Ayup 15 - Ala Wone Peenok Peebi Mbanak

Elipat nen ambinom yoreegerak wone

¹ Yoge mbareegi, aap o Teman mendek Elipat nogo nen wone onggo Ayup yoge logonet,

² “Aap iniki warak nen Iniki wakkaga'lek we ugun logonet, wone onggo yogwe, Oonegen lagi wage menggim pa'nggwe nen O wiya warit wage menggi kwak, inoone togop aret agan nugwi, Eerit nugu logorak mbaken?

³ Inaana'le mbanggologo logonet, wone we aanom warogo yogwe, Wone alom lek kagak yogwe, Eeko logorak mbaken?

⁴ Koone ari ti paga Kat Ala kagabiti mbake nogo, lek eerogo pake, Abet mba'nuk Ala mugurok nage nogo, non mbanogo pake,

⁵ Komaluk nen kiniki nggagangge kagak koone ari, Inoone amburu ndik-ndik agan nugwi kwak agan nege, Eeke agandik.

⁶ An nen yokkega'lek neegak, Kobaalombok koone paga nen, Kat maluk aret o, yinuk, yokkege, Ndi, koone ari ti nen, Maluk ari o, yinuk, yokkege, Eeke agaarik o.

⁷ Aakumi nda'naga'lek iigak Kat kaa'nduk lombok nda'nagagindak ya? Yi puut ndi puut awo ogobakkigika'lek kagak, Kat kaa'nduk kin agagindak ya?

⁸ Ala wone kote koongge nogo, kat karuk nggoongge, Aap niniki warak an mban aret, mbake, Eeke menggendak ya?

⁹ Nit nineenggo'lek niigak, kat kalik mban keenu age, Nit kin kaga'lek niigak, kat mban kin kage, Eeke menggendak ya?

¹⁰ Kat kogoba ndak-ndak ndarak lek inaa'nduk lombok ndarak aap abu inanggok ineeruwak kenen mbanak nogo, Ninom wonogwe mbake logot o.

¹¹ Ala nen kiniki eyak wappagage, Oone yanggik-yanggok yokkege, Eeke ti, Meek mba'nuk ari agandik?

¹² Kiniki eekkake ti nen wokkeren nage, Kenegen kani kunik negen eeke, Eeke logonet,

¹³ Kat kanini nen Ala mberege, Koone yuurak lek mendek mban wunabit nage, Eeke ti, Nonggop nduk eeke agandik?

¹⁴ Aap kikak naka'lek abu obeelom wonogwe, It kumi nen inaagalogwe nogo, iniki abe koonak aret ndaganakwi, Eeko menggaarak mbaken?

¹⁵ At Ala nogo nen it at ake leenak menggaarak nogo, It yi, abu obeelom aret o, yinuk, yuurak aaninggin wonage, It mbogut paga time wonogwe nogo, kikak naka'lek maluk aret iige, Eeke menggerak kenok,

¹⁶ Aakumi ti, niyo nonggo mengga kwak, maluk eerit nogo logonet, Abu maluk ogole warak eeko menggaarak me, Abunuk maluk aret iige menggerak o.

^17-19 Ala nen inanggween wogoragagim time it aap endekem mendek nen inenggela'me unggwi woraanuk, Iniki nomoninaka'lek iigak, Inombomini nen aap iniki warak yorogo mbareegwa, Kumaappuulik yo'nereegwaarak nogo mbininogo yokkege, Yi wone ndi wone kagarak nogo yokkege, Eerigin me, Yokkege neegak karuk konengge logot o.

²⁰ Aap maluk ti, amineeri ne agan nage kagak kambi nage, Aakumi maluk eeppiiga ti, agabolo ne agan nage kagak, Yi tahun ndi tahun logorak punik nogo lek ari nage,

²¹ Agabiti mbariyak wone nogo mban aruk konenggak eeke, Niniki ugun obeelom wonage, Mbake kagak, It aap maluk eeppiiga nogo nen at oba kwi'nari unggwogwe,

²² O apit kwak aaninggin oba wonage nogo, Lek eerogo patigin lek logogin aret me, Ao, mbake, Wooluwak paga noorugun punik aret mbake, Eeke agaarik o.

²³ Towe ya'ngge-ya'ngge nen nenggaanggum nookwak, yinuk, yagak-ndagak nege, O kiip ari wage menggi kwak, at eeppuurak panggoni wage eenu me tokkage, Eeke agaarik o.

^24-26 At Ala warikit nduk eenggi miippunuk wonage, At Omaawi Lombok Menggerak nogo, nimbirak wakkaakit mbake, Anggeemu ku'mbin tabak lombok mulunggo'nok iniki aagi wuk togon nggare agan Ala owagam panggo yi nage, Eeke kenok, Aaninggin oba kwi'nage, agabolo ne agan nage, Eeke ti, Aap endagembogut wim eeriyak nduk, pipuk eerak wonage kenok, Inagabiti mbako mengga kwak, togop eeppanukwak nagabiti o, yinuk, agabolo ne eerit unggwage menggerak o.

²⁷ Etenggen paga amok kunogo pake, Kirip me amok mban ta'mban-mban eerak wonage, Eeke kwe,

²⁸ Kota-kota mi-mi aagome, ye mbambatinuk wonage, Yi o ndi o langgu-langgu wambeegim aakumi wonogwe lek me, unde eeppatinuk wonage, Eeke menggerak o.

²⁹ At eenggi warak inom, amendek inom, lek aret age, Amindik-amendek o nggween paga ambik aga'lek wonage, Eerigin o.

³⁰ O apit ari wage menggi kwak, Aaninggin at oba kwi'nari wage kenok, At mbaganiyak meek aret kaagin o. Eyo agarip wunggetak nogo Kani nen yagangge menggi kwak, at togop aret age, Ala ambebubu paga lek eerogo pege, Eerigin me,

³¹ Yi mendek ndi mendek aanom warogo mugurok nage nogo Iniki ti paga panggonak wonage kenok, Onggo kolaagin lek ambokan laganggolaagin me, Ti paga iniki panggonak logorak mage o.

³² At nda'nagagim eyom awo ari waga'lek kagak, At eeremenggerak onggo ndak-ndak wogorigin me, Eebe lek aret arigin o. Eyoongga mbuk agaatak ki ageelik kokwak,

³³ Eyo anggur anggen abe yegeelik nggaru-nggaru wangge menggi kwak, Eyo tayitun ambit-mbit warak nogo, mono-mono wangge menggi kwak, Aap ti togop aret wonage o.

³⁴ It aap maluk eeka mendek nen inapuri ndaganaka'lek kagak kanggwi, It aap inawone op mbanuwak nduk wu wogorogwe nogo, inawi wurik kani nengge, Eerigin o.

³⁵ Kumi inabila a'nuk, inaagalogwe ndaganako mengga kwak, It aakumi ti, maluk eeriyak koombunuk maluk aret eekwi, Kumi inaagalogwe logonna'nuk, kole age menggi kwak, Pilit wone mban inikime yagabit eerogo punuk agan nugwi, Eeko menggaarak o,” yinuk, yoreegerak.