Abakuk 1 - Ala Wone Peenok Peebi Mbanak

ABAKUK WONE

¹ Ala nen yoge kagak yoraga Abakuk nogo, peebi eeriyak abinggaanggo paga yoreegerak yi aret.

“Kat eeke yi, neebi o,” yinuk, Ala yoreegerak wone

² Kaliku ALA wae. An noone nggwok paga, “Yeenggwa niru o,” yinuk, yokkege kwe, Karuk konengga'lek keegak, ne mande arigin o? “Inanini nen maluk eeppinanugwi yi, iyet o,” yinuk, noone nggwok paga yokkege kwe, Ninagap ndaka'lek wonage keegak, ne mande ari nagin o?

³ “Maluk eerit nugwi enegen iyaawak,” nomba'nuk, mbo panege, Koone yugu taganogo pugwi iigak kwe, lambek wonage, Eeke ti, Nonggop nduk agandik? Nenegen neegak, maluk eerogo piinet nugwi, Inogogumbuk lombok logonet, eeppiinet nugwi, Ndugwi pit nogwe, wone warit nogwe, Eeko agaarik o.

⁴ Togop aret me, wone eeko logorak yugu nogo omaawi lek eerogo pugwi, A'me nggelok eeppiinet nogo logorak wone nogo eeka'lek tayoppugwi, It aap maluk eeka nen it aap iniki abe koonak nogo, inawone liirogon mbangga'lek yaga-taga eerogo pugwi, Eekwi ti paga A'me nggelok eeko logorak wone yugu nogo a'me ageelik alik aret age menggerak o.

Aliku ALA nen onggo yoreegerak wone

⁵ Aliku ALA nen it at apuri yorage logonet, “Kit wonogwe yi eyom paga an ambi eeriminggirak nogo kit yokkiroorak kwe, abet mbarumunggup lek me, It aakumi kinaagan-kinambokan wonogwe time kinigen iinok, liippugwi, Wi! yinuk, iya mbakwi, Eerumunggup o.

⁶ Ti eerigin nogo ti, inogogumbuk worokot nogo nen it inanggween lek kwe, Unde eeppatinuk logowak nduk, o nggween yi abok aret it mban tebeni nogwe aakumi Mbaben mendek aret mippiyaagin o.

⁷ It aakumi ti, eeppiinet nugwi paga inamineeri ne agan nage logonet, inagabiti mbako menggaarak o. Iniki tiyappatit nogo logonet, aakumi nen eeko logorak koonak abok aret mbo punuk, It iniki nen eeriyak koonggwi nogo mban eerit nugu menggaarak o.

⁸ Nggeewo inogowa ti, iya negen kwe, it inaguda inogowa perak, abu iya lombok wonogwe, Oonikiya paga mba'ngge noorak abu nen inanini ambik menggaarak kwe, It inaguda perak, inanini abu iya lombok wonogwe, Eeko menggaarak o. It inaguda paga kwi'na'nuk ineebe apit aago me o nda nen iniyok oone mbogu-mbogu wogwe, Towe nggindooni at nengge menggerak wariyak nduk, nabuk togon wangge menggi kwak, it togop aret wogwe, Eeko menggaarak.

⁹ It abok aret ti, inogogumbuk logonet, aakumi maluk eerogo piyoorak mba'nuk wogwe, O wiya karume nen warit wage menggi kwak, ineebe apit aago wogwe, Mbini niyo aa'nggi paga ineenggi lingginiyak meek menggi kwak, aakumi ineebe togop aret keele maageren nogwe, Eeko menggaarak o.

¹⁰ It aakumi inoweewi inendagembogut nogo meek eerogo piigwi, Aakumi inoweewi o unde wonaga nogo inagi'ndok kanggwi, Kota-kota pak omaawi wurik abok aret, Yi iya lek o, yinuk, meek eerogo pugwi, Nggween kabunogo pit laganuk unggwogo logonet, o ti tebenggologwe, Eeppunuk,

¹¹ O wiya nggarek togon warit nage menggi kwak, it togop aret o ambime tebenogo pegak eerit nogo menggaarak. It togop aret maluk eerit nogo logonet, inagugi tiyappogo mengga kwak, Nit ninomaawi ti iya o, yinuk, tiyappatit nugu menggaarak o,” yinuk, it aap eeko menggaarak ti aret mippiyaagin me, nduk, yokkiragi o, yinuk, yorage kagarak.

“Ala eeke yi, neebi a,” yinuk, ne ambinom yoreegerak wone

¹² Kaliku ALA wae. Kat kanggeelik mondok kitok menggendak nogo lek a? Kat nogoba Ala maluk eekeelik nogoba obeelom mban wonage menggendak o. It Mbaben mendek nen nit aaninggin-paaninggin eerogo pinanuwak nduk, koonogo piige, Kat yugum kole lunik kwak ninogoba wae. Nit maluk eekwi onggo ninoba kwippinanuwak nduk, kat nen aret it mippiige, Eereegindak kagi o.

¹³ Kat kikak nakeelik abu obeelom wonage me, maluk eekwi kenegen kage, It aakumi maluk eekwi iinok, puk wonage, Eeriyak meek me, It aakumi inoone amburu agan nogo logonet, maluk eekwi nogo nonggop nduk, mbo piige, Ndi, it aap maluk eeka mendek nen maluk eerit nogo logonet, It aap iniki abe koonak nogo inambeme yonggorinakwi iigak, nonggop nduk koone lek puk wonage, Eeke menggendak?

¹⁴ Kat nen it aakumi ti, yikwe niyo nggwok yenggenak laut inikime menggaarak kwak eerogo piige, Yi mendek ndi mendek yi inikime tu agan nugu menggaarak inowe wone lengganogo yoraga lek kwak, eerogo piige, Eereegindak o.

¹⁵ It aakumi eerogo piyareegindak ti, Yikwe niyo nggwok yenggenak laut paga ambik wonogwe nogo, mbuti eyak keele paga pugumbunuk niik eerogo wumbiya wogo mengga kwak, It aap Mbaben mendek nen togop eerogo piigwi, It yum yikwe wagangga nogo paga yonggo'naremenggaarak me, niik eerogo wumbiya wogwe, Yum yikwe wagangga nggorek lombok yugu paga kuwak eerogo yonggorinakwi, Eekwi iinok, Inale'nggen mbakwi, keekok yogwe, eeko menggaarak o.

¹⁶ It yum yikwe wagangga wonage ti paga ineebe obeelom mban wonogwe, Inambi abe mban nonggo logonet, inale'nggen wonogwe, Eekwi me, Yikwe wagangga yum ti, ayuk wuko logonet, yum ti ake warogo wogogwi, Obari abe kaga mendek yum yikwe wagangga nggorek nogo ake kani kunggwi, Eeko menggaarak.

¹⁷ It aakumi ti nen, yi aakumi ndi aakumi inabuwa mbaka'lek inawooluwak yabonogo inoorogo piinet nogo logorak op mbaken?