Ala Unde 25 - Ala Wone Peenok Peebi Mbanak

Tahun 6 eeppunuk, ambi ari wage paga eeko logorak wone

¹ At Aliku ALA nogo puut Tinayi paga nen Muta yoge logonet,

² “Aakumi Iterali wone yoroorak nogo yi aret. It nen o wogoraagin nogome unggwi nogo logomenggaarik logonet, yabu eerogo nunggugak tahun 6 abu eeke kenok, tahun ambi ari nage paga Naliku ALA nayuk wuko logonet, nggween ti lubungge logowak nduk teppuurak me,

³ tahun 1 nen 6 kuli paga yi mendek ndi mendek yarit nugwi, anggen abe yuwak nduk eno'mbak mbanogo nappugwi, anggen mbanogo pati unggwogwe, eerit noorak op aret kwe,

⁴ tahun 6 eeppunuk, ambi ari nage kenok, tahun ti paga yabu waganogo yi mendek ndi mendek yakwi, eyo anggur eno'mbak mbanogo nappugwi, eeriyak mage o. Ata, Naliku ALA nayuk wuko logonet, nggween ti, lubungge logowak nduk, teppogo logowak o.

⁵ Nggween nogo lubunuwak nduk, teppugu kagak tahun ambit ariyak me, yi mendek ndi mendek yako nogogwam nggulaame alik nen wungge, eyo anggur eno'mbak mbanogo nappega'lek kagak anggen yege, eeke kenok, mbanogo iname pati ungguurak mage o.

⁶ Tahun 7 ti paga yi mendek ndi mendek alik nen lagangge logomenggerik, anggen yemenggerak nogo it inom, inayeloman mini kumi-aap inom, yabu eeppiigwi iinok, onggo wogorogo menggaarak inom, aap nggiru inom menggaarak inom, abok aret terak nonggo logowak nduk teppiyoorak o.

⁷ Ndi, inaanggumi oome mendek inom, endekem mendek nggwiya inom, it kunduk alik nen lagangge ti, nonggo logowak nduk, teppiyoorak, yegerak, yoret o,” yinuk, yoreegerak.

Tahun 50 paga nggween kunemenggaarak nogo inanggween unde wogorogo logorak wone

⁸ Yoge nagagerik, “Tahun 6 eeppunuk, ambi ari wage kenok, nggween lubunuwak nduk teppugwi nogo ti, tahun 7 mban 7 kuli eeke kenok, lambuk togon 49 tahun aret me, ineenggi linggimbunuk, tahun 49 abu eekerak kagi, mba'nuk,

⁹ Tut 7 penenak tanggal 10 yi paga, Ala ninom lambunuwok o, yinuk, inale'nggen eekwi ti eyom paga it logowam yi awi ndi awi abok aret konenuwak nduk, oone nggwok eeka trompet oone pu kunik-kunik eekwi iinok,

¹⁰ yogo logonet, Tahun 50 abu aret agaarak me, Ala nen tahun yi paga ninanggween koonogo pinanege, ninayeloman wondet agago piige, eeriyak ake koonogo pereegerak nogo, nit abok aret eeko logowok o, yinuk, tahun 49 eerit nage kagak yi mendek ndi mendek kunit namenggaarak nogo tahun 50 paga inamendek unde wogorogo logorak oone nggwok eeka trompet nogo oone pu eeka eyom aret me, inanggween kunggolamenggaarak nogo inanggween unde kola nogwe, inayeloman kenok, iname lombok nawak nduk, nappiigwi, eeko logowak o.

¹¹ Tahun 50 paga ti, inanggween unde wogorogwe, inayeloman nen iname nogwe, eeko logorak me, yi mendek ndi mendek awi yarit nugwi, alik en wungge kenok mbanggwi, eyo anggur eno'mbak mbana'lek kagak anggen yege kenok, mbanogo iname pati unggwogwe, eeko logobok o.

¹² Tahun yi ti, inanggween unde wogorogwe, inayeloman nen iname nogwe, eeriyak ake leenak me, yabu nggulaame alik nen wundemenggerak nogo mban mbanogo nonggo logowak o.

¹³ Tahun yi paga inanggween kunggolamenggaarak nogo inanggween unde lombok kola nogo logowak o.

¹⁴ Aap ambi nen ore ambi anggween kunggola nage ilik, at ore nen at anggween kunggola wage a, eeko logonet, at ambi nen at ambi wi-wi eekak eeko logorak mage o.

