Ayup 26 - Ala Wone Peenok Peebi Mbanak

Ayup nen wone onggo yoreegerak wone

¹ Yoreegerak kwe, at Ayup nen wone onggo laakot negen aap Mbilirat yoge logonet,

² “At omaawi lek meek mendek iniki eyak wappege, Aap eenggi nonggop eekkoloobok mendek yeenggwaage,

³ Iniki warak lek yunduurak nogo kini wuppege, Nonggop eeri? mbake kagak wone kenaarogo yoge, Eekendak me, Nawot, Wa lombok, yokkigi o.

⁴ Kat yagandak nogo ti, ta nen yokkege kagak yoge, Ta nen kinikime manake kagak wone mbangge, Eekendak o?” yinuk, yoge nagagerik, it abok aret yorage logonet,

⁵ “Aakumi kambeegwaarak inogoma kambunuk nogo menggam wonogwe inom, Niyo inikime nggween abu'na wonogwe abok inom, Inaganak nugirenet nage agaarik o.

⁶ It kambunuk nogo menggam wonogwe nogo, At Ala nen abok aret iige menggerak o. Kambeegwaarak wonogo menggam nogo, Tu narak lek paarak aret wonage agaarik o.

⁷ At Ala nen o oolo yi kagak, O omarip paga pa'nggwe nen mbogut mbiganogo nappi wage, O nggween yi, eenggi ya'lek tugunogo pege,

⁸ Andugwi paga niyo lingginogo pegetak kwe, Aaninggin nen ndugwi tubuk ari logonet, Niyo kuwo-kuwo wambit waga'lek wonage,

⁹ Tut kole etenggen nobarogo pege logonet, Andugwi paga lenggenogo pege,

¹⁰ O eya inom, o apit inom, Yi yenggenak laut mbogut imbirak inetenggen ambit kunik me time kuli mogonak logowak nduk eeppege,

¹¹ Mbogut alom yarak nogo, Ala nen mberege kenok, iniki ma'nage logonet nuk-nuk ari,

¹² Niyo yenggenak laut nogo omaawi paga kilaarak-mogonik eerogo pege, Waalo kole niyo inikime menggerak nogo iniki warak lombok nen warogo pege,

¹³ Ambebubu paga mbogut ket yanggo eerogo pege, Waalo kole yi inikime wonage nogo ogole nen mbagangge me, Wooluwak paga polok togon warogo pege,

¹⁴ Ti eeke nagagerak ti, eebe wonage kagak irip mban liippugwi, Yagap wone paga yogwe konenggwi kwak konenggwi, Eeko monggoorak me, Oone nggwok ngguurubu eeke nogo ti, Ta nen liippuurak mbakop? Lek aret o,” yinuk, yoragagerak.