbako logonet, Netik-netak yogo logorak op kwe, Aaninggin inoba kwi'nage kenok mban inoone nggwok paga Ala yogwi iinok, Ala nen inoone konenigin mbakop? Lek aret me, It maluk eeka togop logonet kanggwi kwak, It nawim nogo togop aret kanggwi, Iniki abe koonak lek logonet lek ogwe kwak, It ninom ogoorak nogo togop aret ogwe, Eeko logowak o.

¹¹ An nen Ala omaawi paga eeke nogo mamunggirage, At Omaawi Lombok Menggerak koongge nogo kumaarogo pega'lek kineenu eeppinagage, Eerigin o.

¹² At Ala eeke menggerak nogo kit abet aret kogo monggotak kwe, Ambi eeppaniyak lek kagak wone agan nugwi ti, Nonggop nduk agan nugwi o?

¹³ Aap maluk mendek iinok, Ala nen eeppiyoorak koonak nogo inom, Aap iniki worokot iinok, ineyate kwak, Omaawi Lombok Menggerak wogorage nogo inom, Yi aret o.

¹⁴ Inapuri ndaganakwi nogo wooluwak nen nengge, Inapuri wigannogwe nogo mbi abu nen kanggwi, Eeko logonet,

¹⁵ Mbo piyamenggaarak ineenik wonogwe nogo Kugi lengga inoba a'nuk kanggwi iinok, nggween taambiigwi, Inakuwi nanu pugu nen inaleenggu maaka'lek wonogwe,

^16-17 Inawu mbuti perak ti, Liirubu kwak pit laganemenggaarak kwe, Aap maluk eeka'lek mendek nen tumbukkologwe, Inambogoyum yiriko menggaarak nogo, nggween nggabok kabunik negen logonemenggaarak kwe, Aap iniki abe koonak mendek nen yikkologwe, Eerugun o.

¹⁸ Inawi ti, laa'nggi awi wurik kwak wurogo pugwi, Yabu yarak arum logorak inawooliya wukwi kwak wukwi, Eeppatinuk,

¹⁹ Ineenggi warak logonet, nogo yi unggumenggaarak kwe, Ineenggi warak logonet, mi'narugun lek o. Ata, ineenik a'nuk mi'nogo logomenggaarik, ineenggi lek aret kaagun o.

²⁰ Niyo wu'nuk wage logonet aan lebeninake kwak, Inamineeri noorak mendek inoba ari wage, Oonikiya paga o wiya nen iri'ngga wonok nage kwak, It togop aret wogoren nage,

²¹ O wiya oonegen lagi wage menggim nen warit wage logonet, Piyaniren nanuk ineebe lek eerogo piige, Inobaane'me nen kabulogo wumbiige,

²² Wiya omaawi paga ninooke kero, yinuk, mbaganggwi iigak, Inabuwa mbaka'lek yamburogo nappiige,

²³ Ti eeppiinok, meek mbake logonet, eenggi nombok-kombok irage, Oone pu ari logonet, it wonogo menggam nen wumbiinok, inagi'ndok kangge, Eeke menggerak o.