Ala Unde 18 - Ala Wone Peenok Peebi Mbanak

Ugun-ugun wurinaburak mage yoreegerak wone

¹ At Aliku ALA nen Muta yoge logonet,

² “It aakumi Iterali mendek wone yoroorak nogo yi aret. Naliku inogoba Ala an aret me,

³ it aa'nduk wonogogwam aakumi o Metit mendek eeko mengga kwak eekwi, ndi, an nen wogoren o Kanan piya nawam it aakumi time mendek eeko mengga kwak eekwi, eeko logorak mage o.

⁴ Naliku inogoba Ala an aret me, an nen eeko logorak wone yorage nogo liippunuk eekwi, ndi, wone lengganogo yorage nogo mondok mugurok nogwe, eeko logowak o.

⁵ Naliku ALA an aret me, wone lengganogo yorage nogo inom, eeko logorak wone nogo inom, it mondok porogo logonet, liirogon eerit nugwi paga ineenik aret logogun o.

⁶ Aap ambi nen kwe at mendek korotok kenok wuriyak mage o, yinuk, Naliku ALA an nen aret yagi o.

⁷ Aap ambi nen ogoba enegen taanogo punuk, agalo kagak wuriyak mage o. At agalo ti, ogoba akwe aret me, wuriyak mage o.

⁸ Ndi, aap ambi nen ogoba akwe kwe oregelo ambi wuke kenok, ogoba enegen taanogo punuk, wuriyak me, eeriyak mage mban.

⁹ Aap ambi nen iriluk imbirak ndarak ilik, kwe ambi aap alik nen apuluk ndarogo pemenggerak me, kwe nogo wulaga ti ogoba wagangge kenok a, ti imbirak iriwi aret me, wurinaburak mage o.

¹⁰ Aap ambi nen ombooluk aap apuluk a, ombooluk kolaga aagaluk a, wurinake kenok, at paga wiganak inendage maluk age logokwak, wurinaburak mage o.

¹¹ Aap ambi ogoba akwe kwe ore ambi aagaluk kolaga ndaremenggerak nogo ti, at iriluk aret me, wuriyak mage o.

¹² Aap ambi nen at ogoba iriwi ti, ombakelomini aret me, wurinaburak mage o.

¹³ Ndi, at nen at agalo awurilogwe komologwe kenok ti, at agalominilogwe aret me, wurinaburak mage mban.

¹⁴ Aap ambi ogoba awuluk akwe ti, at agalo aret me, wuke kenok, ogobaluk maluk eerogo puurak me, wuriyak mage o.

¹⁵ Aap ambi apuluk akwe ti, apuluk akwe aret me, kolaga ti ogoba nen wuriyak mage o.

¹⁶ Aap ambi nen oweeluk a, awuluk a, akwe wuke kenok ti, maluk eerogo pukwak me, wuriyak mage o.

¹⁷ Kwe ambi aagaluk kolaga ndarak me, aap ambi nen wagangge logomenggerik, aagaluk-agalo imbirak wurinaburak mage o. Ndi, kwe ti aagalogwe wulaga apuluk ilik, kolaga aagaluk a, nogo ti, at ombowologwe aret me, wurinake kenok ti, mbabi aret eeriyak me, wurinaburak mage o.

¹⁸ Aap ambi akweegelo eenik wonage kagak, akwe nogo awuluk wagangge logomenggerik, wuriyak mage o.

¹⁹ Kwe ambi tut awo kage kenok, eebe maluk aremenggerak wonage me, wuriyak mage o.

²⁰ Aap ambi nen at inom menggerak akwe wuke kenok, at eebe maluk eekkolookwak me, wuriyak mage o.

²¹ Naliku ALA an aret me, inogoba Ala an nendage miyuk-meya eerogo panukwak, kugi Molok ayuk wuko logonet, at ake warogo kani kunuwak nduk, inapurilogwe wogoriyak mage o.

²² Aap mban-mban wut-wut yogwe kenok ti, an Ala neebi lombok mbake minggirak me, kumi wurinako mengga kwak, aap mban-mban wut-wut yuurak mage o.

²³ Aap eebe maluk eekkolookwak, nggeewo a, wam a, wurinaburak mage o. Ndi, kumi kunduk, nggeewo a, wam a, Wu'ninabuwak, mba'nuk inowagam nogwe kenok ti, eekulik maluk mendek kagak eeriyak me, inowagam noorak mage mban.

²⁴ Eekwi ti mendek ti, it o wogoraawam yi aakumi ndi aakumi an mugogo wumbiyaminggirak nogome nen eeko logonet, maluk eekkologogwaarak me, it Iterali mendek togop eeko logogwaarik o.

²⁵ Maluk lombok eerit nugwi paga ineebe inom, inanggween inom, ti maluk agagerak me, maluk eekwi onggo inoba kwippiinet nage neenok, peyak wuko mengga kwak, inanggween nen peyak wurogo mbo piyareegerak.

^26-27 It maluk eekwi nogo an neebi lombok mbake minggirak ti, it logowam time unggwi naga'lek iigak, it aakumi ti mendek eerit nugwi paga inanggween maluk agagerak me, it Iterali mendek ndarak inom, it aap nggiru inom wonogwe inom, it eekwi ti mendek ambi eeko logorak mage o. Ata, an nen wone lengganogo yorage inom, eeko logorak wone yorage inom, mondok porogo logonet, eerit nogo logowak o.

²⁸ An yorage liirogon eeka'lek iinok, inanggween maluk aret aremenggerak me, it logowam nogome unggwaga'lek iigak, yi aakumi ndi aakumi inanggween nen peyak wurogo mbo piyareegerak nogo kwak, nggween ti nen it Iterali togop aret peyak wurogo mbo piyaagin o.

²⁹ Aap ambi nen yi mendek ndi mendek an neebi mbake minggirak eeke ti, oreewi inenggela'me nen enggaawak lek eerogo pogo logowak o.

³⁰ Naliku inogoba Ala an aret me, it logowam unggwi naga'lek iigak, yi aakumi ndi aakumi time mendek nen yi mendek ndi mendek an neebi mbake minggirak eekulik mendek eerit nugwi nogo, it Iterali eerit namenggaarak paga maluk eeginabukwak, an nen wone it yorage nogo mondok porogo logonet, eerit nogo logowak, yegerak, yoret o,” yinuk, yoreegerak.