Ala Unde 2 - Ala Wone Peenok Peebi Mbanak

Gandum anggen yigirogo pogo logorak wone

¹ Yoge nagagerik, it aakumi Iterali yoraawak nduk, at Aliku ALA nen wone ambinom Muta yoge logonet, “It ambi nen gandum anggen Naliku ALA nake puurak mbakwi kenok ti, gandum anggen nogo abu abe lombok yigirogo pogo logomenggaarik, amburu obaga kilirogo pugwi, kani kunemenggaarak obari abe kaga nogo obaga yumbunogo pugwi, ee'nuk, wonok

² it aap an neebe unde Karun apuri ira wogo logowak o. Ira wogwe iinok, nake pugu abe yigirik amburu inom, kani kunggwi iinok obari abe kaga nogo inom, aap an neebe unde nogo nen eenggi paga ne ambit woppunuk, Anggen yigirik yi, abok aret kat kake aret o, yinuk, nggomoorogo kani kunggo menggam nogome an nake kani kunggo logowak o. Ti eeko logorak nogo ti, Naliku ALA nake kani kunemenggaarak obari abe kage logonet, nale'nggen kaakit nduk, nake pogo logorak nogo ti aret o.

³ Yi mendek ndi mendek an wo'niriyak nduk, kani kunggo logorak nogo ti, Naliku ALA nake leenogo pugu abu mage lombok me, ando ndiinik nogo it Karun apuri inom inake aret teppogo logowak o.

⁴ Ndi, gandum anggen yigirik nogo wun awi ndoonak paga worarogo nake puurak mbakwi kenok ti, anggen yigirik abe lombok piiruwak nduk, ragi pega'lek kagak, amburu mban amok mbanogo oroti negen longgo warogo punuk, nake puurak mbakwi kenok a, ragi pega'lek kagak we tabak worarogo amburu obaga labunogo punuk, nake puurak mbakwi kenok a, ti op mban aret o.

⁵ Anggen yigirik nake pogo logorak nogo ti, togolowak paga ndoonogo worappunuk wo'niriyak mbakwi kenok, anggen yigirik abu abe kero woppunuk, ragi pega'lek kagak amburu paga mban amok mbanogo togolowak paga worarogo punuk,

⁶ mbuulogwe-mbaalogwe mbanogo amburu obaga kilirogo punuk, wo'nogo logowak o. Ti eeko logorak nogo ti, anggen yigirik paga worarogo an nake wo'nogo logorak nogo ti aret o.

⁷ Ndi, anggen yigirik nake pogo logorak nogo ti, kuwali paga worarogo wo'niriyak mbakwi kenok, anggen yigirik abe kenok mban waganogo amburu paga amok mbanogo kuwali paga worarogo punuk, an wo'nogo logowak o.

⁸ Anggen yigirik ndogop worarogo Naliku ALA nake puurak, yagarak ti, ndak-ndak aret worarogo wonok aap an neebe unde ira wogo logowak o. Ira wogwe iinok, it an neebe unde nogo nen nake pugu nogo wonok kani kunggo menggam nogome pi woraanuk,

⁹ Yi abok Ala kake aret o, yinuk, Naliku ALA nake nggomoorogo ando nogo kani kunemenggerak obari abe kage logonet, nale'nggen kaakit nduk, kani kunggo menggam taati nake kani kunggo logowak o.

¹⁰ Yi mendek ndi mendek an wo'niriyak nduk, kani kunggo logorak nogo ti, Naliku ALA nake leenogo pugu abu mage lombok me, ando ndiinik nogo it Karun apuri inom inake aret teppogo logowak o.

¹¹ Naliku ALA nake kani kunggo logorak nogo ti, piiruwak nduk ragi inom, nggiin amburu inom, anggen yigirik ti inom punuk, Naliku ALA nake kani kuniyak ti mage me, yi mendek ndi mendek anggen yigirik paga worarogo Naliku ALA nake pogo logorak ti, ragi inom punuk, worarogo wo'nogo logorak mage o.

¹² Anggen iyaalok yugu mbanogo Naliku ALA nake pi wogo logonet, anggen yigirik ragi nogo inom, nggiin amburu inom, inom punuk, nake wo'niri wogwe kenok ti, waagin aret kwe, obari abe kage logonet, niniki ale'nggen kaakit nen kani kunggo menggam kani kunggo logorak nogo mendek me nduk wo'nogo logorak ti perak, mage o.

¹³ Gandum anggen yigirik worarogo nake puurak kenok ti, mayu eerogo punuk mban wo'nogo logowak o. It inogoba Ala an ninom wone abuk nggaruk togon mbaneegirak nogo aberak logowak nduk, mayu eerogo mban lako menggaarak me, nake pi wogwe iinok, mayu eerogo mban nake pi wogo logowak o.

¹⁴ Naliku ALA nake yi mendek ndi mendek anggen iyaalok mbanak pi wogo logonet kenok ti, kani paga worarogo yigirogo punuk,

¹⁵ amburu inom kilirogo pege, kani kunggwi iinok obari abe kaga nogo yumbunogo pege, eeppunuk, an wo'nogo logowak o. Ti eeko logorak nogo ti, anggen yigirik paga worarogo an nake wo'nogo logorak nogo ti aret o.

¹⁶ Ndi, aap an neebe unde nogo nen anggen yigirik amburu inom, obari abe kaga nogo inom, pugu nogo ando eenggime woppunuk, Yi abok kake aret o, yinuk, Naliku ALA nake nggomoorogo kani kunggo logowak, yegerak, yoret o,” yinuk, yoreegerak.