Ala Unde 13 - Ala Wone Peenok Peebi Mbanak

Inawin aaga'ne inoba age kenok, eeko logorak wone

¹ At Aliku ALA nen Muta Karun imbirak yorage logonet,

² “Aap ambi oba piike, agabolo paga piirik-kunik eeke, agabolo paga ndoongga negen eeke, eeke wonage kenok ti, Awin aaga'ne oba age logonet, eekerak kwa? yinuk, an neebe unde Karun ilik, at apuri wigannarit nogo logogun nogo mendek ambi a, inowagam pi wogo logowak o.

³ Pi wogwe iinok, aap an neebe unde nogo nen awin oba wonage nogo maloppege logomenggerik, awin wonage me taa'nogo omoori yanggwi negen eerogo pege, ndi, inikime kanu yi unggwage, eeremenggerak kage kenok ti, Awin aaga'ne agaarak kagi, mba'nuk, aap nogo yoge logonet, Kat keebe ogole warak abu maluk agandak o, yinuk, yoruwak o.

⁴ Ndi, agabolo paga we yanggwi negen kila ari logonet, inikime kanu yi unggwi noolik, awin wonage me taa'nogo omoori tari wonage lek abe wonage enegen kage logomenggerik kenok, aap an neebe unde nogo nen ne 7 paga alik logowak nduk, awi wurogo puwak o.

⁵ Ne 7 abu aret ari nage kenok, aap an neebe unde nen aap nogo ambinom pekkage logomenggerik, awin nogo agabolo paga wiganinuk naga'lek itok mban wonage kage kenok, ne 7 ambinom alik logowak nduk, o wonagam nogome aret puwak o.

⁶ Ne 6 logonuk, ko'lu paga aap an neebe unde nogo nen ne ambi pekkage logomenggerik, aap awin nogo agabolo paga ambinom wiganinuk naga'lek we agabolo paga piirik-kunik eerak mban wonage kage logomenggerik, aap nogo yoge, Keebe abu obeelom agandak o, yoge kenok, ayum niyo paga kookkolage logomenggerik, eebe obeelom aret nege logowak o.

⁷ Ndi, togop yoremenggerak kwe, agabolo paga piirik-kunik eerak nogo abunuk agabolo paga wiganinuk nage kenok, aap an neebe unde nogo nen ambinom pekkaawak nduk, owagam woraawak o.

⁸ Wage kenok, pekkage logonet, agabolo paga piirik-kunik aago nogo eebe paga wiganinuk namenggerak kage kenok, Awin nogo aaga'ne aret agaarak kagi, mbake logomenggerik, aap nogo yoge logonet, Keebe ogole warak abu maluk aret agandak o, yinuk, yoruwak o.

⁹ Aap ambi awin aaga'ne wonage kenok wonok, aap an neebe unde inowagam pi wogo logowak o.

¹⁰ Pi wogwe iinok, aap an neebe unde nen pekkage logomenggerik, agabolo paga piirik ti laambu lombok logonet omoori tari kunogo pege, ndi, awin piirik nogo amiya tiimbo eeke, eeke wonage kage logomenggerik kenok,

¹¹ awin aaga'ne ti lek ariyak lek mondok itok kunik aret logogin me, aap an neebe unde nen aap nogo yoge, Kat keebe ogole warak abu maluk aret agandak o, yo'nuk, at eebe muk ogole warak maluk aret aremenggerak me, awi alik wurogo puurak lek, we teppuurak o.

¹² Ndi, aap an neebe unde nen, Aap awin nogo anobak paga nen nugwa iyok kuli agabolo paga apit aret wiganinuk nagaarak kwa? mba'nuk,

¹³ liirogon pekkage logomenggerik, agabolo paga ndoongga mbogok kere eerogo pit namenggerak kage kenok, Kawin yi abu laambu yanggwi negen wonage me, keebe obeelom aret wonage o, yinuk, yoruwak o.

¹⁴ Ndi, awin nogo amiya tiimbo eeke wonage kenok perak, Eebe ogole warak oba maluk aret agaarak, mbaruwak o.

¹⁵ Aap an neebe unde nen awin amiya tiimbo eeke wonage kage logomenggerik kenok, Amiya tiimbo eeke wonage yi, awin aaga'ne aret kagi, mba'nuk, aap nogo yoge, Keebe ogole warak abu maluk agandak o, yinuk, yoruwak o.

¹⁶ Ndi, awin amiya tiimbo eeke nogo lek age logomenggerik, yanggwi negen kunogo pemenggerak wonage kenok, aap an neebe unde inowagam woraawak o.

