2 Timotiyut 1 - Ala Wone Peenok Peebi Mbanak

2 TIMOTIYUT

PAWULUT NEN TIMOTIYUT AKE LIIRU PEEBI MBANEEGERAK WONE

¹ Timotiyut wae. Kat naput niniki kunik aret me, at Ala mbareegerak paga nit Keritut Yetut ninom kunik logonet, nineenik mondok logorak wone abok yo'niragagerak nogo yorage logokit nduk, Keritut Yetut ayonggo nappiigak agago paneegerak an Pawulut nogo nen wone ambi yokkiri o.

² At ninogoba Ala inom, ninowe Keritut Yetut inom, imbirak iniki kunik nen wokkugwi, kabuwa nen obeelom eeppagagwi, ndi, kiniki ugun tayenak ale'nggen logonok nduk, eeppagagwi, eeko logogun o.

Iniki eyak wappereegerak wone

³ An ko'lu-kii'me tamban eeke minggirak me, eeke logonet, kat koba aberak wonage me, “Nogoba Ala wa,” yinuk, yoge minggirak. An nombomini maluk abeka'lek logonet iniki abe paga Ala ake eeko nogogwaarak nogo kokwak, an ndak-ndak aret eeke minggirak o.

⁴ Kat le yereegindak nogo abe'nage kenok, an niniki ale'nggen nggwok lombok kaakit nduk, “Keya woraakit lak ao,” mbake minggirak.

⁵ Kat abu abet aret kiniki Yetut oba panggombunuk abet mbareegindak nogo, an neenu aret o. Kowogolo Lowit inom, kagalo Ewunike inom, imbirak aa'nduk abet mbareegwaarak ndak-ndak, kat kunduk abet mbareegindak me, niniki aberak agarik o.

⁶ Togop me, an neenggi kanobak tebembagage neegak, Ala eyabu ambi ee'nok nduk, unde eeppagareegerak nogo, kani noguk ari kenok ambi kunggwi nogo pogom ambi abeke logonok nduk, yokkigi o.

⁷ At Ala nen niniki ninagabitinggut mendek wo'niroolik o. Ata, Aberiniki omaawi eeppinanege kagak ninagabiti lek logonet yorogo logorak mendek inom, aakumi niniki kunik aganaburak mendek inom, niniki warak mendek inom, wo'niragagerak o.

⁸ Togop me, ninowe eereegerak wone nogo yorage logorak kagabiti mbarugun o. Ndi, an Ala wone yorage nagagirak paga nen keele maa'nabeegwaarak nogo kunduk, kagabiti mbarugun mban. Obeelom wone yorogwe paga aaninggin-paaninggin ninoba pinanugwi iinok, ndak-ndak woorak nduk, Ala omaawi wo'nirage menggerak me, an nalik lek o. Nimbirak ndak-ndak aaninggin kogo logowok o.

⁹ At Ala nen ninagap ndake nagagerik, nit at apuri at ake leenak logowok nduk, ninayonggo pereegerak. Nit ambi eekkologogurak paga ti lek o. Ata, at ee'ninaburak kooneegerak nogo ndak-ndak, iniki kunik nen eeppinanege logonet, ninagap ndareegerak. At iniki kunik nen eeppinanege menggerak nogo ti, o yi awo wakkaga'lek kagak, “Keritut Yetut abet mbakwi paga woorak o,” yinuk, koonogo pinaneegerak nogo, pagak yaga'lek wonagagerak kwe,

¹⁰ yogondak iluk ninagap ndaka Keritut Yetut kin ari wage nagagerik, kambuurak ninoba lenggenak wonogogurak nogo, lek eerogo punuk, wone obeelom wone waganggwi paga nabelan-kabelan ee'ninaburak wone nogo nggwok paga pagak yereegerak.

¹¹ Wone obeelom wone ti, mamunirage, yi aakumi ndi aakumi yoranet nege, nappiigak logonet, yi awi ndi awi, “Nak o,” yo'nege kenok nage, eeke logokit nduk, leenogo mippaneegerak.

¹² Mippaneegerak me, eerit nage neenok, aakumi nen aaninggin eeppanugwi kwe, nenggali mbaka'lek aret agarik o. An niniki at oba panggombunuk abet mbareegirak eebe nogo ti, an abu neenu aret o. Ndi, an eeke logokit nduk, unde eeppaneegerak nogo ninowe waga'lek kagak, lek arigin ti lek o. “Yorage logogin aret o,” yinuk, abet aret mbake agarik o.

¹³ Wone kole wone kat nen it in wakkagak eeke logonok nduk, yokkege nagagirak nogo porogo logot o. Keritut Yetut ninom kunik logonet, wone kole wone yi, abet mbake, ndi, aakumi kinom kunik aganake, eeke logonet, porogo logot o.

¹⁴ Abe mendek unde eeppagareegerak nogo, Aberiniki ninikime menggerak nogo nen omaawi eeppagage kagak, liirogon unde logot o.

¹⁵ It o Atiya menggaarak aap Pigelut kunduk, aap Eromogenet kunduk, abok aret an mbo paninuk mbaganeegwaarak nogo ti, kat keenu aret o.

¹⁶ At aap Onetiporut perak, an mbuti keele maarak neegak, agabiti nen mbo panulik nabenak mban niniki eyak wappani wagak mban eeke nagagerak me, at apuri inom abok aret ninowe inabuwa nen obeelom eeppiige logogin o.

¹⁷ At o Oroma nen mbet-mbet kwaa'nabit nege logonet, kwaa'neyareegerak.

¹⁸ At o Epetut logonet, yeenggwaanege nagagerak nogo kat abu keenu me, o age yobok eyom paga ninowe nen aap ti, abuwa mba'nuk obeelom eeppigin aret o.