Abakuk 2 - Ala Wone Peenok Peebi Mbanak

¹ An nggayo wurik paga o tum wake minggim lagi nage, O pak wurik irimbaga unggut-unggut yerek-nggorek wurik nogome nu'lek mi'nari lagangge, Eeke logominggirik, “At Ala nen wone ngge yo'nege kaamun?” yinuk, tokkage, “At Ala eeke yi, neebi o,” yinuk, “Ala yogirak nogo onggo yo'nege kenok, an nonggop yi?” yinuk, koongge, Eerigin o.

Ala nen onggo yoreegerak wone

² Ari mbareegi, at Aliku ALA nen an onggo yo'nege logonet, “At liiru mbanak lunemenggerak nogo nen aakumi yoranet nage logowak nduk, kat kabinggaanggo kagandak nogo liiru mbanogo pege, Aakumi nen malenggo logowak nduk, yugum tabak paga kin paga ayo waganogo pege, Eeru o.

³ Kabinggaanggo kagandak ti, eeriyak eyom koonak nogo awo ari waga'lek kwe, Woraagin nogo ti, pilit lek abet aret woraagin o. Eeri woroorak nogo puk arigin lek abet aret woraagin me, Elaambirik woraagin, mbarugun o. Ata, kagak tokkage logot o.

⁴ Ndi, wone eebe liiru mbaniyak nogo yi aret. It aap iniki koonak lek nggolawe nogo iniki wogoppako menggaarak kwe, It aap iniki abe koonak nogo perak, abet mbakwi ti paga ineenik aret logogun o,” yinuk, an yo'negerak o.

It aap maluk eeka pulunogo piyareegerak wone

⁵ “Aap eenggi warak eekko'net nage ti paga ambokan laganggolage, Aap iniki wogoppatit nega nogo, iniki teberogon wonaga'lek yi paga ndi paga mban koonit nege, Eeke menggerak o. Kambunuk nogo menggam nen, Abu aret waga o, mbaka'lek, Ambinom woraayok, mbake menggi kwak, At aap ti nen, Abu aret tebenggolagi, mbaka'lek ambinom tebenggolaakit, mban mbarit nege, Kanggo menggam nen, Abu ndonggoppanigi, mbaka'lek ambe a aago mban menggi kwak, at togop aret mbarit nege, Eeke logonet, Yi aakumi ndi aakumi at wonage me mban kuwak eerogo piya wage, Aakumi inanebunu lombok keele maageren abu'me piya wage, Eeke menggerak.

⁶ It aakumi at owagam kuwak eerogo piyamenggerak nogo nen at meek eerogo pugwi, agi'ndok kanggwi, eerugun nogo lek a? Eeko logonet, At aap at amendek lek aakumi inamendek kuwak eerogo pati wage, Aakumi inamendek kolaakit nduk, oone omaawi yorage paga eenggi warak eekkolage, Eeke nogo, abuwa o! Ti eeke kagak, ne mande ari nagin o?

⁷ It aap inamendek kolamenggerak nogo nen pilak yogwe, At ndogop eeppinanege yi, nineebi a, yinuk, mi'na'nuk, aganak wake logowak nduk, eeppugwi, Eerugun nogo lek a? Eeko logonet, at maluk eerogo punuk, amendek ndinggolaagun aret o.

⁸ At nen aakumi inamiya wunake, Inanggween inom, inawi kota-kota inom, maluk eerogo pege, It o kota-kota wonogwe nogo inoorogo piinet nage, Eeke logonet, Aakumi inanebunu lombok ambik aret inagugun wonok nage nagagerak me, It aakumi eegu yumbunogo piyamenggerak nogo nen at amendek kugun wonok ndi yogo logogun o.

⁹ Neebe op logokit nduk, nawi tiyarogon wurogo patikit o, mba'nuk, Aakumi wi-wi aganake logonet, inamendek wamenggerak paga at paga wiganak ineenggi warak eerogo piige nogo, abuwa o!