¹⁷ Wage kenok, aap an neebe unde nen pekkage logomenggerik, awin amiya nogo lek a'nuk, obaane'me yanggwi negen kunik wonage kenok, aap awin aaga'ne nogo yoge, Keebe abu aret obeelom agandak o, yinuk, yoruwak o.

¹⁸ Aap ambi agabolo paga kumbi piirik logomenggerak lek aremenggerak

¹⁹ obaane'me kumbi laambu lombok piike ilik, ane'nep ambik lombok eeke logonet, yanggwi negen eerogo pege a, eeke kenok, aap an neebe unde nen pekkaawak nduk, inowagam woraawak o.

²⁰ Wage kenok, an neebe unde nen pekkage logomenggerik, awin wonagam obaane'me ane'nep eeke nogo agabolo paga nen inikime kanu yi unggwage, awin wonage me taa'nogo omoori yanggwi negen kunogo pege, eeremenggerak kage kenok, kumbi piirik nogo awin aaga'ne aret agaarak me, aap nogo yoge, Kat keebe ogole warak abu maluk aret agandak o, yinuk, yoruwak o.

²¹ Ndi, aap an neebe unde nen awin piirik nogo pekkamenggerak kwe, awin wonage me taa'nogo omoori yanggwi negen eerogo pega'lek kage, ndi, inikime kanu yi unggwaga'lek agabolo obeelom negen agaarak kage, eeke logomenggerik, aap nogo ne 7 paga alik logowak nduk, awi alik wurogo puwak o.

²² Ndi, awin nogo agabolo paga wiganinuk nage kage kenok, awin aaga'ne aret me, aap nogo yoge, Kat keebe ogole warak abu maluk aret agandak o, yinuk, yoruwak o.

²³ Ndi, awin nogo wiganinuk naga'lek itok togo'nogo mban aret wonage kage kenok, Awin wonagam obaane'me we aret ndoongga mbogok kere eerogo pegerak, mba'nuk, aap nogo yoge, Keebe obeelom aret wonage o, yinuk, yoruwak o.

²⁴ Ndi, aap ambi kani namenggerak paga awin ti'mondok eeke logomenggerik, amiya tiimbo eeke logonet, amok kila eerogo pemenggerak kenok,

²⁵ aap an neebe unde nen pekkage logomenggerik, awin kunik me taa'nogo omoori yanggwi negen kunogo pege, awin nogo agabolo paga nen inikime kanu yi unggwage, eerak wonage kenok, Kani nenggerak ti paga nen awin aaga'ne aret agaarak kagi, mba'nuk, aap nogo yoge, Kawin aaga'ne agaarak me, keebe ogole warak abu maluk aret agandak o, yinuk, yoruwak o.

²⁶ Ndi, awin wonage me taa'nogo omoori yanggwi negen kunogo pega'lek kage, ndi, inikime kanu yi unggwaga'lek agabolo obeelom negen agaarak kage, eeke kenok, aap nogo ne 7 paga alik logowak nen awi alik wurogo puwak o.

²⁷ Ne 6 logomenggerik, ko'lu paga aap an neebe unde nen pekkenok, awin nogo agabolo paga wiganinuk namenggerak kage kenok, Awin aaga'ne aret agaarak, mba'nuk, aap nogo yoge, Kat keebe ogole warak abu maluk aret agandak o, yinuk, yoruwak o.

²⁸ Ndi, awin nogo agabolo paga wiganinuk naga'lek kani namenggim nogome mbuk eerit unggwage negen eeke kenok ti, aap an neebe unde nen, Kani nenggerak obaane'me ndoongga mbogok kere eerogo pege logonet we piikerak kagi, mba'nuk, aap nogo yoge, Kat keebe obeelom aret wonage o, yinuk, yoruwak o.

²⁹ Aap ambi ilik, kwe ambi a, awin anobak paga ilik, ondogowak paga a, kunemenggerak wonage kenok,

³⁰ aap an neebe unde nen pekkage logomenggerik, awin wonage me taa'nogo omoori tari wuyo eerogo pege, inikime kanu yi unggwage, eeremenggerak kage kenok ti, anobak paga a, ondogowak paga a, Yigani pege nagaarik, awin aaga'ne aret agaarak kagi, mba'nuk, aap nogo yoge, Kat keebe ogole warak abu maluk aret agandak o, yinuk, yoruwak o.

