Ala Unde 16 - Ala Wone Peenok Peebi Mbanak

Inomaluk mbo punuk, ALA inom lambunuwok nduk, ake warogo ale'nggen eeko logorak wone

¹ Aap Karun apuri wologwe mbere nogo Aliku ALA owagam wogwe iinok, Ala nen inooreegerak kanggo mbareegwa, at Aliku ALA nen Muta yoge logonet,

² “An ninom lambungge minggim naloobut mbanak abit narak irimbaga ndugwi enggela'me nen an neebe nigiige minggirak me, yum tugunik endekem nggwe kagak naloobut mbanak an ninom lambungge minggim o mage lombok menggim nogome kat kowe Karun ugun unggwi wage kenok, kambukwak me, ugun unggwi woroorak mage, yoru o.

³ At Karun nen o mage lombok menggim time unggwage logonet kenok, inomaluk lek eerogo piyaawak nduk, warogo Naliku ALA nake wo'niriyak tapi ngguunok awooluk wagangge, an Ala nake warogo kani kuniyak ndomba ngguunok ambi wagangge, ee'nuk mban unggwage logowak o.

⁴ It aap an neebe unde inayum nogo ti, abu leenak mage me, yirikkolaga'lek logonet, at eebe ngguu'mo wake logomenggerik, aap an neebe unde inayum yawenak amuni mbanak yiko menggaarak mendek ayum agi akem nggorek nogo mendek yirikkolage, ayum ogu akem mendek yirikkolage, agabee'le obate paga nggerenggolage, anobak paga yum perenogo pake, eeke logomenggerik,

⁵ it aakumi Iterali inomaluk mbo puwak nduk an Ala nake wo'niriyak kambin ngguunok mbere inom, an Ala nake warogo kani kuniyak ndomba ngguunok ambi inom, wonok wogwe iinok wagangge,

⁶ ndi, at inom, at akwe-apuri inom, inomaluk lek eerogo piinok, an ninom lambunik logorak nggami aanggo wakwi negen ake tapi ngguunok warogo an Ala wo'niriyak nogo wagangge, eeruwak o.

⁷ Eeke logomenggerik, Naliku ALA nenggaanom paga ninom lambungge minggim nawooliya wurik tungga'nggi paga taati pi woraanuk,

⁸ kambin mbere nogo ambi Naliku ALA nake kin kage, ambi inomaluk oba punuk karume nappuurak ake kin kage, eeke kaawak nduk, yugum anggen mbere waganogo kambin inowagam nappege logomenggerik,

⁹ yugum ambi Naliku ALA nendage kunik nogo kambin ambi owagam wambemenggerak nogo Karun nen wonok aakumi inomaluk lek eerogo piyaawak nduk warogo an Ala wo'nege,

¹⁰ ndi, yugum ore kambin karume nappuurak owagam wambemenggerak nogo inomaluk lek eerogo piinok, an ninom lambunikit nduk, nggami aanggo wako mengga kwak, wonok wage logomenggerik, eenik kagak, Yi Kaliku ALA kake o, yinuk, inomaluk nogo oba lenggenogo punuk, o karume time nege logowak nduk nappege, eeruwak o.

¹¹ Ti eeppunuk, at Karun akwe-apuri inom inomaluk lek eerogo piinok, an ninom lambunikit nduk nggami aanggo wakwi kwak warogo wo'niriyak tapi ngguunok nogo, at Karun omaluk lombok lek eerogo puwak nduk warogo pege logomenggerik,

¹² kaninggen ndoongga woppunuk, kaninggen Naliku ALA nenggaanom paga nake kani kunggo menggam wonage nogo yagabit eerogo ndoongge, kani kunggwi iinok, obari abe kaga nogo mendek abu obeelom wun negen yigirik ne mbere paga eenggime wagangge, ee'nuk, wonok yum tugunik kagak aken nggwe mage lombok menggim time unggwage logomenggerik,

¹³ noone yugu liiru mbanak ninom lambungge minggim abit nobarak menggerak ti, enegen kenok kambukwak me, ka'luk nen nobaruwak nduk, obari obeelom mendek ti, Naliku ALA nenggaanom paga taati kani kunuwak o.

