Amot 5 - Ala Wone Peenok Peebi Mbanak

It Iterali eekwi paga inale yereegerak wone

¹ Kit Iterali mendek yi, wae. Kit eeppinagarak ndawi paga kinale ndawi an ari yi, kinaruk liirogon konenggo logonip o.

² Kolaga aap kigin waka'lek maluk eeppogo mengga kwak it Iterali ti, Nggween paga ngginnogowaarak me, peebi mi'narugun lek aret o. It inanggween paga lombok ngginnogo mbareegwa, mbo piyareegwaarak me, Aap ambi nen it mippiyoorak lek aret o.

³ Aliku Itok Menggerak ALA nen ari logonet, “It aap Iterali mendek wim eeka inawi kota ambime nen wim eeruwok nduk ineebe seribu aret wundi nagun kwe, Iname iniyokan woraagun nogo ti, ineebe we 100 mban aret wogwe, Ndi, o kota alik ambime nen wim eeruwok nduk ineebe 100 wundi nagun kwe, Iname iniyokan woraagun nogo ti, ineebe we 10 mban aret wogwe, Eerugun o,” yinuk, yegerak o.

Ineenik logorak mugurok noorak yoragagerak wone

⁴ At Aliku ALA nen kit Iterali paga wiganak mendek yokkiroorak yo'negerak nogo yi aret. “It an mu'neren wogwe iinok, ineenik aret logogun o.

⁵ It Nggilagan wonogwe nogo abet aret kugun wogoren mbo piya nogwe, O Mbeten nogo pup eerogo pugwi, Eerugun me, O Mbeten nawi o, yinuk, nogwe, O Nggilagan nogwe, Niyo mbaninuk o Mberetiyeba wunda nogwe, Eerugwaarik,” yegerak o.

⁶ Togop me, at Aliku ALA mugurok wogwe kiinok, kineenik aret logomunggup o. Ndi, lek kenok, kani nen yi mendek ndi mendek lek eerogo nengge menggi kwak, Kit kinanebunu Yutup paga wiganak mendek togop aret lek eerogo pinagage, O Mbeten kani nenet nage me, aakumi nen nogonogo puurak lek kwak, eerogo pinagage, Eerigin o.

Obeelom eekwi nogo maluk eerogo pugwi iinok, yoragagerak wone

⁷ Eekaatak a'me nggelok eeppiigwi nogo abut laganogo ale-pale eerogo piigwi, Obeelom eeppiinet nugwi wone nogo tek eerogo mbo pugwi, Eekwi kit yi, ao!

⁸ Laaluguragan o mbogut paga ninggirik kuwak aago Kartika inom, Belantik inom, wakkagagerak nogo nen o apit aago wonage nogo obaane'me o weeruwak nduk, eerogo pege, O liingge wonage nogo obaane'me oonikiya eerogo pege, Niyo nggwok yenggenak laut nogo, wiiremenggerak wundi wage kenok, nggween paga kilirogo wunabit nage, Eeke menggerak endage ti, Aliku ALA aret o.

⁹ At nen it aap inomaawi lombok menggam nogo ne ambit liingge lek eerogo pit nage, Inawi yugum pak wurik nogo langgunogo pit nage, Eeke menggerak o.

¹⁰ It aap tu unggwogo menggam logonet, inowak loonggwi nogo kineebi inombakwi, Inowak loonggo logonet, liirogon mban inowak loonggwi nogo meek inombakwi,

¹¹ It aap ambi eekkoloorak meek mendek nogo wi-wi aganako logonet, inambi gandum anggen mbanak nogo ndinogo waganggwi, Eeko monggotak o. Togop me, kinawi nggwok yugum abe amuni mbanak paga wurumonggotak kwe, o time ye mbanggola unggwogwe, Anggur awi yarumonggotak abe mili kwit agan laganemenggerak kwe, amburu toologo nunggwi, Eeko logomunggup lek o.

¹² Kit maluk ambik eerit nugwi, Ndi, kinomaluk iya negen eeriyak koonggwi, Eekwi an neenu me nduk, yokkiragi o. It aap iniki abe koonak nogo piyak-payak eerogo piigwi, Maluk eerak onggo, Ndogop puurak o, yugu kagak, Puurak lek, yoraawak nduk, inawu wogorogwe iinok, waganggwi, It aap tebenak mendek nogo inowak loonggo logonet, inawone abe mbangga'lek yaga-taga eerogo piigwi, Eeko monggotak me,

¹³ It aap iniki warak nogo nen, “Inowak loonggwi eyom ti, maluk ariyak eyom aret me,” yinuk, Inoone ambi yaga'lek puk aret menggaarak o.

