Ala Unde 22 - Ala Wone Peenok Peebi Mbanak

Ala ake pugu ti, abu leenak me, liippunuk, nonggo logorak wone

¹ At Aliku ALA nen Muta yoge logonet,

² “Naliku ALA an aret me, an nendage abu obeelom alik leenak nogo maluk eerogo pukwak, it aakumi Iterali nen yi mendek ndi mendek an nake leenogo pani wogwe nogo ayuk warak eerogo liippunuk nake pogo logowak nduk, Karun apuri inom yoraanu o.

³ Yorage logonet, it aakumi Iterali nen Naliku ALA nake leenogo pi wogwe me time aap Karun apuri inom, ombowologwe inom, wigannarit nogo logogun nogo mendek ambi, wone ambi oba aremenggerak kagak nage kenok, aap ti, an nenggaanom paga enggaawak lek eerogo pogo logowak o. Wone yi ti, it peebi nda'narit nogo logogun nogo mondok-mondok eeko logowak nduk, Naliku ALA nen aret yagi o.

^4-5 Ndi, Karun apuri wiganak ambi awin aaga'ne kunik wonage ilik, kumi-aap inoona mendek paga inanggore'na inom wungge a, eekwi kenok, inoba wonage nogo lek aruwak nduk, wam wako mengga kwak, it togop ambi eeka'lek kagak an nake leenak pugu ti, it noorak mage o. Ndi, aap ambi nen aap kanggerak ambi mbaanggage, aap oona paga mendek wungge nogo mbaanggage, inaanogum paga nugu menggaarak mendek ambi mbaanggage, aap ambi mbaanggoorak mage yugu nogo mendek oba wonage kagak mbaanggage, yi mendek ndi mendek mbaanggoorak mage yugu ti mendek abok aret aap ambi nen mbaanggamenggerak paga maluk oba wonage kagak, aap Karun apuri wiganak ambi nen aap nogo mbaanggage kenok,

⁶ at kunduk maluk aremenggerak me, niyo paga agabolo kooka'lek kagak nake pugu leenak nogo nengga'lek aret oonegen kilu yi nawak o.

⁷ Nengga'lek kagak oonegen abu aret kilu yi nage kenok perak, Abu obeelom agaarak, mba'nuk, nake pugu leenak nogo ti, at ambi aret me, noorak op aret o.

⁸ Yi mendek ndi mendek kambemenggerak ilik, nggeewo ta'ngge nen nengge logonet ando pemenggerak a, nengge kenok, oba maluk eekkolookwak me, at noorak mage o. An Naliku ALA nen aret yagi o.

⁹ It aap ti, an nake eeko logowak o, yinuk, leenogo piige minggirak Naliku ALA an aret me, it aap an neebe unde nogo, Eeko logonip o, yinuk, yorage yi, Meek, mbako logonet, taganogo punuk, maluk eekwi iinok, inagap mbugunggolamenggaarak kambukwak, eeko logorak yagarak ti porogo logonet, liirogon aret eerit nogo logowak o.

¹⁰ An nake pugu leenak ti, aap an neebe unde inom yabu eeko menggaarak noorak op aret kwe, aakumi ugun terak noorak mage o. Ndi, aap nggiru aap an neebe unde inom wonogwe ilik, aap at eyabu eeppiigwi iinok onggo wogorage menggerak kenok a, ti kunduk noorak mage mban.

¹¹ Togop eeriyak kwe, aap an neebe unde nen aap ambi ayeloman logowak nduk awu paga kunggolamenggerak ilik, ayeloman imbirak logonet ndaremenggerak a, ti perak, magarogo logowak o.

¹² Aap an neebe unde apuluk kolaga ambi nen ogonggelo aap an neebe unde lek aap ugun kolamenggerak kenok, an nake leenak pi wogwe nogo kolaga ti magariyak mage o.

¹³ Aap an neebe unde apuluk kolaga ambi aagaluk awo ndaka'lek kagak, nanu pugu ilik, ogonggelo nen mbo pemenggerak a, at ogoba an neebe unde nogo ka wage kenok perak, kolaga awo tawe wonagaarak togop nogo aret ogoba imbirak wonage me, at ogoba an neebe unde nen mbi nake pugu ti, magariyak op aret kwe, aakumi we ugun mendek ti perak, magaroorak mage o.

¹⁴ Aap ambi nen, Yi Ala ake pugu leenak mendek, eenggo'lek logonet nengge kenok, obaane'me aap an neebe unde awi yakka wage logonet, obaga lunogo alik ambi inom wogori woraawak o.

