2 Tamuwen 7 - Ala Wone Peenok Peebi Mbanak

At Ndawut eeriyak Ala nen wone abuk nggaruk togon yoreegerak wone

¹ At Aliku ALA nen Ndawut awim enaagan-ambokan wonogwe nogo, abok aret tebenogo piinok, aap endagembogut Ndawut awi o nggwok abe wurik me nogome iniki ugun tayenak logowak nduk, eeppege mbareegi,

² Ndawut nen aap Ala nen yoge kagak yoraga Natan nogo yoge logonet, “An nawi o nggwok abe wurik yi, eyo abe nggabina paga abu obeelom wuppanegaarak wonage neegak kwe, Ala aloobut mbanak kenok we ooliya wurik me wonage ti ket o.”

³ Yoge mbareegi, at Natan nen aap endagembogut Ndawut nogo yoge logonet, “At Aliku ALA kimbirak wonage me, kat kiniki nen eeriyak koonogo pegendak nogo aret eeke logot o,” yoreegerak.

⁴ Yoreegerak kwe, oonikiya ti eyom paga at Aliku ALA nen Natan owagam wage nagagerik, yoge logonet,

^5-7 “Kat nen, At Aliku ALA nen wone, Ndogop yegerak, nayeloman Ndawut yori nanok nduk, yokkiri o. O maan it aakumi Iterali o Metit nen wogoret wundi wagagirak kuli nok, yogondak yi kuli paga, an logorak o abe wurogo panulik ooliya-ooliya mban wurogo panit nugu menggaarak o. Aakumi Iterali abok aret ninom yagak-ndagak nugu logonet, it ndomba ndegeninako mengga kwak an napuri Iterali ndegeninako logowak nduk, yoragagirak inoweewi inarum wonogwe nogo, ambiriluk ambi yoge logonet, Nonggop nduk an nawi eyo abe nggabina paga wuppanega'lek agandik, yoreegirak ya? Lek aret me, at nen aret wurogo paniyak ari agaarik?

⁸ Togop aret me, At Omaawi Lombok Menggerak Aliku ALA nen ndogop yegerak, nayeloman Ndawut yorenok nduk, yokkiri o. At o karume kambin-ndomba ndegeninabit nege me, an nen wagangge nagagirik, napuri aakumi Iterali inowe endagembogut logonet, inarum logowak nduk, eerogo pereegirak o.

⁹ Pege nagagirik, at nggeeme noorak iniki koombunuk nage kenok, an nimbirak aret nage, an naa'nduk a'nuk awim mendek inoorogo piige, eeke nagagirik, yogondak it aakumi nggween paga inendage warak mengga kwak, at endage warak togop aret eerogo pigin o.

^10-11 It an napuri Iterali aa'nduk tebembiinok wonogwe, ti'nuk, Iterali inowak loonggo logowak nduk, inoweewi mippiige nagagirak kuli nen nok, yogondak kuli, it aap maluk mendek nen tebenogo piigwi, eeko nogogwa kwak ambinom eeppiigo logokwak, inawim abok aret tebenogo piinok, o abolok lek obeelom aret wonage kagak, iname lombok logonet, inagabolo nirik-kirik yaga'lek iniki ugun tayenak logowak nduk, an napuri Iterali inanggween wogorage logominggirik, time kwippiyaminggirak wonogwe iigak, Naliku an ALA nen aret inapuri-inombowologwe ambik wiganogo piyaagin o, yinuk, Naliku ALA nen aret yagi o.

¹² Ndi, at perak, nda'nagagerak eyom abu aret panggoni wage kenok, ombomini kambunuk nogogwam wonogwe me, inom yonggonggola nage kagak, an nen at lombok apuluk ndaremenggerak nogo, obaane'me mippege logominggirik, apuluk abu'me piige logowam mondok-mondok logowak nduk, eeppigin o.

¹³ Ndi, nendage ki logowak nduk, nawi wurogo paniyak yegerak nogo ti, apuluk ti'nen aret wurigin o. Wuke kenok, at paga wigannarigin nogo nen mban abu'me piige logowam time mondok-mondok wone lengganogo yorage logowak nduk, eeppege logogin o.

¹⁴ An ti, at ogoba aret age, Ndi, at ti, an naput aret age, eerugun me, maluk eeke kenok ti, aap ambi nen apuluk iniki koonnaruwak nduk, muun yawi paga wake menggi kwak, aakumi nen at togop aret aaninggin oba pogo logowak nduk, eeppiige logogin o.

¹⁵ Togop aret kwe, at nen Tawun obaane'me endagembogut logowak nduk, an Tawun abuwa nen obeelom eeppege nagagirik, at Ndawut kagak mbo pereegirak nogo kwak, at aap ti, abuwa nen obeelom eeppege nogo, lek arigin lek mondok-mondok eeppege logogin o.