Kambuurak inom, ineenik logorak inom, yoragagerak wone

¹⁴ Kit kineenik logomunggup nduk, maluk eeriyak mbakwi nogo mbo punuk, Obeelom eeriyak mendek mban mugurok nogo logonip o. Ti eekwi kiinok, “Aliku ALA ninom wonage o,” yinuk, yogo monggotak ndak-ndak At Omaawi Lombok Menggerak Aliku Ala kinom aret logogin o.

¹⁵ At Omaawi Lombok Menggerak Aliku Ala nen kit Yutup mendek eegu yumbunik wonogwe nogo, kinabuwa mbake kagak eerukwak, Maluk eeriyak kineebi mbakwi, Obeelom eeriyak kiniki kunik eekwi, Ndi, inowak loonggo menggam aakumi inowak loonggo logonet, eekaatak ndak-ndak eeppiigwi, Eeko logonip o.

¹⁶ At Omaawi Lombok Menggerak nogoba Aliku Ala nen yegerak nogo yi aret. “It aakumi inawi kota-kota wonogwe nogo leenggu maarit nogwe. It aap tu paga tu paga wonogwe nogo nen le agan nogwe, Le yi woraanip o, yinuk, it aap yabu eeka wiirogwe, Ndi, it leendawi tiyangga nen leendawi tiyani woraawak nduk, inayonggo piigwi, Eerugun o.

¹⁷ An nen inenggela'me ambi eeppiigak nagin me, Anggur yarak me time abok aret leenggu maarit nogo logogun o,” yinuk, Aliku ALA nen aret yegerak o.

Aliku Ala woroorak eyom yoragagerak wone

¹⁸ Aliku ALA woroorak ne nogo, “Ari woraawak lak, ao,” yinuk, yogwe nogo, kinabuwa o! Ne ti eyom ti, o eya arigin lek o apit aret ariyak me, Aliku ALA woroorak ne nogo, “Ari woraawak lak, ao,” yinuk, nonggop nduk yogo ogotik?

¹⁹ Aap ambi singa nen mugurok nage kenok, kole mbagangge me, beruang imbirak aabuk age menggi kwak, Aap ambi ame unggwi nanuk, eenggi kobat nabenak paga, “Piga,” yinuk, eeke me, waalo nen eenggi nogo eyak mbangge menggi kwak, Aliku ALA woroorak ne ti, togop aret o.

²⁰ At Aliku ALA woroorak ne nogo ti, o eya arigin lek o apit age, O eya mbuuluk ambi wonage lek, o angget apit aago wonage, Eerigin nogo lek a?

Ala alut eeko logonet eekwi nogo eebi mbareegerak wone

²¹ “Nalut eeko logonet, inale'nggen nen laago lakwi ti, abu neebi lombok mbake, ogole warak lombok mbake, Eeke minggirak o. Nalut eeruwok nduk, kuwak eekwi ti kunduk, nale'nggen mbake mondok lek aret!

²² It nen an nake warogo kani kunggwi, anggen yigirik nake pi wogwe, eekwi ti, an wagangge, Ninom lambunuwok o, yinuk, inaanggumi abe amok warak kenok warogo wo'nugwi ti kunduk, an nenegen pekkage, Eerigin lek o.

²³ It ndawi piyanggwi ti, Nda nen yogwe a nayok, mbake, It nggitat oone eekwi ti, naruk koneniyak neebi mbake, Eeke agarik o.

²⁴ Niyo wu'nuk wage menggi kwak, eekaatak onggo a'me nggelok eeppiinet nugwi, Niyo porok ariilik, nage mban menggi kwak, aakumi obeelom eeppiinet nugwi, Eeko logowak o.

²⁵ It Iterali mendek ti, o karume wogoren wage logonet, tahun 40 eeke kagak, nake inaanggumi warogo wo'nugwi, Anggen yigirik nake pugwi, Ee'nip o, Yinuk, yorage nagagirak ya?

²⁶ Lek kwe, inagugi ogut ineenggi paga ogobakkigireegwaarak kugi inowe endage Takut nogo inom, Laaluguragan ayuk wukwi kugi Kewan inom, tiyappit wonok nugwi iyareegirak me,

²⁷ An nen wogoren o Ndamitik kagak nda time mbo piya nagin o,” yinuk, at Omaawi Lombok Menggerak endage Aliku ALA nen aret yegerak me, yokkiragi o.