^15-16 Aakumi Iterali nen Naliku ALA nake leenogo pi wogwe ti, aap an neebe unde nen, Aakumi ugun noorak op, mba'nuk wogoramenggaarak nunggwi iinok, nake pugu nogo yale-pale ee'naremenggerak paga obaane'me pi woroorak age kenok ti, nake leenogo pugu nogo maluk arukwak me, it aakumi ugun nawak nduk, wondet eerogo puurak mage o. An nake pi wogwe iinok, leenogo pake minggirak nogo ti, Naliku ALA an nogo nen aret eeke minggirak o, yinuk, yegerak, yoret o,” yoreegerak.

Ake pugu at Ala waganggeelik wone

¹⁷ Yoge nagagerik, at Aliku ALA nen Muta yoge logonet,

¹⁸ “Aap Karun apuri inom, aakumi Iterali inom, wone yoroorak nogo yi aret. Aap Iterali mendek ambi a, aap nggiru Iterali inom wonage ambi a, it nen nimbirak wone ambi nggaruk togon mbanumonggoorak abeke logonet, wo'niriyak ilik, onggo lek we aret wo'niri woroorak a, mbake logomenggerik, Naliku ALA nake warogo kani kuniyak nduk, pi woroorak nogo ti,

¹⁹ an wagangge logominggirik, nale'nggen inombarikit nduk, tapi a, kambin-ndomba a, inawinde-inobaande eerak lek ngguunok kenok mban nake pani wogo logowak o.

²⁰ Awinde-obaande eerak oba wonage kagak wo'niri wogwe iinok ti, an wagangge logominggirik nale'nggen inombarigin lek me, togop mendek kenok nake pani woragwaarik o.

²¹ Ndi, aap ambi nen nimbirak wone nggaruk togon mbanumonggoorak abeke logonet wo'niriyak ilik, onggo lek we aret wo'niri woroorak a, mba'nuk, Ala nimbirak lambunik logokit o, yinuk, lembu-tapi a, kambin-ndomba a, Naliku ALA an wo'niri wogwe iinok, niniki ale'nggen nen waakit nduk, awinde-obaande eerak lek amuni mbanak kero mban wo'niri wogo logowak o.

²² Togop aret me, inaanggumi inigen mbuk kenok, arowat langgonak kenok, amborowak ko aago kenok, oba piirik kenok, awin kunik kenok, agabolo paga aga'lu kenok, Naliku ALA nake pani wogwe, ndi, Naliku ALA nake warogo kani kunggo menggam nippugwi, eerugwaarik o.

²³ Ndi, tapi ilik, ndomba a, mbi inikime wakeelik keele negen kenok, anobakweluk ndarak kenok ti, nimbirak wone nggaruk togon mbanumonggoorak abeke logonet wo'nege kenok, an waagin lek kwe, onggo lek we aret wo'niri woroorak kenok ti op aret o.

²⁴ Inaanggo ambi ooli piirik kenok, ooli tubunik kenok, ooli nibinik kenok, ooli wogo kenok, nogo ti, Naliku ALA nake pi woragwaarik o. Ndi, it iname time togop eerugwaarik mban.

²⁵ It aap nggiru nen inaanggumi togop eerak kagak wogorogwe iinok, Yi ninogoba Ala ake o, yinuk, nggomoorogo punuk, nawak nduk, wogoroorak mage, yegerak, yoret o,” yinuk, yoreegerak.

²⁶ Yoge nagagerik, at Aliku ALA nen Muta yoge logonet,

²⁷ “Tapi aagaluk ilik, kambin-ndomba aagaluk a, ndaremenggerak ne 7 paga agalo imbirak logowak o. Ndi, ko'lu paga Naliku ALA nake warogo kani kuniyak op aret kwe,

²⁸ inagalo-inaagalogwe inom ne ambit paga inooriyak perak, mage o.

²⁹ Ndi, Naliku ALA, Wa, yo'niriyak nduk, nake warogo pogo logonet kenok ti, an niniki ale'nggen kinombake logonet, waakit nduk, wone yugu yi ndak-ndak aret eeko logomunggup o.

³⁰ Warogo nonggo logonet kenok, ando ko'lu noorak nduk puurak mage o. Ata, ne ti eyom paga aret tigitogon nonggo logomunggup o. An Naliku ALA nen aret yagi o.

³¹ Naliku ALA an aret me, wone, Yogop ee'nu ndogop ee'nu, yokkirage nogo kit nen nggirik-nggerok porogo logonet, eerit nogo logomunggup o.

³² Naliku ALA an aret me, it aakumi Iterali nen an kikak nakeelik abu obeelom leenak neyaawak nduk, nendage abu obeelom alik leenak wonage nogo, kit nen miyuk-meya eerogo puurak mage o. Kit kikak naka'lek obeelom logobagip nduk, leenogo pinagage,

³³ ndi, kinogoba Ala an aret arikit nduk, o Metit nen wokkiren wundi wage, eereegirak nogo ti, Naliku ALA nen aret eereegirak o,” yinuk, yoreegerak.