Ayup 1 - Ala Wone Peenok Peebi Mbanak

AYUP WONE

¹ Aap ambi endage Ayup o Ut wonagagerak. Aap ti, iniki abu koonak me, aakumi inoone at oba pega'lek aret wonagagerak. At Ala ayuk wuke, maluk kenok, “Neebi o,” yinuk, mbo pege, eeke nagagerak.

² At apuri wologwe ti, 7 ndaganake, ndi, komologwe ti, 3 ndaganake, eereegerak.

³ Ndi, at aanggumi kambin-ndomba tujuh ribu. Unta ti, tiga ribu. Tapi mbere'mbo lingginik lima ratus. Keledai kooli lima ratus. Ndi, ayeloman mini ti, ambik lombok aret wonogogwaarak. It aakumi oonegen wundi wage menggim pa'nggwe wonogwe ti, inenggela'me aap nggwok eenggi warak lombok at alik aret wonagagerak.

⁴ Apuri wologwe nogo nen ne ambi paga at ambi ame inale'nggen nen laago lakwi, ne ambi paga at ambi ame inale'nggen laago lakwi, eerit nogo logonet, iniriwi kumi kenagan nogo inom aret noorak nduk, inayonggo piigaatak wogwe iinok, inom aret mbi inom, niyo inom, nonggo nogogwaarak.

⁵ Laago larit noorak mbakaatak nogo abu aret age yubunggwi iinok, Ayup nen iniki mbake logonet, “Napuri nen Ala meek eerogo pogo logonet, maluk eekaarak kero,” yinuk, ko'lu kuubondendok eenik a'nuk, apuri nogo wiiraanuk, wogwe iinok, inoba mbeenogo piyaakit nduk, ineengge ndak-ndak Ala ake warogo kani kungge nagagerak. At Ayup nen togop mban aret eeke nagagerak.

⁶ Ne ambi paga Ala inom menggaarak at Aliku ALA owagam kuwak eeri wogwe me, at Tile wage nagagerik, it inenggela'me wonagagerak.

⁷ Wonage mbareegi, Aliku ALA nen Tile nogo yoge logonet, “Kat ngga nen wagan o?” Yoge mbareegi, at Tile nen onggo Aliku ALA yoge logonet, “Lek o. An o nggween paga wanggerit nigi-nigi wagi o.”

⁸ Yoge mbareegi, Aliku ALA nen Tile yoge logonet, “An nayeloman Ayup aakumi o nggween paga wonogwe ndak-ndak lek at iniki abu koonak kenok, aakumi inoone at oba pega'lek wonogwe iigak, an Ala nayuk wuke, ndi, Maluk neebi o, yinuk, mbo pege, eeke menggerak nogo liippege agandik ilik, lek a?”

⁹ Yoge mbareegi, Tile nen wone onggo Aliku ALA yoge logonet, “Aap Ayup ti, we aret kayuk wuke menggerak mbake agandik ya?

¹⁰ Kat nen at inom, aaganapuri inom, amindik-amendek abok aret inom, mangga wagak yengget-wangget yagat wurogo piigendak nogo lek a? Wurogo piige nagandik, at eerit nage nogo abe mban arit nage logowak nduk, kale'nggen oba pege menggendak paga at wonage menggim aanggumi kambin-ndomba ambik lombok wigak yegerak nogo o.

¹¹ Togop aret me, at amendek abok aret keenggime woppunuk, lek eerogo pege keenok perak, pulunogo pagagin mbake logot o.”

¹² Yoge mbareegi, Aliku ALA nen Tile yoge logonet, “Ti kenok, amindik-amendek abok aret keenggime pagagi o. Ndi, at eebe perak, keenggi mbaanggoorak mondok mage o.” Yoge mbareegi, Tile nogo at Aliku ALA owagam nen wundi nagagerak.

Ayup apuri inom, amendek inom, lek eerogo piyareegerak wone

¹³ Ne ambi paga Ayup apuri wologwe inom, komologwe inom, inoweeluk manggu ame inale'nggen nen mbi inom, anggur amburu inom, nunggwi iigak,

¹⁴ aap ambi wone wonok Ayup yori wage logonet, “Lembu yabu eekwi, keledai kooli koorok time iri'ngga mbanogo nenet nugwi, eekwi wonogwe me,

¹⁵ aakumi o Tiyeba mendek nen wogo nagaarik, kayeloman mini kaanggumi inarum wonogwe nogo inoba kwi'na'nuk, wooluwak paga inoorogo piinok, lembu-keledai nogo ko'nok ndi yogwe iigak, nalik mban mbagangge nagarik, wone wonok yokkiri wagi o.”

¹⁶ Yinuk, wone nogo awo yoge me, aap alik ambi wage nagagerik, yoge logonet, “Ndomba inom, aap arum wonogwe inom, Ala nen o yabok pindanogo nappi wage menggerak nogo mbogut paga nen wunuk agan wambi wage logonet, yaganinake kagak, nalik mban mbagangge nagarik, wone wonok yokkiri wagi o.”

¹⁷ Yinuk, wone awo yoge wonage me, aap alik ambi wage nagagerik, yoge logonet, “Aap Katirim mendek ineebe kenagan aago inoba kwi'nari unggwogo logonet, aap kaanggumi arum wonogwe nogo inoorogo piinok, kaanggumi unta nogo ko'nok ndi yogwe iigak, nalik mban mbagangge nagarik, wone wonok yokkiri wagi o.”

¹⁸ Yinuk, wone nogo awo yoge wonage me, aap alik ambi wage nagagerik, yoge logonet, “Kapuri wologwe inom, komologwe inom, inale'nggen nen laago lappunuk, mbi inom, anggur amburu inom, inoweeluk manggu ame awo nunggwi wonogwe me,

¹⁹ yini-panip o karume pa'nggwe nen wiya oone pu warit o eyak 4 wurabak nogo punggage logonet, o ti langguk togon kapuri inookerak kanggwi iigak, nalik mban mbagangge nagarik, wone wonok yokkiri wagi o.” Yinuk, yori wagak mban eereegwaarak.

²⁰ Eeko mbareegwa, aap Ayup nogo mi'nage nagagerik, ayum nibinogo pake, eeruwak anobak me puluk ko eerogo mbanggolage, eeke nagagerik, nggween paga enete wanduk ngginna'nuk Aliku ALA alut eereegerak.

²¹ Alut eeke logonet, “Nagalo inikime nen we nagap mbelanak nda'nagagirak me, Kambunuk, we nagap mbelanak aret nagin o. Kaliku ALA nen wo'nege, Kaliku ALA nen mban wogonake, Eekendak me, Kaliku ALA kendage mban tiyappege logokit o,” yinuk, yoreegerak.

²² Ti abok aret oba age kagak, at Ayup nen, “Ala nen aret maluk eeppanegerak o,” yinuk, mberege, maluk ambi eeke, eerulik aret o.