Ala Unde 1 - Ala Wone Peenok Peebi Mbanak

ALA UNDE WONE

Ala ake warogo kani kunggo logorak yoreegerak wone

¹ At Aliku ALA nogo inom lambungge menggim awooliya wurik me nogome nen at Muta wiige nagagerik, yoge logonet,

² “It aakumi Iterali yoroorak nogo yi o. It Iterali mendek ambi nen Naliku ALA nake warogo wo'niriyak mbakwi kenok ti, inaanggumi lembu-tapi ilik, kambin-ndomba a, an nake aret wo'niri wogo logowak o.

³ It ambi nen an nake tapi ambi warogo kani kuni woroorak mbakwi kenok ti, Naliku ALA niniki ale'nggen nen waakit nduk, tapi ngguunok awinde-obaande eerak lek amuni mbanak kenok mban wonok ninom lambungge menggim nawooliya wurik tu unggwogo menggam pi wogo logowak o.

⁴ Pi wogwe iinok, an nen inomaluk lek eerogo punuk, ninom lambunik logokit nduk, it aap ti ineenggi tapi nogo anobak pippunuk logonet, nggami aanggo wako mengga kwak,

⁵ Naliku ALA nenggaanom paga warogo pugwi iinok, an neebe unde Karun apuri nen tapi amiya nogo waganogo nawooliya wurik tu unggwogwe me, kani kunggo menggam irip aru-ogwe, ambe agi-ogu, eyo nabenak paga abok aret werenogo pit nogo logowak o.

⁶ Werenogo pit nogwe iinok, it aap nogo nen tapi nake warogo kani kuniyak nogo agabolo mbelanogo punuk, eebe liirogon aret mbanogo pogo logowak o.

⁷ Mbanogo pugwi iinok, it aap an neebe unde Karun apuri nogo nen kani kunggo menggam nogome kani ndoonogo pogo logomenggaarik, kani wuninogo punuk,

⁸ kani kuniyak tapi mbanak amok inom, anobak inom, abu koonogo punuk, kani awo wunuk ari me, taati pugwi iinok,

⁹ it inaanggo unde nen aanagale inom, aawi inom, niyo paga kookwi iinok, it an neebe unde nogo nen yeregerak-peregerak abok aret waganogo kani nengge me nogome nippogo logowak o. Ti eeko logorak nogo ti, Naliku ALA nake kani kunemenggaarak obari abe kage logonet, nale'nggen kaakit nduk, nake warogo kani kunggo logorak nogo ti aret.

¹⁰ Ndi, it ambi nen inaanggumi kambin a, ndomba a, an nake warogo kani kuniyak mbakwi kenok ti, ngguunok awinde-obaande eerak lek amuni mbanak kenok mban wonok,

¹¹ kani kunggo menggam o omarip paga pa'nggwe Naliku ALA nenggaanom taati aret warogo pugwi iinok, it aap an neebe unde Karun apuri nogo nen amiya nogo waganogo kani kunggo menggam irip aru-ogwe, ambe agi-ogu, eyo nabenak paga abok aret werenogo pit nogo logowak o.

¹² Werenogo pit nogwe iinok, it inaanggo unde nogo nen eebe mbanogo pugwi iinok, aap an neebe unde nogo nen mbanak nogo inom, anobak inom, amok inom, kani kunggo menggam kani mbelaarak awo wunuk ari me taa'nogo mot-mot mbiginogo pogo logowak o.

¹³ Ndi, it inaanggo unde nen aanagale inom, aawi inom, niyo paga koorogo pugwi iinok, aap an neebe unde nen mbanak nogo abok aret waganogo kani nengge me nogome nippogo logowak o. Ti eeko logorak nogo ti, Naliku ALA nake kani kunemenggaarak obari abe kage logonet, nale'nggen kaakit nduk, nake warogo kani kunggo logorak nogo ti aret.

¹⁴ Ndi, it ambi nen towe Naliku ALA nake warogo kani kuniyak mbakwi kenok ti, towe puume ilik, towe kurona a, an nake pogo logowak o.

¹⁵ Pugwi iinok, aap an neebe unde nen wonok kani kunggo menggam pi wage logomenggerik, enggaanok nombonogo wappunuk, eebe kani kunuwak nduk, amiya nogo kani kunggo menggam eyo nabenak nogo paga kilirogo nappit nage,

¹⁶ kumunuk inom, eeruwak inom, waganogo kani kunggo menggam eeben abeenok oonegen lagi wage menggim pa'nggwe eraaninu wun pogo menggam time mbo pi nage,

¹⁷ ndi, towe a'naabit kundugu kagak amik mban meyanogo enaani aret kani kunggo menggam kani wunuk ari me time aret kumbege, eeko logowak o. Ti eeko logorak nogo ti, Naliku ALA nake kani kunemenggaarak obari abe kage logonet, nale'nggen kaakit nduk, nake warogo kani kunggo logorak nogo ti aret, yegerak, yoret o,” yinuk, yoreegerak.