Ayup 11 - Ala Wone Peenok Peebi Mbanak

Aap Topat nen wone onggo Ayup yoreegerak wone

¹ Ti'nuk, aap Naama mendek Topat nen Ayup yoge logonet,

² “Wone ambik yogwe yi, onggo yoroorak lek mbaken? Ndi, aap wonengga yi nen ari kenok, abet aret yagandak, yoriyak mbaken?

³ Kat wone ugun-ugun agan nage paga Aakumi inoone lek eerogo piyaamunggun mbaken? Aap miyuk-meya eerogo piinet nage keenok, It ambi nen kat kenggali wappagarak lek mbaken?

⁴ Kat nen ari logonet, An wone ari minggirak ti, Abet aret o, yinuk ari, Ndi, Ala nen niniki kikak naka'lek neege menggerak o, yinuk, ari, Ari menggendak kwe,

^5-6 Iniki warak nen wone yogwe ti, Irip-unggut malik-malok eerogo pogo menggaarak me, At Ala alik nen wone yokkege, At oone paga lombok kenggali wappagage, Eeke logonet, Iniki warak nen wone kote kumaapporogo wonage nogo, Kin paga yokkiraawak lak, Ao, mbake agarik o. Maluk eeke nagandak onggo apit aret koba pagulik Ando Ala nen mari eerogo pegerak mbake logot o.

⁷ At Ala nen koonggetak aakumi kobak aganake nogo, Kat aret alom kwaarit unggwage, Ndi, at Omaawi Lombok Menggerak nogo, Omaawi ndi kuli menggerak o, yinuk, irip liippit unggwage, Eeriyak op mbaken?

⁸ Ala iniki warak nen koongge menggerak nogo ti, Mondok iya mbogut irimbaga lombok kwak me, Nonggoti eerogo liippege, Ogu aap kambunuk nogo menggam wonogwe abu'na kwak me, Nonggop togon keenu age, Eerumunggun o.

⁹ O nggween alom nen irip kuli, Niyo yenggenak laut ambin wiganak kuli, Ti kokwak, yi wone ndi wone at abok eenu aret o.

¹⁰ At wage logomenggerik, Aap keele maarogo mambiigo menggam mambege, Inowak loonggo menggam owak loonogo awone mbangge, Eeke kenok, Ta nen mage yoriyak mbakop?

¹¹ Aap inikime nggwi-nggwi logonet, Ambe paga mban agan nage nogo ti, Ala nen liippege, Aap maluk eeka nogo at enegen wagangge, Eeke menggerak nogo lek a?

¹² Eeke menggerak aret kwe, Keledai nggwiya enegen mbolok kwi nen Aagaluk waanggoluk ndakeelik kokwak Aap wi nogo nen iniki warak ariyak meek aret menggerak o.

¹³ Togop aret kwe, Kat yi, kiniki pipuk eekkolage, Ala o, yinuk, tamban eeke logonet, keenggi nippege,

¹⁴ Komaluk kinikime porogo wonage nogo mbo pege, It kame kinom wonogwe nogo maluk eekwi iyo, Mage, yorage, Eeke keenok perak,

¹⁵ Kenggali nen kuut wutik wonage nogo, kengga pirak-parak nege, Kat kagabiti mbaka'lek kiniki nu'lek eeppatinuk wonage,

¹⁶ Aaninggin-paaninggin koba wonage ti, abet aret kobak age, Niyo wuketak wone mbiningge menggendak kwak aberogo mbiningge, Eerumunggun o.

¹⁷ O liingge eya nggwok eeke ti, mbuuluk. Ndi, kiniki eya eerogo pagage ti, nggwok aret o. O apit aago wonage ti, o kubondendok eya kwak eerogo pagage,

¹⁸ Kiniki mondok lunik ambi wonage me, Kiniki ugun tayenak eerogo pagage, At Ala karum wonage me, Kiniki ugun yonggonggolaanok nduk, eeppagage,

¹⁹ Kat nogo yege me, It ambi nen piyakkakwi lek ugun logonok nduk eeppagage, Eeke kenok, Aakumi ambik inale'nggen nen keyage wokkako logogun o.

²⁰ Togop aret kwe, It aap maluk mendek nogo aaninggin inoba age kenok perak, Inigen ogut aremenggaarak kwak logonet, Nggeeme mbaganubok, aganake kenok, Niniki worok togon kambuwok lak, Ao, yinuk, Iniki lunik ti mban aret agaarik o,” yinuk, yoreegerak.