Amot 3 - Ala Wone Peenok Peebi Mbanak

Ala nen yorage kagak yorogo nogogwaarak wone

¹ Kit Iterali mendek yi wae. Kit o Metit nen wokkiren wundi wagagerak at apuri abok aret Aliku ALA nen eeppinagarak yokkirage yi, kinaruk liirogon aret konenggo logonip o.

² “It aakumi ndarak logok lombok abok aret o nggween paga wonogwe iigak, It Iterali mban an napuri logowak nduk, leenogo piyareegirak me, It yi maluk ndi maluk eekwi paga aaninggin inoba kwippiyaagin o, Aliku ALA nen aret yegerak me, yokkiragi o,” yinuk, yoragagirak.

Ala nen yorage kagak yoraga nen eeko logorak wone

³ It aap ineebe mbere nen, “Nit nimbirak ndime nawok o,” yinuk, Wone koonogo puulik kagak it imbirak noorak op mbakop?

⁴ Singa iri'ngga ku'mbanak me logonet, at nengge menggerak awo kwaarogo nengga'lek kagak oone maluk ndi wuke, Ndi, singa awooluk yi mendek ndi mendek kwaarogo nengga'lek awina logonet, eyak ndi wuke,

⁵ Towe wariyak keele awo yilunogo pega'lek kagak, towe enggaanok nggerok togon wake, Pagi wariyak ta'na pugume waga'lek kagak eyo anggin mbanak nogo aan lebek ari, Eeke menggerak mbakop?

⁶ O kota ambime oone nggwok eeka trompet nogo oone pu eekwi iinok, aakumi inogut nggigik ari menggerak lek mbakop? Ndi, at Aliku ALA nen it aakumi o kota ambime menggaarak nogo, aaninggin inoba kwippiyoorak koongga'lek kagak Aaninggin inoba kwi'nage menggerak mbakop?

⁷ At Aliku Itok Menggerak ALA nen eeriyak koongge ti, Ayeloman mini at nen yorage kagak yoraga nogo, Wone yoraga'lek kagak it perak togon yorogo logorak lek aret mbako logonip o.

⁸ Singa nen oone nggwok muk yegerak me, aap ta nen agabiti mbaka'lek logorak mbakop? Ti ndak-ndak at Aliku Itok Menggerak ALA nen wone muk yegerak me, ta nen wone ti, yoraga'lek puk logorak mbakop?

It Iterali menggam ariyak yoragagerak wone

⁹ O Atorot time yugum pak wurik me, aakumi inarum logorak inawi wurik inom, O Metit time yugum pak wurik me, aakumi inarum logorak inawi wurik inom, Nogome wone eerogo nappit noorak nogo yi aret. Aliku ALA nen ari logonet, “It o Tamariya koorok puut-puut time kuwak ari woraawak o. Kuwak ari wa'nuk, it aakumi o time inenggela'me abu naalop-kaalop eerit nugwi, It-it at ambi tebenogo pegak eerit nugwi, Eekwi ti, inigen iyaagun o.

¹⁰ Yugum pak wurik me aakumi inarum logorak inawi wurik me time menggaarak nogo nen, Aakumi a'me nggelok eeppiiga'lek inoone omaawi paga aakumi inageerok waganggwi, Wi-wi aganako logonet, inamendek waganggwi, ee'nuk, Iname pati unggwogo menggaarak o,” yinuk, Aliku ALA nen ti aret yegerak o.

¹¹ Togop eekwi me, at Aliku Itok Menggerak ALA nen ari logonet, “It aakumi ti, wonogo menggam yendok-wandok abok aret inawim nen wanggerinakwi, Yugum pak wurik me inarum menggaarak inawi wurik nogo yigirogo pugwi, Aakumi inagugun wogo inawi nggwok abe wurik me wonage nogo kabologo waganggwi, Eerugun o,” yinuk, yegerak o.

¹² Aliku ALA nen ari logonet, “Singa nen ndomba wappunuk nengge logonet, iyok a, aruk a, ti mban yumbunogo mbo pegetak me, At aap ndomba ndegeninaka nogo kwaakkage menggi kwak, It Iterali mendek o Tamariya wonogwe nogo togop aret inagap ndarogo piige neenok, Nogo yegak lit yarak mban kologwe, Inanobak anep mbanak mban waganggwi, eerugun, yegerak me, yagi o,” yinuk, yoragagirak.

¹³ At Omaawi Lombok Menggerak Aliku ninogoba Ala nen ari logonet, “It Yakup paga wiganak eeppiyoorak wone yi, inaruk liirogon konembunuk yorogo logorak,” yegerak nogo yi aret.

¹⁴ “It Iterali mendek maluk lombok eekwi iinok, aaninggin inoba kwippiyoorak eyom ti paga, It inagugi ake warogo wogorogo menggam o Mbeten paga ogobakkigirik nogo, yigirogo wurabit nage logonet, Warogo wogoragak ogobakkigirik irip to aago nogo, kalenogo nggween paga wurabit nagin o.

¹⁵ It inawi o togwi eeke kenok, ari unggwagak wurik nogo yinik-minik eerogo pege, Mo andi kenok, ari unggwagak wurik nogo langgunik-panggunik eerogo nggimbege, Inawi wurik me wanggalep inom, meeli inom, ogobakkigirik nabenak nogo yigirogo pege, Inoweewi inendagembogut inawi nggwok abe wurik nogo, yigirik-noonom eerogo pege, Eerigin o,” yinuk, Aliku ALA nen aret yegerak me, yokkiragi o.