Ayup 14 - Ala Wone Peenok Peebi Mbanak

¹ Kumi nen ndaganakaatak aakumi nogo ti, Inomaawi lek ndarak iigak, ineenik kuwagaluk aret me, Aaninggin inoba kagak nugu menggaarak o.

² Iri'ngga anggen ne ambit liingge laambu yege nagaatik, mono-mono wangge, Aakumi inagalu'mak nogo ti, elaambirik wonageelik mbet-mbet lek age, Eeke menggi kwak, It aakumi nogo ti, togop aret ogo menggaarak o.

³ Togop aret iigak kwe, Kat Ala nen kenegen aap togop mendek pegiige, Kenaame piinok inowak looninake, Eeke menggendak o.

⁴ Aap kiik aago ambi nen kikak naka'lek eekkoloorak op mbaken? Lek aret o!

⁵ Aakumi ndarak iigak logorak kuli mbanogo piige, Ndi, ineenik ne ndogop logorak koonogo piige, Eereegindak kagak, It nen ya langgok eerogo patiyak meek o.

⁶ Togop aret me, aap ambi yabu abu eeke kenok Onggo wogogo mengga kwak at logorak koonak nogo, Ale'nggen paga yonggonggola nawak nduk, kenegen aanggot ket o.

⁷ Aap ambi nen, Eyo yi muurogo pege neenok, Agarip wundigin o, mba'nuk, Muurogo pege kenok, agarip aret wungge menggerak o.

⁸ Eyo nogo omanggen nggween me nogome mbuk age, Alom mbanemenggim nogo pili age, Eeke kagak,

⁹ Omanggen nogo nen niyo kwaake nagaatik nengge kenok, Ki a'nuk eraanu agarip wungge menggerak kwe,

¹⁰ Aakumi inomaawi lek a'nuk kanggwi, Iniki worok togon kanggwi, Eekwi iinok perak, Inenggaawak lek aret ogo menggaarak o.

¹¹ Niyo kole yenggenak kwe, aagi lagangge logonet mbuuluk age, Niyo wage nogo mbuuluk age logonet, nage menggim porok ari, Eeke menggi kwak

¹² Aakumi winna'nuk, ti'nuk, mi'nogolik o. Aakumi winnagaatak nogo ineenik ogwe, Nogo yugwi me ineenik eeppiigwi, Eeka'lek iigak, Mbogut nogo lek ari nagin o.

¹³ Kambunuk nogo menggam an kumaappanege, Kanini lek age kagak an nobarogo panege, Eeppaniyak koonogo pege logomenggendik, ti paga ari nage kenok abe'nake, Eeke logorak, Ao, kombake agarik o.

¹⁴ Aakumi kambunuk ineenik ari wogwe mbaken? Togop ee'netak en An eeke logorak koonak nogo yoboni wage kagak, aaninggin eerogo panege nogo, Lek ariyak nduk tokkage me,

¹⁵ Wone onggo yokkirikit nen kat nen an wii'nege, Ogobakkigirogo paneegindak an nogo nabuwa mbake, Eeke logonet,

¹⁶ An nomaluk aberogo yo'nege, Ngge kuli eekirak nogo lingginogo yo'nege, Ee'netak lek o.

¹⁷ Ata, nomaluk yumonggok awina yonggoppunuk, Keenggi amburu penetak o.

¹⁸ Puut langgu-langgu wangge logonet yigirik-noonom nage, Yugum lunik obaane'me nen langgonogo nappege,

¹⁹ Niyo wage logonet, yugum tabonit unggwage, Mayu lubu-lubu wangge logonet, nggween kabe'nuk nage, Eeke menggi kwak, Aakumi iniki lunik wonogwe nogo, kat nen lek eerogo pege menggendak o.

²⁰ At mondok-mondok tebenogo punuk, nawak nduk eeppege, At etenggen alik eerogo punuk nappege, Eeke menggendak me,

²¹ At apuri inendage tiyak yogwe kwe, at eenggo'lek wonage, Inendage meek eerogo piigwi kwe, at nen liippiiga'lek wonage, Eeke logonet,

²² Agabolo andi-pandi nogo mban kage, At alik mban iniki wakko'net unggwage, Eeke menggerak o,” yinuk, yoreegerak.