Ayup 20 - Ala Wone Peenok Peebi Mbanak

Aap Tobat nen Ayup ambinom yoreegerak wone

¹ Yorage mbareegi, aap Naama mendek Topat nen wone onggo Ayup yoge logonet,

² “Kat wone yagandak ti paga, An puk ariyak abu meek ee'nake mbaki, Wone onggo yu o, yinuk, Ninikime nen yo'nege me, yokkiri o.

³ An meek nombake logonet, naruk wakendak nogo konenggirak kwe, Nonggop eerogo yokkiriyak neenu me, yokkiri o.

⁴ O maan aa'nduk nggween paga yime aakumi piyareegerak kuli nen Eerit wundi wogo nogogwaarak nogo, kat keenggo'lek ya?

⁵ Aap maluk eeka iniki ale'nggen mbakwi nogo we luulu aret mbakwi, Ala mugurok noorak ineebi mbaka inale'nggen kogwe nogo, we ne ambiriluk mban kogwe, Eeko menggaarak o.

⁶ Inendage mbogut paga tiyak agan nggwok ari lagangge, Inanobak ndugwi paga ari lagangge, Eeremenggaarak kwe,

⁷ It nogo inaan wurik pogom ineebe mondok-mondok lek arugun kenok, It inigen kogo nogogwaarak nogo nen, Ineebe ngge o? yinuk, yogo logogun o.

⁸ Inabi kagaatak lek age menggi kwak, Ineebe togop aret ineenggi-iniyok lek, lek ogwe, Oonikiya inabinggaanggo kagaatak lek age kwak, It togop aret lek ogwe, Eekwi iinok,

⁹ Inigen iigo nogogwaarak nogo nen ineebe iigwi, It wonogo menggam wonogwe nen inigen ambinom iigwi, Eerugun lek me,

¹⁰ It aap ineenggi lek inamendek kologo nogogwaarak nogo, Inapuri nen obaane'me awi yagiigwi, It paga wiganak nen obaane'me wogorogwe, Eerugun o.

¹¹ It awo tawe inamburu wonage kagak kwe, Ineebe inamburu inom aret liirubu arugun o.

¹² Inomaluk ti, inambe paga ombat abe kogwe, Inamuli abu'me kumaapporogo wonogwe,

¹³ Ninomaluk ti mbo puurak lek ili o, yinuk, inambe me patogo wonogwe, Eekwi ti,

¹⁴ Inambi negen nunggwi iinok, inaanagale paga andi tele eerogo piige, Waalo aap inooka ameyo kwak a'nuk, inaanogum panggo eerogo piige, Eeke menggi kwak eerigin o,

¹⁵ Aakumi inamendek nunggo nagaarak nogo kilirogo wumbugun o. Ala nen it inaanagale me nen kilirogo wumbuwak nduk eeppiyaagin o.

¹⁶ It nen waalo aap inooka ameyo aret wup eerogo nunggwi me, Nggitamuru eyak mbaninaketak kanggo mengga kwak, It togop aret kambugun o.

^17-19 Aap ineenggi lek yale-pale eerogo piinok, Inamendek ndinggologo logonet, ineebe mbo piigwi, O it nen wurulik aakumi inawi wurik mendek ndinggologwe, Eereegwaarak me, Niyo eneeri wundit nage nogo inigen kogwe, Nggiin amburu inom, yilak amburu inom, alik negen wundi wage liippugwi, Eerugun lek aret o. Ata, muguren nogo logonet waganeegwaarak nogo, Ombat wakkaga'lek inamendek unde wogorogwe, Yi mendek ndi mendek kunggo logonet nabenggologogwaarak nogo, It ambi nengga'lek enaani aret wogoren nogwe, Eerugun o.

²⁰ It inikime uugwe mbakwi nogo, mbo pega'lek iniki nenet mban nugwi me, Kuwak eerogo patiyak op kwe, lek aret eerogo pako menggaarak.

²¹ Inaanogum andi lek nenggak mban eekwi paga, Aakumi inamendek lek eerogo nenet nugu logonet, Ineenggi warak eeremenggaarak nogo, Lek aret arigin o.

²² Ineenggi warak nen ineebe obeelom wonogwe kwe, Inagabiti lombok mbarit unggwogwe, Aaninggin mondok iya lombok inoba kwi'nage, Eerigin o.

²³ Inaanogum ake wurakak mban eeppunuk, It inigen keme aago wonogwe me, Mayu lubu-lubu wangge menggi kwak, At Ala anini kani negen inoba kwippiigak, kwippiigak, mban eeke logogin o.

²⁴ Mbuti wooluwak paga inookwi iyo, mbaganit nogwe iigak kwe, Mbuti tembaga paga maale wurik me, Ineebe peenok polok togon inookwi iinok,

²⁵ Endok nogo nggiginogo mbo pugwi iigak, Maale ngget paga inamiya labunik wungge Inigen kenok inagabolo ne agan namenggerak me,

²⁶ Yi mendek ndi mendek kuwak eerogo patemenggaarak nogo lek age, Kani alik nen nengge menggerak mendek nogo nen at eebe aret nengge, Inaaganapuri iname wonogwe nogo ineebe inom abok aret nengge, Eerigin o.

²⁷ Mbogut nen, Kit maluk o, yinuk, yorage, Nggween kunduk mi'nage logomenggerik, Eekotak aret o, yinuk, yorage, Eekwi iinok,

²⁸ Yi wu'nuk wage logonet, yi mendek ndi mendek wonok nage menggi kwak, Ala anini togop aret inoba kwippiige logonet, Inamendek kuwak eerak iname wonage nogo, abok aret lek eerogo pigin o.

²⁹ At Ala nogo nen, It maluk eeka eeppiyoorak inake koonogo piige, Ineyate kwak wogoroorak punogo piige, Eereegerak nogo ti aret o,” yinuk, yoreegerak.