Ala Unde 10 - Ala Wone Peenok Peebi Mbanak

Narap Abiku imbirak inooreegerak wone

¹ At Aliku ALA nen yoraga'lek kagak, ne ambi paga aap Karun apuri Narap Abiku imbirak nen Ala aga'ni nogo paga lek iniki mba'nuk nen inalitak lombok inaga'ninggen ndoongga nogo waganogo kani kunik ndoonggwi, kani kunggwi iinok, obari abe kaga nogo mendek obaga pugwi, ee'nuk, wonok Aliku ALA enggaanom paga ake kani kuni unggwogo mbareegwa,

² Aliku ALA nen kani kunik inoba wuppi wagagerak paga mondok yoguk togon eerogo piige mbareegi, Ala enggaanom awooliya wurik tungga paga taati aret kambeegwaarak.

³ Kanggo mbareegwa, at Muta nen Karun yoge, “At Aliku ALA nen ari logonet, It aakumi abok an ninom kunik logokit nduk, Nowagam wogo logonet kenok, An mondok kikak nakeelik nalik leenak lombok minggirak inigen neegwi, Ndi, it aakumi Iterali mendek abok aret An mondok tiyanak neego logonet, nayuk wukwi, Eeruwak nduk, Eeppiyaagin o, yinuk, yereegerak nogo ti, yogobi eerukwak nduk, yereegerak o.” Ari mbareegi, aap Karun nogo oone ambi yaga'lek puk aret agagerak.

⁴ Puk age mbareegi, at Muta nen Karun ogobaluk Utiyen apuri wologwe Mitayen Elatapan imbirak wiiragagerak wogo mbareegwa, yorage logonet, “Kit kinoreewi kanggaarak Ala awooliya wurik mage menggim tu unggwogo menggam wonogwe yi, wogoren yagat endekem nggwe time piya nanip o.”

⁵ Yorage mbareegi, at Muta nen yoragagerak nogo ndak-ndak aret aap mbere kanggaarak nogo inayum akem agi yirika nggorek nogo mban yirik iigak, wogoren yagat endekem time piya nogogwaarak.

⁶ Piya nogo mbareegwa, at Muta nen Karun inom, apuri Eleyatat Itamat imbirak inom, yorage logonet, “Kit togop aret kanggwi, ndi, Ala apuri kuwak aago Iterali nogo Aliku ALA nen anini inoba piige, eerukwak, aap kanggaarak ti paga kiniki wakkologo logonet, kinabetagi nibinogo pakwi, kineeruwak piinogo teppugwi, eeriyak mage o. Ata, kit kinoreewi aakumi Iterali ti perak, Aliku ALA nen kani paga inookerak ti paga inaleenggu maako logorak op aret o.

⁷ Kit perak, Aliku ALA ake leenak logowak nduk amburu kilirogo piigo mengga kwak amburu kinoba kilippinagagirak wonogwe me, kit kinoorukwak, Ala ninom lambungge menggim awooliya wurik tungga'nggi paga yime mban aret logonip o,” yorage mbareegi, it nogo Muta yoragagerak nogo ndak-ndak aret eereegwaarak.

Aap Ala unde nen amburu kumili aganaka mendek noorak mage wone

⁸ Ti'nuk, at Aliku ALA nen aap Karun nogo yoge logonet,

⁹ “Kat kapurilogwe kinom kinoorukwak, niyo anggur amburu ilik, amburu kumili aganake menggerak nogo mendek a, neenok, an ninom lambungge minggim nawooliya wurik me time unggwi noorak mondok mage o. Wone lengganogo yokkirage yi nogo ti, kapuri-kombowologwe nda'narit nogo logogun kinom mondok eeko logorak wone ti aret.

¹⁰ Kit nen eraambe liippogo logonet, Ambi yi Ala ake eekak yuurak leenak kagi. Ambi yi we ugun eekak yuurak ake kagi. Ambi eeriyak mage aret kagi. Ndi, ambi eeriyak op aret kagi, mba'nuk, liippogo logonip o.