³¹ Ndi, awin nogo inikime kanu yi unggwage, eeruwak mili wonage, eerak lek kage logomenggerik kenok perak, aap nogo ne 7 paga alik logowak nduk, awi wurogo puwak o.

³² Ne 6 logomenggerik, ko'lu paga aap an neebe unde nen pekkaanuk, yigani pemenggerak nogo agabolo paga wiganinuk nage, eeruwak tari negen kunogo pege, ndi, inikime kanu yi unggwage, eeka'lek op aret wonage kenok,

³³ aap nogo yigani pugu wonage me taa'nogo eeruwak mbangga'lek teppege logomenggerik, eeruwak ando nogo apit aret mbanogo punuk, ne 7 paga ambinom alik logowak nduk, awi alik wonagam nogome puwak o.

³⁴ Ne 6 logomenggerik, ko'lu paga aap an neebe unde nen aap yigani pugu nogo agabolo paga pekkaanuk, yigani nogo agabolo paga wigangga'lek itok mban wonage, ndi, inikime kanu yi unggwage, eeka'lek wonage kenok, aap nogo yoge, Kat keebe abu obeelom agandak o, yinuk, yoge kenok, ayum niyo paga kookkolage logomenggerik, eebe obeelom aret nege logowak o.

³⁵ Kat keebe abu obeelom agandak o, yoremenggerak wonage me, yigani pemenggerak nogo agabolo paga wiganinuk namenggerak kenok perak,

³⁶ aap an neebe unde nen pekkaawak nduk, owagam wage kenok, pekkage logomenggerik, aap yi abet aret yigani pegerak nogo wiganinuk namenggerak kenok, Keebe ogole warak abu maluk aret agandak o, yo'nuk, eeruwak tari kero maloppuurak lek o.

³⁷ Togop eeriyak kwe, aap nogo yigani pugu wigangga'lek mbuk arit nage, ndi, awin wonage me eeruwak mili aret wonage, eerak nogo aap an neebe unde nen kage logomenggerik, Yigani pegerak abu aret lek age logonet, eebe obeelom aret agaarak kagi, mba'nuk, aap nogo yoge, Kat keebe abu obeelom aret agandak o, yinuk, yoruwak o.

³⁸ Aap ambi ilik, kwe ambi a, agabolo paga ndoongga mbogok kere eerogo pege kenok,

³⁹ aap an neebe unde nen pekkage logomenggerik, agabolo paga yanggwi negen wonage me nogome mili eerit unggwage kage kenok, We yigani aret eekerak me, obeelom aret arigin, mbaruwak o.

⁴⁰ Aap ambi anobak peenok-peenok abu puluk ko eerogo mbanak wonage kenok ti, eebe maluk lek obeelom aret wonage o.

⁴¹ Ndi, aap ambi enggaawak paga nen anep mbelan koorit nage kenok ti, eebe maluk lek obeelom aret wonage o.

⁴² Togop aret kwe, ne ambi paga enggaawak paga ilik, anobak kookim anobak kirin paga a, awin amiya negen eeke logonet, yanggwi negen eerogo pege kenok ti, awin aaga'ne arikit nduk aret eeke, mbaruwak o.

⁴³ Mba'nuk, aap an neebe unde nen pekkaawak nduk, owagam wage kenok, pekkage logomenggerik, anep mbelan koorak me ilik, enggaawak paga a, awin aaga'ne kunik negen amok kila ari logonet, piirik amiya tiimbo eeke kage kenok ti,

⁴⁴ awin aaga'ne aret agaarak me, Eebe maluk aret agaarak, mba'nuk, aap nogo yoge, Kat keebe ogole warak abu maluk aret agandak o, yinuk, yoruwak o.

⁴⁵ Yoge kenok, aap awin aaga'ne aremenggerak nogo nen ayum nibinik mendek yikkolage, eeruwak piinogo teppege, eeke logomenggerik, etenggen nabeppatinuk ari logonet, An neebe maluk aret agaarak o. Maluk aret agaarak o, yinuk, oone nggwok paga ari logowak o.

⁴⁶ Ndi, aaga'ne aremenggerak nogo lek aga'lek kagak eebe maluk aret me, awooliyana logorak lek endekem time alik aret logowak o,” yinuk, yoragagerak.