¹⁵ At ambi oreeluk anggween kunggola nage kenok, tahun 50 age paga inanggween unde wogorogo logorak me, Tahun mande eeppunuk, anggween unde kolaagin, yinuk, eenggi linggimbunuk, tahun eeriyak ndak-ndak onggo wogoge, ndi, ore nen at aap nogo oona anggween kunggola wage kenok, tahun 50 age paga inanggween unde wogorogo logorak me, anggween unde kolaga'lek kagak, Ne mande paga anggen ka'let age kenok, mbanogo ame pati ungguurak o, yinuk, eenggi linggimbunuk, onggo ndak-ndak wogoge, eeko logowak o.

¹⁶ Ti eeko logorak nogo ti, nggween ti aret onggo kunggoloorak nduk, eekwi lek o. Ata, ne mande paga anggen ka'let aremenggerak mbaniyak paga linggimbunuk, onggo koonogo eekwi me, tahun ambik eeriyak kenok, onggo nggwok wogorogwe, ndi, tahun mbereeluk eeriyak kenok, onggo mbuuluk aret wogorogwe, eeko logowak o.

¹⁷ An inogoba Ala nayuk wuko logonet, at ambi nen at ambi wi-wi eekak eeko logorak mage o. Naliku inogoba Ala an nen aret yagi o, yinuk, yegerak, yoret o,” yoreegerak.

Tahun 7 paga iniki piirik kenok eeko logorak wone

¹⁸ Yoge nagagerik, “Nggween an wogoraminggirak nogome logonet, iniki piirik lek tayenak obeelom lombok logowak nduk, an nen wone lengganogo yorage nogo mugurok nogwe, eeko logorak wone yugu nogo liirogon woppunuk, eerit nugwi, eeko logowak o.

¹⁹ Liirogon eerit nugwi iinok, inanggween ti paga yi mendek ndi mendek yappunuk, anggen ndonggorogon nunggwi, iniki ugun obeelom tayenak wonogwe, eeko logowak o.

²⁰ Ndi, wone yi yorage kenok, it nen mbako logonet, Tahun 7 ti paga yi mendek ndi mendek yakwi, anggen mbanogo pakwi, eeriyak lek yo'nirage yi, nit nano nonggo logorak me yo'nirage, mbarugun me, it yoraanok nduk, an ambi yokkiri o.

²¹ Tahun 5 eeppunuk, ambi eerak ti paga mban nale'nggen mondok alik negen inoba piige logonet, yi mendek ndi mendek yaremenggaarak anggen tahun 3 eeppunuk noorak ndak aret anggen ka'let eerogo wogoraagin me,

²² tahun 7 paga nunggwi, ti'nuk, tahun 7 eeppunuk, ambi paga it yi mendek ndi mendek yaremenggaarak anggen kole age kagak tokkogo logonet nunggwi, eeriyak ti, anggen aa'nduk mbanak ti paga aret nenet tahun 9 paga ari nawak, yegerak, yoret o,” yinuk, yoreegerak.

Nggween onggo kunik nogo anggween unde wogoriyak wone

²³ Yoge nagagerik, “Nggween ti, an Ala nanggween aret o. Ndi, it ti, aap nggiru negen luulu unde logowak nduk, wogoragagirak me, it nen nggween onggo nggerenggolagwaarik o.

²⁴ Nggween unde logowak nduk, wogoragagirak nogo aap ambi nen ambi oba kungge kenok, Nanggween kunggolaakit, mbake nogo nen, Peebi anggween unde nen kolage logonet, nawu obaane'me awi ya'niriyak, mba'nuk, wu wogoruwak o.

²⁵ Ndi, inore ambi yinip-panip aaninggin oba kwi'naremenggerak paga anggween onggo kunggolage kenok, ore imbirak ndarak wage logomenggerik, nggween onggo pugu nogo awi yakkage logowak o.

²⁶ Ndi, aap nogo awi yakka woroorak ore wonage lek kenok perak, aap nogo wonage logonet wu kin aremenggerak paga nggween kunemenggerak nogo awu obaane'me awi yakkoorak op aret me,

²⁷ awi yakkage logonet, kumbunuk tahun mande wonagaarak nogo eenggi linggimbunuk, wonagaarak ndak-ndak aret awi yakkenok, anggween unde aret kolaawak o.