¹¹ It aakumi Iterali ineenu aruwak nduk, Naliku ALA wone lengganogo Muta yoreegirak nogo abok aret kapuri kinom nen aakumi Iterali mendek mamunirogo logomunggup o,” yinuk, yoreegerak.

Ala ake pugu ando aap Ala unde wogorogo logorak wone

¹² Yoge mbareegi, at Muta nen aap Karun inom, at apuri Ala nen ineenik teppiyareegerak Eleyatat Itamat imbirak inom, yorage logonet, “Yi mendek ndi mendek Aliku ALA ake pugu kani kunggo logonet, gandum anggen yigirik inom Ala ake pugwi nogo, ando ndiinnage kenok, abu leenak mage lombok me, piiruwak nduk ragi inom pega'lek kagak, worarogo punuk, ake kani kunggo menggam eraaninu taati nen nonggo logomunggup o.

¹³ Yi mendek ndi mendek at Aliku ALA ake pugu kani kunggo logonet, ando ndiinnage kenok ti, Aap an neebe unde wogorage logowak o, yinuk, Ala nen yo'nireegerak nogo ndak-ndak kat kapuri kinom kinamendek aret me, waganogo o alik leenak lombok menggim time nen mban nonggo logomunggup o.

¹⁴ Ti aret kwe, aakumi Iterali nen Ala inom lambunik logowak nduk ake warogo wogogwi ape uruwak inom, aawi kinik inom, Yi Kaliku ALA kake o, yinuk, titik eerogo punuk, pugwi nogo ti, kat kapuri wologwe-komologwe kinom nonggo logomunggup nduk, koonogo pugu aret me, o ti nenggak yuurak nduk, leenogo pugume nogome nen mban nonggo logomunggup o.

¹⁵ Amok leenak kani kuniyak wonok wogo logonet, aawi kinik Ala ake puurak nogo inom, ape uruwak Ala kaawak nduk, titik iriyak nogo inom, lambumbunuk wonok wogo logomenggaarik, amok kani kumbunuk, aawi kinik inom, ape uruwak inom, Yi Kaliku ALA kake o, yinuk, titik nugu logomenggaarik, Aap an neebe unde wogorogo logowak o, yinuk, Aliku ALA nen yereegerak nogo ndak-ndak aawi inom, ape uruwak inom, Ala titik ogo logomonggotik, nonggo logomunggup o.”

¹⁶ Yorage nagagerik, at Muta nen inomaluk lek eerogo piyoorak nduk, warogo Ala ake wogoriyak kambin ngguunok nogo kwaareegerak mendek, kambin nogo muk kani kuneegwaarak mbareegi, Karun apuri Eleyatat Itamat imbirak inoorulik teppiyareegerak nogo mberirage logonet,

¹⁷ “Ake pugu ti, it aakumi Iterali mendek inomaluk lek eerogo piinok, Aliku ALA inom lambunik logowak nduk, nggami aanggo wakwi kwak warogo at ake pugu abu mage lombok me, yinuk, wokkiragaarak kagak, nanonduk kit nen inomaluk lek eeppiyoorak kambin ti, Ala awooliya wurik oonggu'me yime nen noolik, kani kumbogotak?

¹⁸ Kambin amiya ti, Ala awooliya wurik mage menggim yime wonok ungguulik me, an yokkiragarak ndak-ndak kit nen Ala awooliya wurik mage menggim yime nen noorak me eekotak o.”

¹⁹ Yoge mbareegi, Karun nen Muta yoge, “Ne yi paga aakumi Iterali inomaluk lek eerogo puwak nduk Aliku ALA ake warogo wogogwi, ake warogo kani kunggwi, eekaarak nogo ti op eekaarak kagak kwe, eeriyak kagak, an alik eekirak yi, koongga'lek neegak, ake pugu yi nanetak nen, Aliku ALA inikilom nomba'netak mbaken?”

²⁰ Yoge mbareegi, Muta nen wone ti konengge nagagerik, “Op aret yigi,” mba'nuk, puk agagerak.