Amot 8 - Ala Wone Peenok Peebi Mbanak

Muun yarak me anggen mbanak yonggolak kagagerak wone

¹ Aliku Itok Menggerak ALA nen nabinggaanggo paga titi'nereegerak nogo ti, muun yarak me anggen kole agaarak mbanak yonggolak nogo aret o.

² Titi'nege logonet, “Amot wae. Kat nano mendek kenegen kagan o?” Yo'nege mbareegi, “Muun yarak me, anggen kole agaarak mbanak yonggolak kagi o.” Yoge mbareegi, Aliku ALA nen an yo'nege logonet, “It an napuri Iterali eeppiyoorak eyom nogo muk panggoni wagaarak me, an nen ambinom inili eerogo teppiyaagin lek eeppiyaagin aret o,” yinuk, yo'nege kagagirak.

³ “Ne ti eyom paga o nggwok abe wurik me ndawi wako logomenggaarak nogo obaane'me leendawi piyanggwi, ineebe inoorak ambik aret mbo nappiinet namenggaarak iigwi, eeko logonet, inoone lek inigen keme yogwe puk aret logogun o,” yinuk, Aliku Itok Menggerak ALA nen aret yegerak me, yokkiragi o.

Iterali aaninggin inoba kwippiyoorak wone

⁴ It aakumi tebenak ambi eekkoloorak meek nogo mendek wi-wi aganakwi, It aakumi ineenggi lek o yime wonogwe nogo lek eerogo piigwi, Eekwi kit yi, Wone yi, kinaruk konenggo logonip o.

⁵ Kit nen, “Gandum ambinom kunggo logowok nduk, tut ngget penengge kenok, eeko logorak koonak nogo mandom wobok yi nage, Ndi, gandum yigirik ambinom kunggo logowok nduk, nogo 6 yippunuk, ko'lu paga yonggonggologo logonet, eeko logorak koonak nogo mandenom yobok yi nage, Eeruwak lak, ao,” Yinuk, yogwe kiigi o. Kit nen aakumi wi-wi aganako logonet, yi mendek ndi mendek wakkagak paga wakkaanuk, Aaninggin tiyarogon kagak, teberogon eerogo wogorogwe, Wu teberogon puurak kagak, wu tiyarogon puwak nduk, yorogwe, Eeko logonet,

⁶ It aap tebenak mendek inanomat mbanak inoba wonage nogo lek aruwak nduk, ineebe mbuti perak paga onggo kuninakwi, It aakumi ineenggi lek mendek inanomat mbanak inoba wonage nogo lek aruwak nduk, ineebe yum nibinik paga onggo kuninakwi, Ndi, gandum ameneno mbo pega'lek inom kagak, togolowak paga wakkagak onggo kologwe, Eeko monggotak o.

⁷ At Aliku ALA nen ari logonet, “It Iterali maluk eeko nogogwaarak nogo, an nami arigin mondok lek o, yinuk, it Yakup mendek nen inogoba tiyappanega nendage kumbatinuk yagi o.

⁸ It eeppiigwi paga o nggween paga yime wonogwe abok aret inaganak wake, Yi o ndi o wonogwe abok aret inayum maluk nibinik mendek yippunuk, iniki wakkologwe, Eerugun nogo lek a? Niyo Nin wu'nuk nage logonet, lagi nage, Ti'nuk, yi alelo tiyak-tebek eeppunuk, poro agan wura nage, Eeke menggi kwak, O yi togop aret eerigin o,” yinuk, yegerak o.

Oonegen abinak lek arigin yereegerak wone

⁹ “Ne ti paga ariyak nogo ti, o liingge kagak oonegen kilu yi nage, O liingge wonage kagak, o nggween paga apit age, Eeruwak nduk, eeppigin o.

¹⁰ Inale'nggen nen laago lako logomenggaarak nogo obaane'me inayum maluk nibinik mendek yippunuk, iniki wakkologwe, Ndawi piyanggo logomenggaarak nogo obaane'me leenggu maakwi, Inayum nibinik maluk yippunuk nugwi, Ineeruwak inanobak puluk ko eerogo pakwi, Aap ambi aput ambolom kangge kenok, leenggu maake kwak maakwi, Eeko logowak nduk, Eerogo piyaagin o. Ti eeriminggirak paga ne ti eyom ariyak age yubuni nage kagak, iniki abu alik negen wakko'net unggwogo logogun,” yinuk, at Aliku Itok Menggerak Ala nen yegerak o.

Mbi-niyo abu eeginaburak yoreegerak wone

¹¹ “Ne ti eyom ari wage paga An nen o yime mbi noogelo mondok alik negen nappi woraagin nogo ti, Mbi-niyo abu eeginaburak ti mendek nappi woraagin lek o. Ata, Naliku ALA noone lombok inaruk konenggo logorak ti, mbi-niyo abu negen eeginabigin o.

¹² Aliku ALA oone konenuwok lak, ao, yinuk, niyo nggwok laut aru-ogwe yenggenak paga kwaarit nogwe, Niyo ambut pa'nggwe nen niyo eneeri pa'nggwe nogwe, Eerugun kwe, Ambit iluk ambi kwaakkaagun mondok lek aret o.

¹³ Ne ti eyom paga Wologwe-komologwe ineebe yaambu-laambu abe tawe nogo an noone abu nen inambuluk pit nagun o.

¹⁴ Inagugi inenggali aga Tamariya mendek endage kumbunuk yogwe, It Ndan mendek inagugi eenik menggerak yi wae, yogwe, It Mberetiyeba mendek inagugi eenik menggerak yi wae, yinuk, yogwe, Eeko logomenggaarak nogo It kunduk an noone abu nen kwaarit nogo logonet, koya-koya nggween paga ngginnarit namenggaarak me, Pilak togon mi'narugun lek aret o,” yinuk, Aliku Itok Menggerak ALA nen aret yegerak me, yokkiragi o.