²⁸ Togop eeko logorak kwe, awi yakkoorak awu kin age lek kenok perak, aap kunggolamenggerak nogo unde wonage kagak tahun 50 age paga inanggween unde kologwe nogo eyom paga aap anggween unde nogo aret wogoruwak, yegerak, yoret o,” yinuk, yoreegerak.

O onggo kunik kenok awi unde koloorak wone

²⁹ Yoge nagagerik, “Aap ambi nen yaga'lelo pak abu wurik me o wurik ambi kunggolage kenok, kunggolamenggerak kuli nen tahun ambit ari naga'lek awo kagak awi yakkoorak op aret kwe,

³⁰ tahun abu ari nage kenok perak, awi yakkoorak meek me, at kunemenggerak apuri inom mondok unde aremenggerak me, tahun 50 age paga inamendek unde kologwe nogo eyom paga aap awi unde nogo wogoriyak lek o. Ata, at kunemenggerak inom, apuri-ombowologwe ndarit nogo logogun inom, mondok-mondok unde eekkolaawak o.

³¹ Ndi, yaga'lelo ambi pak wurik paga lek, o mban wurik me kunggolage kenok, ti nggween yabu eeko menggam ando aret mba'nuk, nggween awi yako mengga kwak yakka wogwe, ndi, yakka woroorak meek kenok, tahun 50 age paga inanggween unde kologwe nogo eyom paga aap unde nogo kolage, eeko logowak o.

³² Ti togop eeko logorak kwe, it aap Lewi mendek inawi yaga'lelo o wurik ambi aap ambi nen kunggolage kenok, o wurik kunemenggerak nogo it aap Lewi nen obaane'me yi tahun ndi tahun paga ugun awi yakkogo logorak op aret me,

³³ aakumi Iterali mendek inenggela'me it aap Lewi mendek inawi yaga'lelo wonage nogo ti, it aap Lewi mendek inawi inobaalombok aret me, aap ambi nen inawi wurik ambi kunemenggerak nogo awi yakkoorak nduk, waga'lek kagak tahun 50 age paga inamendek unde kologwe nogo eyom paga ari wage kenok, obaane'me awi yakkoorak lek, at awi unde Lewi nogo aret kolaawak o.

³⁴ Ndi, nggween it aap Lewi mendek inawi yaga'lelo enaagan-ambokan iri'ngga ndomba nonggo menggam nogo ti, Lewi mendek inanggween aret me, kuniyak mondok mage, yegerak, yoret o,” yinuk, yoreegerak.

Aap ineenggi lek kenok yeenggwaarogo logorak wone

³⁵ Yoge nagagerik, “Aap Iterali mendek ambi aaninggin oba kwi'naremenggerak paga amendek lek eerogo patemenggerak me, ambi eekkolage logorak meek age kenok, it Iterali inenggela'me logonet, op logowak nduk, aap nggiru ilik, aap we luulu inom logowak nduk wage kenok a, eeppiigo menggaarak togop nogo aret eeppogo logowak o.

³⁶ Aap nogo inenggela'me logonet op logowak nduk, yeenggwaago logonet, wu wogoremenggaarak nogo obaane'me wogora wage kenok, it nen inogoba Ala an inagabiti nombako logonet, Oba lunogo ambi inom wo'niroorak, yoriyak mage o.

³⁷ Wu yeenggwaaremenggaarak obaane'me wogora wage kenok, oba lunogo ambi inom, Wo'niru, yogwi, ndi, mbi kuni wage kenok, Ambinom nabenogo wo'niriyak o, yinuk, nggino yogwi, eeriyak mage o.

³⁸ O Kanan wogorage logominggirik, inogoba Ala an aret logokit nduk o Metit nen wogoren wagagirak nogo ti, Naliku inogoba Ala an aret o, yinuk, yegerak, yoret o,” yoreegerak.

Inayeloman onggo kunik nogo wondet eerogo piyoorak wone

³⁹ Yoge nagagerik, wone ambi yoraawak nduk, yoge logonet, “Aap Iterali ambi aaninggin oba aremenggerak paga amendek lek eerogo patemenggerak me, An kinayeloman logokit nen kunnabu o, ari kenok, oreewi inayeloman eeppunuk logorak mage o.

