Ala Unde 3 - Ala Wone Peenok Peebi Mbanak

Ala inom lambunik logowak nduk, ake warogo wogogo logorak wone

¹ Yoge nagagerik, wone ambi yoraawak nduk, at Aliku ALA nen Muta yoge logonet, “It ambi nen, Ala nimbirak lambunik logokit o, yinuk, warogo an nake wo'niriyak mbakwi kenok, tapi ngguunok a, kooli a, nake puurak op mban aret kwe, awinde-obaande eerak lek amuni mbanak kenok mban Naliku ALA nenggaanom paga eeriyak me, wonok

² ninom lambungge minggim nawooliya wurik tu unggwogo menggam taati nen nake puurak tapi nogo anobak paga ineenggi tebenogo punuk, warogo puwak o. Warogo pugwi iinok, it aap neebe unde Karun apuri nen amiya nogo waganogo kani kunggo menggam irip aru-ogwe, ambe agi-ogu, eyo nabenak paga abok aret werenogo pit nawak o.

³ Pit nogwe iinok, an ninom lambuniyak nake warak kani kuniyak nduk, aap nogo nen aanogum paga nabenak agaraarin inom, aan paga mendek amok inom,

⁴ apenggen imbirak amok inom, ogogun paga nabenak ape inom, abok aret leenogo pege kenok,

⁵ Karun apuri nen eebe warak nogo kani kunggo menggam kani ndoonak nogo paga punuk, kani wuninogo pogo logomenggaarik, amok leenak nogo ti, kani wunuk ari me time nippuwak o. Ti eeko logorak ti, Naliku ALA nake kani kunemenggaarak obari abe kage logonet, nale'nggen kaakit nduk, nake pogo logorak nogo ti aret o.

⁶ Ndi, Ala ninom lambunuwok o, yinuk, kambin-ndomba ambi Naliku ALA nake warogo wo'niriyak mbakwi kenok, ngguunok a, kooli a, puurak op mban aret kwe, awinde-obaande eerak lek amuni mbanak kenok mban nake puwak o.

⁷ Ndi, ndomba nake warogo puurak mbakwi kenok ti, Naliku ALA nenggaanom paga eeriyak me, wonok

⁸ an ninom lambungge minggim nawooliya wurik me tu unggwogo menggam taati pi woraanuk, nake puurak nogo anobak ineenggi tebenogo punuk, warogo puwak o. Warogo pugwi iinok, Karun apuri nen amiya nogo waganogo kani kunggo menggam irip aru-ogwe, ambe agi-ogu, eyo nabenak paga abok aret werenogo pit nawak o.

⁹ Pit nogwe iinok, ninom lambuniyak nake warak nogo kani kuniyak nduk, aap aanggo unde nen amok inom, ageewak irip owaganegen kunik kagak mbanemenggaarak amok inom, aanogum paga nabenak agaraarin inom, aan paga mendek amok inom,

¹⁰ apenggen imbirak amok inom, ogogun paga nabenak ape inom, abok aret leenogo pege kenok,

¹¹ mbi nake pogo mengga kwak, it an neebe unde nogo nen kani kunggo menggam taati kani kunuwak o. Ti eeko logorak nogo ti, Naliku ALA nake warogo kani kunggo logorak ti aret.

¹² Ndi, kambin nake warogo puurak mbakwi kenok, Naliku ALA nenggaanom paga eeriyak me, wonok

¹³ an ninom lambungge minggim nawooliya wurik me tu unggwogo menggam taati pi wogo logomenggaarik, nake puurak nogo anobak paga ineenggi tebenogo punuk, warogo puwak o. Warogo pugwi iinok, Karun apuri nogo nen amiya waganogo kani kunggo menggam irip aru-ogwe, ambe agi-ogu, eyo nabenak paga abok aret werenogo pit nawak o.

¹⁴ Pit nogwe iinok, nake warak nogo kani kuniyak nduk, aap aanggo unde nen aanogum paga nabenak agaraarin inom, aan paga mendek amok inom,

¹⁵ apenggen imbirak amok inom, ogogun paga nabenak ape inom, abok aret leenogo punuk,

¹⁶ amok abok aret ti, Naliku ALA namendek aret me, mbi nake pogo mengga kwak, nake kani kunemenggaarak obari abe kage logonet, nale'nggen kaakit nduk, kani kunggo logowak o.

¹⁷ It aakumi Iterali logowam time inapuri-inombowologwe wigannarit nogo logogun inom wone yugu yi, mondok-mondok eeko logonet, amok inom, amiya inom, nonggo logorak mondok mage, yegerak, yoret o,” yinuk, yoreegerak.