¹⁴ Kani kumbunuk, at Karun nen tapi ngguunok amiya ti, ando eenggi paga woppunuk, ninom lambungge minggim abit nobarak enaame irimbaga werenogo pege, ti'nuk, abit narak enaame time ne 7 paga werenogo pege, eeruwak o.

¹⁵ Ti eeppege logomenggerik, it aakumi Iterali mendek inomaluk lek eerogo piyaawak nduk, an Ala wo'niriyak kambin ngguunok nogo warogo punuk, amiya wonok yum tugunik kagak aken nggwe mage lombok menggim time pi unggunuk, tapi amiya werenogo pit namenggerak nogo ndak-ndak kambin amiya nogo an ninom lambungge minggim abit nobarak paga inom, enaame paga inom, werenogo pit nage logowak o.

¹⁶ Ti eeko logorak nogo ti, it aakumi Iterali mendek nen mage yugu kagak taganogo pugwi, an Ala yoragagirak kagak, Eeriyak nineebi, mbakwi, yi maluk ndi maluk eeremenggaarak abok aret mage lombok menggim paga maluk eerogo pogo logomenggaarak nogo lek eerogo piinok, an ninom lambunik logokit nduk, nggami aanggo wakwi negen eeko logorak nogo ti aret. Ndi, an ninom lambungge minggim nawooliya wurik nogo paga maluk eerogo pugwi iinok kunduk lek aruwak nduk, togop mban aret eeko logowak o.

¹⁷ At Karun nen o mage lombok menggim yime unggwi wage logomenggerik, at inom, akwe-apurilogwe inom, it aakumi Iterali kuwak aago nogo inom, abok aret inomaluk lek eerogo piinok, an ninom lambunik logokit nduk, nggami aanggo wako mengga kwak, warogo amiya werenogo punuk, wundi naga'lek kagak, an ninom lambuni wage minggim nawooliya wurik me time aakumi ambi logorak abu mage o.

^18-19 At Karun nogo akem time abu eeppunuk, wundi nage logomenggerik, it aakumi Iterali maluk eeko logonet, an nake kani kunggo menggam Naliku ALA nenggaanom paga wonage maluk eerogo pemenggaarak nogo lek eerogo punuk, an nake pugwi nogo waakit nduk, leenogo pege logonet, tapi ngguunok nogo inom, kambin nogo inom, inamiya eenggi paga woppunuk, an nake kani kunggo menggam owak mippugu irip-irip to ari wonage nogo paga abok aret labunogo pit nage, ndi eebe paga ne 7 paga werenogo pege, eeke logowak, yegerak, yoru o,” yinuk, yoreegerak.

Aakumi inomaluk kambin oba punuk, nappuurak wone

²⁰ Yoge nagagerik, wone ambinom Karun yoruwak nduk, Muta yoge logonet, “At Karun nen an Ala ninom lambungge minggim nawooliya wurik me inom, mage lombok menggim inom, nake kani kunggo menggam inom, abok aret maluk aremenggerak nogo an Ala nen abe kaakit nduk, nake leenogo pege logomenggerik, kambin eenik leenak nogo waganogo pi woraanuk,

²¹ eenggi imbirak waganogo kambin eenik wonage nogo anobak paga lumbunuk, it aakumi Iterali mendek maluk eeko logomenggaarak inom, mage yugu kagak taganogo punuk eeko logomenggaarak inom, inake inomaluk abok aret paganogo kambin nogo oba pege logomenggerik, aap ambi leenogo pugu nogo nen kambin nogo teerogo karume time pi nawak nduk, wogoruwak o.

²² Wogoge kenok, it aakumi Iterali mendek inomaluk nogo abok aret kambin nogo nen piyaninuk, aakumi lek me karume time wondet agago mbo puwak nduk, kambin ti wonok karume time pi nawak o.