¹⁶ Obeelom eeppege logonet, apuri-ombowologwe ndaganabit nage, abu'me piige, eeke nogo ti, lek arigin lek mondok-mondok aret logogin me, at ndaremenggerak paga nen abu'me piige logowam mondok unde logowak nduk, eeppege logogin o, yinuk, at Aliku ALA nen yegerak, yori nanu o,” yinuk, yoreegerak.

¹⁷ Yoge mbareegi, at Natan nogo Aliku ALA nen kin paga yoreegerak nogo ndak-ndak aret Ndawut mbininogo yori nagagerak.

Ndawut nen tamban eeke logonet, “Ala wa,” yoreegerak wone

¹⁸ Mbininogo yori nage mbareegi, aap endagembogut Ndawut nogo Ala awooliya wurik me unggwage nagagerik, Aliku ALA enggaanom paga kwi'na'nuk tamban eereegerak. Tamban eeke logonet, “Kaliku Kitok Menggendak nogoba ALA wae. An inom, nowe-nawot inom, nit nen eeriyak abu meek lombok niigak, an mii'nake nagagindik, kapuri inarum logokit nduk, mippaneegindak o.

¹⁹ Ti eeppanege nagagindik, Abu aret eekirak kagi, yinuk, puk ariyak kwe, an kayeloman napuri-nombowologwe eeppiyoorak inom yo'negendak kenok, Kaliku Kitok Menggendak nogoba ALA kat yi, ia! An aap aret kwe, Kaliku Kitok Menggendak nogoba ALA peebi eeppaniyak kin paga yo'negendak kenok, an wa yokkege agaric o.

²⁰ Togop aret me, Kaliku Kitok Menggendak nogoba ALA wae. An kayeloman yi, neebe inom, eeke minggirak inom, abu neege menggendak me, an nonggop yokkiri o?

²¹ Kat mondok iya negen eeppaniyak an kayeloman eerogo nappani wagandak yi, kat wone yo'negendak a'me nggelok ari, ndi, kat eeriyak kiniki mbake nogo ndak-ndak age, eeruwak nduk, wone eerogo nappani wagandak o.

²² Kaliku Kitok Menggendak nogoba ALA kat abu nggwok aret menggendak me, nit lombok nen ninaruk konenggo monggoorak ndak-ndak, kat pogom ambi wonage lek Ala kalik aret menggendak o.

²³ Kat Ala nen it aakumi Iterali inagap ndarogo kat kapuri lombok aruwak nduk, o Metit paga tebenak wonogwe me, wondet eerogo piige, kendage tiyak yuwak nduk eeke, ndi, kat kaa'nduk a'nuk, mondok iya lombok tam warak negen eeke logonet inawim mugogo wumbiige, inagugi tebenogo piige, eereegindak me, o nggween paga yime abok aret it kapuri Iterali pogom ambi wonogwe lek aret o.

²⁴ It aakumi Iterali mendek ti, kat kapuri mondok-mondok logowak nduk, koonogo piyareegindak me, Kaliku inogoba Ala kat aret agagindak o.

²⁵ Togop aret me, Kaliku Kitok Menggendak nogoba Ala wae. An kayeloman inom, napuri-nombowologwe wigannarugun inom, eerogo pinaniyak wone koonogo yo'negendak nogo, a'me lik togon aret eeppinanege logomunggun o.

²⁶ Kat kendage mondok-mondok tiyanak logowak nduk, wone yagandak nogo ti, a'me nggelok togon eeke keenok, it aakumi nen, At Omaawi Lombok Menggerak Aliku ti, aakumi Iterali inogoba Ala aret kogo, yinuk, yogo logogun o. Ndi, kat kenegen wo'ninake keegak, an kayeloman Ndawut napuri-nombowologwe wiganak nen mban it kapuri Iterali mondok-mondok inarum logogun o.

²⁷ Ndi, kat Komaawi Lombok Menggendak Kaliku Iterali inogoba Ala wae. Kat nen an kayeloman yo'nege logonet, Kapuri-kombowologwe wiganak paga mban Iterali inarum logogun, yo'negendak ti paga an kayeloman nagabiti lek nogogumbuk logonet, wone yi, yokkege agarik o.

²⁸ Kat Kaliku Kitok Menggendak Ala aret me, kat koone ti, mondok abet mban ari menggendak o. Ndi, kat wone abe mban koonogo an kayeloman yo'negendak me,

²⁹ an kayeloman napuri-nombowologwe wigannarugun nogo, kenegen wogonake keegak, it kapuri Iterali mondok-mondok inarum logonet, eerit nogo logowak nen, kale'nggen inoba piige logonok nduk, yokkege me, liirogon aret wamen o. Kaliku Kitok Menggendak kat ALA nen aret wone yagandak o. Ndi, an kayeloman napuri-nombowologwe wigannarugun nogo, kale'nggen inoba piyamenggendak nogo lek arigin lek mondok-mondok inoba aret logogin o, yinuk, yokkigi o,” yinuk, yoreegerak.