Ala Unde 5 - Ala Wone Peenok Peebi Mbanak

¹ Yoge nagagerik, wone ambinom yoraawak nduk, Muta yoge logonet, “Ne ambi paga aap ambi maluk eeke me, aap alik ambi nen enegen kage, aruk konengge, eeremenggerak eenu wonage kagak, aap maluk eeremenggerak nogo owak loonggo logonet, aap eenu nogo woraawak nduk, ayonggo pemenggaarak kwe, Ndogop kagarak, yinuk, paganogo yori woroorak eebi mbake kenok ti, maluk aret me, at kunduk maluk onggo puwak o.

² Ndi, ne ambi paga aap ambi nen yi mendek ndi mendek inigen mbolok kwi penaame mendek ilik, inigen waanggo oome mendek a, inaanogum paga nugu menggaarak mendek a, abok aret ineebe mbaaniyoorak mage yugu kagak, kambemenggaarak enegen kaga'lek logonet, mbaaniyamenggerak paga obari oba lenggenemenggerak nogo paga eebe maluk aret aremenggerak kenok, Yi maluk aret eekirak kagi, mbaruwak o.

³ Ndi, aap ambi nen liippega'lek logonet, aakumi inoona mendek mbaanggoorak mage yugu nogo mendek mbaanggage kenok, at oba obari aret lenggembunuk, eebe maluk aremenggerak me, eenu age logomenggerik, Yi maluk aret eekirak kagi, mbaruwak o.

⁴ Ndi, aap ambi nen obeelom eeppiyoorak a, maluk eeppiyoorak a, nano mendek eeriyak abok aret iniki liippega'lek kagak, Abet aret eerigin o, yinuk, kumbuk mbanogo punuk, ugun wonage me, Kat yagandak nogo nonggop o? yogwi iinok, aap nogo nen mbake logonet, An yagarak ndak-ndak eerulik me, maluk aret eekirak kagi, mbaruwak o.

⁵ Eeriyak abok aret yagarak ti, aap ambi nen eeke logomenggerik kenok, An maluk ndogop aret eekirak o, yinuk, pagangge kenok,

⁶ omaluk lek eerogo pikit nduk, ndomba kooli a, kambin kooli a, warogo at maluk eeremenggerak nogo onggo Naliku ALA nake pi woraawak o. Pi wage kenok, omaluk lek eerogo punuk, nimbirak lambunik logokit nduk, aap an neebe unde nen nggami aanggo wakwi negen aret eeruwak o.

⁷ Togop eeriyak kwe, at maluk eeremenggerak onggo kambin-ndomba Naliku ALA wo'niriyak eebe lek kenok ti, omaluk lek eerogo pikit nen towe puume mbere ilik, towe kurona mbere a, wonok pi wage logomenggerik, towe ambi omaluk lek eerogo puwak nduk pugwi nogo mendek pege, ndi, towe ore nogo nake warogo kani kunuwak nduk pugwi nogo mendek pege, eeruwak o.

⁸ Ti eerogo pege kenok, aap an neebe unde nen omaluk lek eerogo puwak nduk, towe ake punogo pemenggerak nogo aa'nduk enggaanok nggaruk togon mbangga'lek we uut nggubunogo pege logomenggerik,

⁹ omaluk lek eerogo puurak amiya ti, ando waganogo nake warogo kani kunggo menggam ndoonak eraaninu paga werenogo punuk, amiya apit nogo nake warogo kani kunggo menggam abu'me taati kilirogo puwak o. Ti eeko logorak nogo ti, omaluk lek eerogo puwak nduk, nake warogo pogo logorak ti aret.

¹⁰ Ti eerogo punuk, towe ore nogo nake warogo kani kunggo logonet, Togop eeriyak o, yinuk, wone yugu ndak-ndak aret warogo kani kungge kenok, aap maluk eeremenggerak nogo omaluk an nen lek eerogo punuk, nimbirak lambunik logokit nduk, aap an neebe unde nen nggami aanggo wakwi negen aret eeruwak o.