Inayum paga ku'lu eerogo pege kenok, eeko logorak wone

^47-49 Yorage nagagerik, Aliku Ala nen wone ambinom Muta Karun imbirak yorage logonet, “Aakumi inayum ndomba eeruwak penggaarak paga ilik, kayin yawenak amuni mbanak penggaarak paga a, we yum tabak ndomba eeruwak yugu paga ilik, ligi yawenak amuni mbanak yugu paga a, ndomba agabolo paga ilik, yi mendek ndi mendek inagabolo paga yugu paga a, ti paga abok aret ku'lu eerogo pit nage logonet, yi mendek ndi mendek nogo paga etenggen mili eerogo pege, maa'ngga kunogo pege, eeremenggerak kenok ti, Ku'lu eerogo pegaarak me, yinuk, aap an neebe unde nen pekkaawak nduk, owagam pi woraawak o.

⁵⁰ Pi wogwe iinok, aap an neebe unde nen yi mendek ndi mendek ku'lu eerogo pemenggerak nogo pekkage logomenggerik, waganogo ne 7 paga o alik me logowak nduk, leenogo puwak o.

⁵¹ Nogo 6 yippunuk, ko'lu paga yi mendek ndi mendek nogo pekkage logomenggerik, ku'lu eerogo pemenggerak nogo aakumi inayum penggaarak inom, yum kayin tabak ligi ndomba eeruwak paga ilik, ligi yawenak amuni mbanak paga a, nogo paga penggaarak inom, yi mendek ndi mendek inagabolo paga yugu nogo inom, nogo paga apit aret endak wa'naremenggerak kenok ti, Ku'lu eerogo pegerak abu maluk mendek me, yum ti, ogole warak aret o, yinuk,

⁵² yi mendek ndi mendek ku'lu eerogo pit namenggerak abu maluk nogo ti, ogole warak lombok me, ambinom ku'lu eerogo pit nookwak, yi mendek ndi mendek eeko menggaarak kagak, tigitogon kani nen nawak nduk, kumbuwak o.

⁵³ Ndi, aap an neebe unde nen yi mendek ndi mendek nogo paga ku'lu eerogo pit noolik kenok,

⁵⁴ niyo paga koorogo puwak nduk, yorage logomenggerik, koorogo pugwi iinok, ne 7 paga ambinom alik pugu wonagam nogome logowak nduk, puwak o.

⁵⁵ Ndi, nogome ne 7 logomenggerik, yum nogo koorogo pugwi iinok, aap an neebe unde nen pekkage logomenggerik, ku'lu eerak nogo paga ambinom arit noolik kwe, etenggen alik lek ndak-ndak wonage kenok ti, Yum nogo paga maluk eerogo ku'lu arit nagaarak kagi, mba'nuk, abeenok mban agaarak ti kagak aret kwe, tigitogon kani nawak nduk, kumbuwak o.

⁵⁶ Ndi, yi mendek ndi mendek ku'lu eerogo pit namenggerak nogo niyo paga koorogo pugwi iinok, aap an neebe unde nen pekkage logomenggerik, ku'lu lek arit namenggerak kage kenok, aakumi inayum penggaarak a, yi mendek ndi mendek inagabolo paga yugu a, kayin tabak penggaarak a, enaani wonage kagak, ku'lu eerogo pemenggim taa'nogo mban nibinogo mbo puwak o.

⁵⁷ Ndi, yi mendek ndi mendek nogo paga ku'lu eerak nogo ambinom arit nage kenok ti, ku'lu aago nogo mendek aret endak wa'nage me, yum nogo tigitogon kani nawak nduk, kumbuwak o.

⁵⁸ Aakumi inayum penggaarak inom, ligi ndomba eeruwak laanak paga kayin tabak ilik, ligi yawenak amuni mbanak paga a, penggaarak inom, yi mendek ndi mendek inagabolo paga yugu nogo inom, nogo paga ku'lu eerogo pit namenggerak koorogo pemenggaarak ku'lu aago nogo, lek aremenggerak kenok, ne ambinom kookwi iinok, abu obeelom aret arigin o,” yinuk, yoragagerak.

⁵⁹ Aakumi inayum ndomba eeruwak penggaarak paga ilik, kayin yawenak amuni mbanak penggaarak paga a, we ligi ndomba eeruwak laanak paga yum tabak yugu ilik, ligi yawenak amuni mbanak yugu paga a, ndomba agabolo paga ilik, yi mendek ndi mendek inagabolo paga yugu paga a, ti paga abok aret ku'lu eerogo pit namenggerak kenok, pekkage logomenggerik, Yi maluk aret agaarak o. Yi obeelom aret agaarak o, yinuk, eeko logorak wone lengganogo yoragagerak nogo ti aret.