⁴⁰ Ata, aap yabu eeppiigwi a, aap we luulu inom logowak nduk, iniya wogwe kenok a, eekwi iinok, eeppiigo menggaarak kokwak at kunduk togop eeppugwi iigak, aap nogo inake eeke kagak tahun 50 age paga aakumi inayeloman wondet agago piigwi eyom nogo ari nawak o.

⁴¹ Tahun ti ari wage paga at apuri inom wondet agago piyoorak me, wondet agago piigwi iinok, at ombomini nggween taganeegwaarak owe-awot wonogwe me ame time aret nawak o.

⁴² It aakumi Iterali nogo ti, An nayeloman aret o, yinuk, o Metit nen wogoren wundi wagagirak me, aakumi inayeloman logowak nduk kuninako mengga kwak, it Iterali inayeloman logowak nduk kuninako logorak mage o.

⁴³ An inogoba Ala inagabiti nombako logonet, inake yabu eeppiigwi iigak, inoone omaawi paga yorogo logorak mage o.

⁴⁴ Ndi, Iterali inayeloman logowak nduk kuninaburak nogo ti, yi aakumi ndi aakumi inanebunu alik mendek enaagan-ambokan wonogwe kumi a, aap a, kuninaburak op aret.

⁴⁵ It aakumi luulu inom logowak nduk wonogwe a, it mendek inom logonet ndarak a, ti kunduk kuninako logorak op aret me, kuninakwi iinok, it Iterali inamendek negen aret logowak o.

⁴⁶ Inapuri ineyate wogorogo logonet, inayeloman ti inom aret wogorogwe, inayeloman mondok-mondok logowak nduk, eeppiigwi, eeko logorak op kwe, it inoreewi Iterali mendek kenok perak, yabu eeppiigwi iigak, inoone omaawi paga yorogo logorak mage o.

⁴⁷ Aap Iterali mendek ambi aaninggin oba aremenggerak paga amendek lek eerogo pake logomenggerik, aap nggiru a, aap ambi we luulu inom wonage a, eenggi warak aremenggerak wonage me, An neebe kunnabu o, yori woramenggerak aap nggiru inenggela'me wonage nogo nen a, at anebunu mendek nen a, kungge kenok,

^48-49 aap Iterali eebe kunggolamenggerak nogo owe-awot ambi nen a, ogobaluk nen a, oreeluk nen a, owe-awot at inom ndarak ambi nen a, aap nggiru nen kunemenggerak nogo awu obaane'me awi yakka woroorak op aret o. Ndi, aap nggiru nogo ake yabu eeke logonet, wu wagangge logomenggerik, awi yakkoorak op aret age kenok, at nen aret onggo pugu nogo awi yakkoloorak op aret me,

⁵⁰ aap kunemenggerak nogo imbirak nen, Neebe kunnabu o, yoremenggerak kuli nen tahun 50 age paga aakumi inayeloman wondet aago pugwi nogo eyom ari noorak kenok, tahun mande ariyak linggimbunuk, aap yabu eekwi iinok onggo wogorogo mengga kwak wu wogoriyak nogo, tahun ti ndak-ndak aret age kenok at kunemenggerak awi yakkage kenok, wundi noorak op aret o.

^51-52 Wondet aago nege logowak nduk, tahun liirogon linggimbunuk, onggo wogoriyak me, tahun 50 age paga aakumi inayeloman wondet agago piigwi nogo eyom ari noorak lingginggo logonet, tahun ambik eeriyak ari nage kenok, wu ambik aret awi yakkage, ndi, mbereeluk eeriyak ari nage kenok ti, mbuuluk awi yakkage, eeko logowak o.

⁵³ Aap ambi yi tahun ndi tahun paga yabu eeppege kenok, onggo wogogo mengga kwak, aap nggiru nogo nen aap Iterali nogo togop aret eeppege logonet, oone omaawi paga, Yogop ee'nu ndogop ee'nu, yoriyak mage o.

^54-55 It aakumi Iterali mendek nogo ti, an nayeloman mini aret me, aap Iterali nogo awi togop yakkoorak meek age kenok, imbirak kagak tahun 50 age paga aakumi inayeloman wondet eerogo piigwi nogo eyom ari nage kenok, at apuri inom wondet aago nege logowak nduk, teppuurak o. Aakumi Iterali ti, an nayeloman mini o Metit nen wogoren wagagirak me, Togop eeppiigo logowak o, yinuk, Naliku inogoba Ala an nen aret yagi o, yinuk, yegerak, yoret o,” yoreegerak.