¹¹ Ndi, amendek towe puume mbere ilik, towe kurona mbere a, wonage lek kenok, at maluk eeremenggerak nogo lek eerogo pikit nduk, an nake gandum anggen abu obeelom yigirik 2 liter negen aret pi woraawak o. At omaluk lek eerogo pikit nduk, nake puurak aret me, amburu obaga labungge, kani kunggwi iinok, obari abe kaga nogo obaga yumbunogo pege, eeriyak mage o.

¹² Gandum anggen yigirik wonok woramenggerak nogo aap an neebe unde nogo nen ne ambit eenggime woppunuk, Aap maluk eekerak omaluk yi, lek eerogo puurak ake o, yinuk, kani kunggo menggam alik mendek nake kani kunuwak nduk, pi woramenggaarak wonage nogo inom yumbunogo punuk, Naliku ALA nake kani kunuwak o. Ti eeko logorak ti, omaluk lek eerogo puwak nduk, nake pogo logorak nogo ti aret.

¹³ Ndi, aap ti maluk eeremenggerak nogo an nen lek eerogo punuk, nimbirak lambunik logokit nduk, aap an neebe unde nen nggami aanggo wakwi negen eekwi iinok, omaluk lek eerogo puurak nogo ti aret. Yi mendek ndi mendek anggen yigirogo nake pogo logonet, eeko mengga kwak, aap gandum anggen yigirik pi woramenggerak ando ndiinik nogo ti, aap an neebe unde ake aret teppogo logowak, yegerak, yoret o,” yinuk, yoreegerak.

Ala ake pugu lalembunuk, abe'nagak eeke kenok, lek aruwak nduk, obaane'me pi woroorak wone

¹⁴ Yoge nagagerik, at Aliku ALA nen Muta yoge logonet,

¹⁵ “Aap ambi nen, Yi Ala ake pugu, eenggo'lek me, yale-pale eerogo pege kenok ti, maluk aret me, an nawooliya wurik me onggo, Mbuti perak ndogop puurak o, yinuk, koonak wonage nogo ndak-ndak aret ndomba ngguunok awinde-obaande eerak lek amuni mbanak kenok Naliku ALA nake pugu lalenemenggerak nogo obaane'me pi woraawak o. Ti eeko logorak nogo ti, nake pugu lalenemenggerak nogo maluk aret me, maluk ti, aberak logokwak, lek eerogo pikit nduk, obaane'me pogo logorak ti aret.

¹⁶ Aap ti nen an nake leenogo pugu lalenemenggerak nogo obaane'me pi wage logonet, ambi seperlima inom oba lunogo wonok, aap an neebe unde wogora wage kenok, aap an neebe unde nen nake leenogo pugu lalenemenggerak obaane'me ndomba pi woramenggerak nogo aap ti nimbirak lambunikit nduk, nggami aanggo wakwi negen nake warogo pege kenok, omaluk ti lek eerogo pigin aret o.

¹⁷ Naliku ALA nen, Yogop eeriyak, ndogop eeriyak, wone yoragagirak nogo aap ambi nen eenggo'lek ugun logonet, lalengge kenok, at maluk aret eeremenggerak me, aaninggin at oba aret logowak o.

¹⁸ At oba aret wonage me, noone taganogo punuk, maluk eeremenggerak nogo lek eerogo pikit nduk, onggo aanggumi kambin-ndomba ngguunok ambi awinde-obaande eerak lek amuni mbanak, Onggo ndogop puurak, yugu nogo ndak-ndak aret wonok aap an neebe unde wogori wage kenok, at eenggo'lek ugun logonet maluk eeremenggerak nogo lek eerogo pikit nduk, noone taganemenggerak onggo pi woramenggerak nogo nimbirak lambunikit nduk, aap an neebe unde nen nggami aanggo wakwi negen nake warogo puwak o. Nake warogo pege kenok, an nen aap ti omaluk lek eerogo pigin o.

¹⁹ Ti eeko logorak nogo ti, Naliku ALA nake leenogo pugu yale-pale eeremenggerak nogo maluk aret me, lek eerogo pikit nduk, obaane'me nake pi wogo logorak nogo ti aret o,” yinuk, wone lengganogo Muta yoreegerak.