Amot 2 - Ala Wone Peenok Peebi Mbanak

It Mowap mendek eeppiyoorak wone

¹ Aliku ALA nen ari logonet, “It aakumi o Mowap menggaarak ti, ne kenagan mban maluk eerulik, ne ambi inom eekak mban eeko nogogwaarak me, An nanini eeppiyoorak koonak wonage nogo, teppiyaagin lek eeppiyaagin aret o. It Mowap mendek nen aap Erom mendek inowe endagembogut meek eerogo pogo logonet, owak nenenak kani kuneegwaarak wun aret agagerak me,

² O Mowap time kani nappi woraminggirak paga yugum pak wurik me inarum logorak inawi wurik nogo kani nen lek eerogo nagin o. Wim inoba kwi'nari unggwogwe eyom paga kumi-wa'le inoone ya-kwa agan nogwe, Oone nggwok eeka trompet nogo oone pu eekwi, Eekwi iigak, It Mowap mendek nogo yagwa-ndagwa agan nogo logonet, inoorak kambit nogo logogun o.

³ Aap inowe endagembogut inom, at awuri inom eeko menggaarak inom, abok aret lek eerogo inoorigin o,” yinuk, Aliku ALA nen aret yegerak o.

It Yekura mendek eeppiyoorak wone

⁴ Aliku ALA nen ari logonet, “It aakumi o Yekura menggaarak nogo ti, ne kenagan mban maluk eerulik ne ambi inom eekak mban eeko nogogwaarak me, An nanini eeppiyoorak koonak wonage nogo, teppiyaagin lek eeppiyaagin aret o. It Yekura mendek nogo Naliku an ALA nen eeko logorak wone yorage nagagirak nogo, taganogo mbo pugwi, An wone lengganogo yorage nagagirak nogo, pipporogo wonaga'lek tayoppugwi, Eeko logonet, It inombomini inagugi abe mendek lek, pilit kagak ayuk wuko nogogwaarak nogo aret mugurok nogo logonet, Nomo agan nogo nogogwaarak me,

⁵ An nen o Yekura yime kani nappi woraminggirak paga o Yerutalem yugum pak wurik me inarum logorak inawi wurik nogo kani nen lek eerogo nagin o,” yinuk, yegerak o.

It aakumi Iterali mendek eeppiyoorak wone

⁶ Aliku ALA nen ari logonet, “It aakumi o Iterali menggaarak ti, ne kenagan mban maluk eerulik, ne ambi inom eekak mban eeko nogogwaarak me, An nanini eeppiyoorak koonak wonage nogo, teppiyaagin lek eeppiyaagin aret o. It Iterali mendek nen aap iniki abe koonak inanomat mbanak inoba wonage nogo, Lek aruwak nduk ineebe mbuti perak paga onggo kuninakwi, It aakumi ineenggi lek mendek inanomat mbanak inoba wonage nogo, lek aruwak nduk, ineebe yum nibinik paga onggo kuninakwi,

⁷ Iniyok paga liirubu aa'ngga eerogo pogo mengga kwak it aakumi ambi eekkoloorak meek nogo mendek togop aret eerogo piigwi, It aakumi tebenogo piigaarak nogo inawone liirogon mbangga'lek yaga-taga eerogo piigwi, Aput-ogoba imbirak nen kwe tawe ambiret terak eerit nugwi paga an nendage alik leenak nogo maluk eerogo pugwi,

⁸ Inawu wogorogwe iinok, inayum nogoyum laalu porogo logorak waganggaatak nogo paga inagugi inake warogo wogorogo menggam eraanu time lenggenogo punuk, nogo yit nugwi, Wone taganogo pugwi iinok, onggo anggur amburu waganggaatak nogo, inagugi awi wurik me time nunggwi, Eeko menggaarak.

⁹ Eyo nggabina nggorek menggi kwak, Eyo teno omaawi ambik menggi kwak, It aakumi Amori mendek togop aret wonogwe iigak kwe, An naa'nduk nage logonet, ineebe lek eerogo piige, Eyo anggen ira'nggu'me yugu inom, omanggen wurabak inom, lek eerogo pege, Eereegirak o.

¹⁰ It aakumi Amori mendek wonogo menggam unde eeppatinuk logowak nduk, o Metit nen wogoren wundi wage, Tahun 40 eeke kagak, o karume wogoren nege,

¹¹ An yorage neegak yoraga aruwak nduk, inapuri ando leenogo mippiige, Inapuri wologwe tawe inenggela'me nen kumbuk mbambunuk nake leenak logowak nduk leenogo piige, Eereegirak o. Ti eereegirak nogo ti, it Iterali nogo nen, At nen abet aret ee'ninabeegerak nombakwi ilik?” yinuk, Aliku ALA nen aret yegerak o.

¹² “Ti eereegirak kagak, it aap nake leenak logorak kumbuk mbaneegwaarak nogo, Anggur amburu nawak nduk inoone omaawi paga yorogwe, It an yorage neegak yoraga nogo, Wone yo'niroorak lek o, yinuk, yorogwe, Eereegwaarak o.

¹³ Togop me, nggweendo gandum anggen mbanak yebet ee'nuk nage me, aaninggin nen aan lebe eerogo pege menggi kwak, An togop aret eerogo piyaagin o.

¹⁴ It aap tu inogowa ambik wonogwe nogo, mbet-mbet kole mbaganggwi, It aap inomaawi ambik wonogwe nogo, inomaawi paga panggombunuk wonogwe, It aap wim wakaa'ngget nogo, inagap ndakko'nok mbaganggwi,

¹⁵ It aap ineegin-inomaale nogo paga ko wappunuk wonogwe, It aap tu inogowa ambik nogo, kole mbo mbaganggwi, It aap kuda paga kwi'na'nuk nega nogo, inagap ndakko'nok mbaganggwi, Eerugun mondok lek aret o.

¹⁶ It aap wim kalu-kalu mondok wakaa'ngget aret wonogwe kwe, ne ti eyom paga inagabeewak nggonenak mbaganugun o, yinuk, Aliku ALA nen wone yi abok aret yegerak me yokkiragi o,” yinuk, yoragagirak.