¹⁰ Yi aakumi ndi aakumi apit aret lek eerogo piyoorak kooneegerak paga at paga wiganak nogo inenggali eerogo piige, Ndi, at eebe kunduk, maluk eerogo pake, Eereegerak me,

¹¹ Pak wurik yugum nogo nen inoone nggwok paga at yogo logonet, Kat pulunik aret o, yinuk, at yogwi iinok, It eyo pelan warak nen kunduk, Abet aret yokkega o, yinuk, at yogo logogun o.

¹² Aap ambi nen aakumi inooke logonet, o kota ogowa pit nage, Aakumi maluk eeppiinet nage logonet, o kota nambit-mbit wurogo pit nage, Eeke nogo, abuwa o.

¹³ Yi aakumi ndi aakumi nggwiirit-nggwaarit eekwi nogo ti, kani noorak ake eekwi, Aakumi inanebunu lombok ambi koloorak lek we aanom warogo kagak, anggon-panggon eekwi, Eeko logowak nduk, Nomaawi Lombok Minggirak Naliku an ALA nen kooneegirak paga eekwi nogo lek a?

¹⁴ Niyo nggwok yenggenak laut nen nggween kiiniki paga lombok wonage nogo, nobappunuk menggi kwak, Naliku an ALA abu tiyanak minggirak wone nogo, aakumi o nggween paga ilin-unggut wonogwe abok aret ineenu arugun o.

¹⁵ It at enaagan-ambokan wonogwe nogo, Inagabolo kin iyaakit o, yinuk, Niyo kumili aganaka mendek toologo wogoramenggerak nenok, kumili aganake me, aap wogoraga ti, abuwa o.

¹⁶ At ayuk wuko logomenggaarak nogo obaane'me at aret enggali warogo pugun me, At aret nenok, agabolo kin kenok, enggali aruwak o. Amburu toolak kwak, at aaninggin oba kwippuurak Naliku ALA neenggi abe'nggan paga wonage nogo, At oba ari wage kenok, wogoriminggirak nagin me, endage tiyanak wonage nogo lek age logonet, enggali mban oba lenggenak aret logogin o.

¹⁷ Aakumi inamiya wunabit wage, It aakumi inanggween inom, inawi kota-kota inom, pup eerogo pege, Ndi, it inawi kota-kota wonogwe nogo, ineebe inoorogo piinet nage, Eereegerak me, At ogogumbuk lombok logonet, it puut Libanon menggaarak eyo muurogo pit nogo mengga kwak, eeppiinet nage nagagerak nogo ti, Yungguk togon at oba kwi'nari wage, Ndi, ndiimbu-nggwiya eyonggaame time lek eerogo piinet nage nagagerak nogo nen Melak togon at agabiti mbaruwak nduk, eeppugwi, Eerugun o, yinuk, at yogo logogun,” yegerak o.

¹⁸ It aap eyo paga kugi ogut ogobakkigiko menggaarak ti, nano eekkolaawok nduk, eeko menggaarak? Mbuti paga kugi ogut longgo warak ti nen wone abe yorage lek pilit yorage menggerak kagak eekwi ti, Nano eeppiyoorak nduk, eeko menggaarak? At aap ogobakkigika nogo nen ogut ogobakkigirogo pege nogo ti, Oone lek kagak ogobakkigirogo punuk, iniki oba panggombege me, At nen nano eekkolaakit nduk, ogobakkigike menggerak?

¹⁹ Aap ambi nen eyo obate mbanak yoge logonet, “Keenik aru o,” yinuk, yoge, Ndi, yugum oone ariilik kagak, “Kat mi'naru o,” yinuk, yoge, Eeke kenok, abuwa o. At oone lek ti nen, “Ndogop ee'nip o,” yinuk, yoroorak op mbakop? Ogut ogobakkigirik nogo ti, mbuti emas paga inom, mbuti perak paga inom, nabenogo pugu wonage kwe, Nebek-ndalok yaga'lek oone lek aret menggerak.

²⁰ Togop kwe, at Aliku ALA perak, at awi wurik abu alik leenak menggim time wonage me, Kit aakumi nggween paga wonogwe abok aret at enggaanom paga kinoone lek puk aret logonip o.