Ala Unde 12 - Ala Wone Peenok Peebi Mbanak

Kumi inaagalogwe ndaganakwi iinok, eeko logorak wone

¹ At Aliku ALA nen Muta yoge logonet,

² “It aakumi Iterali yoroorak nogo yi aret. Kwe ambi abila age logomenggerik, aagaluk aap nda'nage kenok, tut kage logonet, eebe maluk negen aago logomenggerak togop nogo aret aremenggerak me, obeelom age kagak, ne 7 aret aruwak o.

³ Nogo 7 yippege logomenggerik, ko'lu ari nage kenok, aagaluk wulaga nogo agabolo mbanuwak o.

⁴ Mbanogo punuk, elege ndake logonet amiya eeremenggerak nogo, nggaruk ari tokkage kagak, ne 33 logorak yugu nogo wonage logonet, nawooliya wurik me unggwi nage, yi mendek ndi mendek nake leenogo pugu nogo mbaanggage, eerugurik o.

⁵ Ndi, at aagaluk kolaga ndake kenok perak, aa'nduk tut kage logonet logomenggaarak togop nogo eebe maluk aago wonage kagak tamban mbere eeruwak o. Ndi, tamban mbere eeppunuk amiya eeremenggerak nogo, nggaruk ari tokkage kagak, ne 66 aret logowak o.

⁶ Wulaga a, kolaga a, nda'nage logonet amiya eeremenggerak nogo, nggaruk ari tokkage kagak, Ne ndogop logorak, yugu nogo abu aret wonage logomenggerik, kwe nogo nen ndomba ndarak kagak tahun ambit eerak ambi warogo nake kani kuniyak nduk wagangge, ndi, towe puume ilik, towe kurona a, omaluk lek eerogo punuk, nimbirak lambuniyak ake ambi wagangge, eeke logomenggerik, wonok an ninom lambungge minggim nawooliya wurik tu unggwogo menggam aap an neebe unde wonage me taa'nogo pi nawak o.

⁷ Pi nage kenok, aap an neebe unde nogo nen kwe aagaluk ndake logonet oba maluk aremenggerak nogo, obeelom aruwak nduk, Naliku ALA nenggaanom paga taati nimbirak lambunik logokit nduk warogo nake puwak o. Nake warogo pege kenok, kwe oba maluk aremenggerak nogo obeelom aret arigin o. Ti eeko logorak nogo ti, kwe ambi nen aagaluk wulaga a, kolaga a, ndake kenok, eekak yuurak wone koonak nogo ti aret.

⁸ Ndi, kwe nogo ndomba paga eeriyak wonage lek kenok ti, towe puume mbere ilik, towe kurona mbere a, pipuk eeppunuk, towe ambi warogo kani kuniyak ake wagangge, ambi omaluk lek eerogo punuk, nimbirak lambuniyak ake wagangge, eeke logomenggerik, wonok aap an neebe unde owagam pi nage kenok, at an neebe unde nen nggami aanggo wakwi kwak, nimbirak lambunik logowak nduk warogo wo'nege kenok, oba maluk aremenggerak nogo obeelom aret arigin, yegerak, yoret o,” yinuk, yoreegerak.