Amot 9 - Ala Wone Peenok Peebi Mbanak

Warogo wogogo menggam Ala mi'ndak wonage kagagerak wone

¹ At Ala ti, warogo wogogo menggam koorok taati mi'ndak wonage nabi paga kage neegak, at nen ari logonet, “Tunggambe aago abok aret nuk-nuk agan nawak nduk, an nawi wurik yugum owak mippugu irip me yawi mondok tela eerogo wake, Yugum owak mippugu paga o wurik panggonak wonage nogo langgunogo aakumi inanobak paga kwippi wangge, Eeru o. Eeke keenok, ando piyamenggendak ti, an nen wooluwak paga inooriminggirak me, It ambi nen kole mbaganggwi, It ambi nen inagap ndakko'nok mbaganggwi, Eerugun mondok lek aret o.

² It kole aakumi kambunuk nogo menggam nggween ogu kabunit wambi nanuk wonogwe iigak kwe, time nen aret an neenggi omaawi paga yabonogo nippiya wage, It kole mbogut paga lagi namenggaarak kwe, time nen aret yabonogo nggween paga wuppiya wage,

³ It nen kole puut Karemen paga kumaa'nari namenggaarak kwe, an kwaaganabit nage logomenggirik, piginabunuk, time nen wogoren wage, An wonage me nen kole niyo nggwok laut inikime ogu lombok kumaa'nari wambemenggaarak kwe, waalo nggwok nogo nen eyak mbaninabuwak nduk, yoge,

⁴ It inawim nen kugun wogoren mbo piya nogwe iinok, Kinawooluwak paga inoorogo piyaanip o, yinuk, yorage, Eerigin o. An nenegen wogoren nege logogin nogo ti, obeelom eerogo piyaakit nduk lek o. Ata, maluk eerogo piyaakit nduk, nenegen wogoren nege logogin o,” yinuk, ari kagagirak o.

⁵ At Omaawi Lombok Menggerak Aliku ninogoba Ala nen o nggween yi, mbaanggage kenok, nuk-nuk eeke, It aakumi o nggween paga menggaarak abok aret nen le yogwe, Niyo Nin wuke, ti'nuk, niyo Metit poro agan wangge, eeke menggi kwak, o nggween abok aret yi, togop aret eeke,

⁶ At o mbogut oolo ya'i awi wurogo pege, At awi wurik eyak o nggween paga yime yinogo pi wambi wage, Niyo nggwok yenggenak laut nogo wiiremenggerak owagam wage kenok, o nggween paga yime kilirogo pit nage, Eeke menggerak endage ti, Aliku ALA aret o.

Ala nen leenogo piyareegerak nogo mbo piyareegerak wone

⁷ “It Iterali mendek ti, an nggwok lombok liippiige, ndi, it Kuti mendek ti, mbuuluk negen liippiige, eeke minggirak mbakop? It Iterali mendek o Metit nen wogoren wundi wagagirak nogo kwak, it aakumi Pilitin mendek o Kereta nen wogoren wage, It Tiriya mendek o Kit nen wogoren piya wage, Eerulik mbakop? Eereegirak aret o,” yinuk, Aliku ALA nen aret yegerak o.

⁸ “Aakumi inowe endagembogut abu'me menggam maluk mban eekwi yi, Naliku Nitok Minggirak an ALA nen abet aret nenegen wogonake minggirak o. It togop eekwi paga o nggween paga yime nen inenggaawak lek eerogo piyaagin kwe, It Yakup paga wiganak perak, mondok lek eerogo piyaagin lek o,” yinuk, Aliku ALA nen aret yegerak o.

⁹ “Nggweengguma ameneno wonok nawak nduk, muun yarak piyak-piyak eeko logonet, ambit iluk ambi kiluk togon wanggeelik kwak, It Iterali mendek aakumi inanebunu lombok inenggela'me togop aret wogoren nawak nduk, yoraminggirak kwe, Ambit iluk ambi pibi'na wambugun lek aret o.

¹⁰ It aakumi maluk eeko menggaarak an napuri inenggela'me logonet, Aaninggin mendek ambi nit ninoba age, Maluk mendek ambi nit ninoba kwi'nage, eerigin lek o, Yinuk, yogo menggaarak nogo, wooluwak paga inoorak wambugun o,” yinuk, yegerak o.

Iterali aa'nduk wonogogwa kwak eerogo piyoorak wone

^11-12 “It Iterali nen aakumi o Erom eegu yumbunik wonogwe nogo inabu'me piigwi, It yi aakumi ndi aakumi, Nogoba Ala aret o, yinuk, yogo logomenggaarak nogo, inabu'me piigwi, Eeruwak nduk, Ne ti eyom paga Ndawut awooliya wurik langgunnagagerak nogo obaane'me wuke, Yugum pak wurik langgunogo pereegwaarak nogo, obaane'me wuke logonet, aa'nduk wurik wonagagi kwak eerogo pege, Eerigin,” yegerak o. Eerigin yegerak yi, Aliku ALA nen aret yegerak me, yokkiragi o.

¹³ Aliku ALA nen ari logonet, “Aap ambi gandum anggen mbangge me, it aap yabu eeka nen peleppegak yabu eeri nogwe, Ndi, ambi anggur awi yake me, aap anggur anggen aambirangga nen peleppegak amburu aambiranit nogwe, Eeriyak eyom panggoni wage agaarik o. Puut-puut paga anggur yarak amburu tene-tene wangge, Puut-puut teberogon paga niyo nage menggi kwak, anggur amburu taganinuk nage, Eeke logogin me,

¹⁴ An napuri Iterali kugun wogoren mbo piya namenggaarak nogo, iniyokan wogoren piya wage neenok, Inawi kota-kota langgu-langgu aago nogo, obaane'me wurogo patinuk wonogwe, Ineyabume anggur yaremenggaarak paga amburu toologo nunggwi, Eyo anggen yege menggerak mendek yabume yaremenggaarak paga anggen abe mban mbanogo nunggwi, Eeko logogun o.

¹⁵ It Iterali ti, awi yako mengga kwak, inanggween lombok paga inakom kwippiyaminggirak me, Inanggween wogoragagim time nen it aakumi ambi nen nggiginogo wumbiyaagun mondok lek aret o, yinuk, at Aliku kinogoba Ala nen wone yi abok aret yegerak me, yokkiragi o,” yinuk, yoragagirak.