Ayup 24 - Ala Wone Peenok Peebi Mbanak

¹ At Omaawi Lombok Menggerak nogo nen, Ne ndi paga maluk onggo eeppiyoorak, koonogo pege, It at mugurok nogwe nogo nen, It maluk eekwi Ala nen inowak loongge inigen kogwe, Eeka'lek ti, nonggop nduk o?

² It aakumi nogo ti, Nggween ogoorak kagak ya langgok eerogo pugwi, Aakumi inaanggumi kumaappunuk, it unde eekkologwe,

³ Aap moono inaanggumi keledai wonok mbaganggwi, Inamendek kumi nanu wogorogo logonet, Ninamendek obaane'me pegak kinerapi kola woraabagip o, Yinuk, inerapi waganggwi,

⁴ It tu nogo logonet, ineenggi lek mendek pelenogo wumbiigwi, It aakumi meek mendek nogo abok aret kumaarak logowak nduk inagabiti eerogo piigwi, Eeppiigwi iinok,

⁵ It aakumi meek mendek nogo ti, Keledai nggwiya karume mendek kwak, Aakumi inambeebuk mbo pugu kwaarogo nenet nugwi O anggu paga inapuri inake yi mendek ndi mendek kwaarogo wogorogwe,

⁶ Aakumi ineyabume inaanggumi inake pugu nogo, It aret waganogo nunggwi, Aap ineenggi warak inagayo anggur yarak anggen mbo pugu nogo anebenogo nunggwi,

⁷ It inayum lek me, oonikiya paga inagap mbelanak nogo yit nugwi, Inanogoyum lek me, togwi kenok nobakkolaga'lek nugwi,

⁸ Puut nggelok-nggobok paga mayu nggulu aago nugwi, It ineebe op logowok nduk, yugum lunik me nabennari unggwogwe, Eekwi iigak,

⁹ Aap maluk mendek nen elege agalo awo elak kungge me, yabok togon wonok nogwe, Inanomat mbanak onggo ineenggi lek inapuri inobaak yabok togon wogoren nogwe, Eeko menggaarak.

¹⁰ It aakumi meek nogo mendek ti, Inayum lek me, inagap mbelanak nugwi, Inambi abu aganake kagak gandum agabolo mbelanogo pugwi,

¹¹ Niyo abu aret wonogo logonet, Tayitun anggen yugum paga aan lebenit nogwe, Anggur anggen iniyok paga aambiranit nogwe, Eeko logonet,

¹² Kambuwok nduk, iniki oone agan nugwi, Andi-pandi logonet, Obeelom ee'ninabu o, yogwe, Eekwi nogo It kota wonogwe nen konenggo menggaarak kwe, Ala nen, Kit maluk eeppinagagwi nogo, onggo it eeppiyaakit o, yinuk, Yoraga'lek aret wonage agaarik o.

¹³ It aakumi ando nen o eya nogo ineebi mbakwi, O eya paga logonet eeko menggaarak nogo ineenggo'lek wonogwe, Eya paga nugu logorak ineebi mbakwi, Eeko menggaarak wonogwe o.

¹⁴ O eya lek age kagak aap inooka nen mi'na'nuk, Ineenggi lek mendek inom, it meek mendek inom, Inoorogo piinet nugwi, O apit age kagak aap kiraaka kwak kiraarit nugwi,

¹⁵ Aap kumi ugun wurinaka iniki mbako logonet, It ambi nen inigen kwaa'niyokwak, mba'nuk, Purok inetenggen paga yikut eeppatinuk, O kiip aruwak nduk tokkogwe,

¹⁶ O apit age kenok, oome tu paa'nuk, Aakumi inamendek yogoot wonok wunggwi, Eekwi kwe, O liingge kenok kumaarak wonogwe, O eya nineebi o, yinuk, yogwe, Eeko menggaarak.

¹⁷ It aakumi ti abok nen, O apit aago ti, O weege kwak, mba'nuk, inikilom mbakwi, O yumaak lombok paga nirik-kirik yogwe nogo ti, Inoreewi iniki kunik kwak eekwi, Eeko menggaarak o.

¹⁸ It aap maluk eeka ti, Iri'ngga niyo obaga wonok nege menggi kwak wonogwe, Inanggween unde menggam pulinik aret me, Ineyabu anggur yarak pekka naga'lek aret wonogwe, Eeko menggaarak.

¹⁹ Ndugu-ndugu amburu agaatak nogo, O kibi nen, mo andi nen, lek eerogo pege menggi kwak, It aap maluk eeko menggaarak nogo ti, Kambunuk nogo menggam nen ambeme yonggorinake me,

²⁰ It ndaganabeegwaarak inagalomini aret kwe, Ineebe mari eerogo piigwi, Anggolenggen nen inagabolo nili-kili nunggwi, Eyo nduguninuk nage menggi kwak, inendage lek aret ogwe, Eeko menggaarak.

²¹ Kumi inaagalogwe ndaganaka'lek wubili iinok, Inoone yi-wu eerogo piigwi, Kumi nanu inabuwa mbaka'lek mbo piigwi, Eekwi kwe,

²² It aap wakaa'ngget inomaawi ambik nogo, Ala omaawi paga tebenogo piinok nigiren nage, Ineenggi warak ineebe obeelom nu'lek wonogwe kwe, Ndi eyom paga kambuurak ineenggo'lek wonogwe, Eeko agaarik o.

²³ Nit op wonogwe mbakwi nogo, Mbako logowak nduk Ala nen teppiige logonet kwe, It eerit nugwi nogo enegen wogonake menggerak.

²⁴ We yogondak iluk aret inendage warak wonagaatik lek ogwe, Gandum anggen mbanogo pegaatak mbuk age menggi kwak, Inendage warak nogo lek ogwe iinok, it kunduk inagabolo nggween taambiya nogwe, Eeko menggaarak.

²⁵ Ti eerugun yagarak nogo ti, abet aret me, Ta nen pilit yagandak o, yinuk, yo'nugwi, Ta nen, Koone we aret ari o, yinuk, yo'nugwi, Eeriyak mbakop? Lek aret o,” yinuk, yoragagerak.