²³ Ti abu aret eeke logomenggerik, at Karun nogo an ninom lambungge minggim nawooliya wurik me time unggunuk, yum yawenak amuni mbanak it aap an neebe unde nen yiko menggaarak mendek yirippunuk, o mage lombok menggim unggwage logomenggerak nogo abok aret nggoorogo time mban puwak o.

²⁴ Nggoorogo punuk, ngguu'mo wako logowam ake aago me time ngguu'mo wappunuk, at ayum yirik menggerak nogo yikko'nok endekem wundi woraanuk, at inom, it aakumi Iterali mendek inom, inomaluk lek eerogo piinok, an ninom lambunikit nduk, nggami aanggo wako mengga kwak nake warak nogo, at ake inom, aakumi Iterali mendek inake inom, waganogo an Ala nake kani kunuwak o.

²⁵ Ndi, inomaluk lek eerogo piyoorak ake warak amok nogo ti, wonok an Ala nake kani kunggo menggam time kani kunuwak o.

²⁶ Ndi, aap kambin wonok karume time nappi namenggerak nogo wage logomenggerik, ayum yirik logomenggerak nogo yi paga kooke, eebe ngguu'mo wake, eeppunuk nen aakumi inawooliya oore'nggam unggwi wage logowak o.

²⁷ Ndi, tapi ngguunok inom, kambin ngguunok inom, inomaluk lek eerogo punuk ninom lambunikit nduk, nggami aanggo wakwi kwak warogo punuk, amiya wonok mage lombok menggim unggwi woramenggerak nogo agabolo inom, enggaanggum inom, aanagale inom, abok aret wonok endekem kani kuni wunduwak o.

²⁸ Kani kungge logomenggerik, ayum yirik logomenggerak yi paga kooke, eebe ngguu'mo wake, eeppunuk nen aakumi inawooliya oore'nggam unggwi wage logowak o.

^29-30 Wone ambi mondok-mondok eeko logorak nogo yi o. Naliku an ALA nen kinomaluk abu lek eerogo punuk nake nggomoorak wonogwe kiyaakit nduk, tut 7 penenak tanggal 10 yi paga kit Iterali mendek kinomaluk apit aret lek eerogo pinaganuk, an ninom lambunikit nduk, nggami aanggo wakwi kwak kineebe an nake nggomoorogo pinagarak me, tut 7 penenak tanggal 10 ti paga ari wage kenok, kit aakumi Iterali mendek inom, aakumi nggiru kinenggela'me menggaarak inom, kit abok nen yi eekak ndi eekak eeka'lek kinambe mage negen mbi nengga'lek puk logomunggup o.

³¹ Tut 7 penenak tanggal 10 nogo ti, kit mondok-mondok aberak logomunggup nduk, an nake leenogo pateegirak me, yi eekak ndi eekak eeka'lek we puk tat yonggonggologo logomunggup o.

^32-33 Aap ogoba obaane'me aap an neebe unde inowe logowak nduk, amburu kilippunuk, an nake leenogo mippemenggaarak nogo nen mban it aap neebe unde nen yum yawenak amuni mbanak yiko menggaarak alik ake leenak nogo mendek yippunuk, mage lombok menggim inom, an ninom lambungge minggim nawooliya wurik me inom, nake kani kunggo menggam inom, it aap an neebe unde menggaarak inom, it aakumi Iterali abok kuwak aago nogo inom, abok aret maluk inoba lenggenak wonogwe nogo lek eerogo punuk, obeelom wonogwe iyaakit nduk, nake nggomoorogo piige logorak nogo ti, aap ti nen aret eeke logowak o.

³⁴ Ti eeko logorak nogo ti, it aakumi Iterali mendek inomaluk abok aret lek eerogo piinok, an ninom lambunikit nduk, tahun ambit paga ne ambit mban eeko logowak o. Wone yi nogo ti, mondok-mondok eeko logomunggup nduk, yokkiragi o,” yinuk, yoreegerak. Yoge mbareegi, at Muta nogo at Aliku ALA nen yoreegerak nogo abok aret Karun yoge mbareegi, Karun nen ndak-ndak aret eereegerak.