2 Tamuwen 4 - Ala Wone Peenok Peebi Mbanak

Itibotet wareegwaarak wone

¹ At Abenet o Keboron warogo pereegwaarak at Tawun aput Itibotet aruk konengge nagagerik, omanggen tayok ari, ndi, it Iterali mendek iniki ma'nogwe, eereegwaarak.

^2-3 At Tawun aput Itibotet awuri o maluk eeka inoweewi mbere, aap anebunu Mbeniyamin mendek Irimon apuri ambi Mbaana, ndi, ambi Erekap me, inawi alom o Mbeerot aret wonogogwaarak. It aakumi o Mbeerot nogo nen kole mbaganit o Nggitayim ari nanuk, time aap nggiru negen ye mbambatinuk, yogondak wonogwe aret o. Ndi, inanggween o Mbeerot nogo ti, Mbeniyamin mendek inanggween ando aret agagerak.

⁴ At Tawun aput Yonatan nogo apuluk endage Mepibotet ndarak kagak tahun 5 eereegerak me, “At Tawun Yonatan imbirak o Yiteren nogome inookaarak o,” yinuk, yogwe nogo kolaga at wulaga ndegengge menggerak nogo, konengge nagagerik, agabiti nen ne ti eyom paga aret mbaganit nage logonet, wulaga nogo yigeebu wuppereegerak me, endop imbirak maluk aret agagerak.

⁵ At aap Itibotet nogo, o liingge ame time windak wonage me, it aap o Mbeerot mendek Irimon apuri Erekap Mbaana imbirak mo telek togon pege kagak, at ame nogogwaarak.

⁶ Nogo nogogwaarik, ame unggunuk, imbirak gandum waganggwi yuwak eeppunuk, melarogon ko at nogo yege me unggwi nogo nogogwaarik,

⁷ at Itibotet nogo, nogo yege menggim time eyo ndoonak paga windak wonage me, ndanuk togon wareegwaarak kangge mbareegi, anobak mbaninuk wonok oonikiya paga tu o Araba kobappaga nogo paga

⁸ at Ndawut o Keboron wonage me, wogori nogo nogogwaarik, yogo logonet, “Yogondak aret at Tawun inom, apuri inom, kat nowe kendagembogut kooriyak nduk, eerit nugu nagaarak nogo, onggo at Aliku ALA nen aap yi aret wo'niragaarak me, kimbirak wim menggendak Tawun aput Itibotet anobak mbanak yi aret wokkiri wogo o.”

⁹ Yogo mbareegwa, at Ndawut nen aap awi Mbeerot mendek Irimon apuri Mbaana Erekap imbirak yorage logonet, “An aaninggin-paaninggin noba wonage kenok, nagap ndaka eenik menggerak Aliku ALA endage kumbunuk, wone ambi yokkira o.

¹⁰ An o Tikalak time wonage me, aap ambi nen, Tawun nogo muk kanggerak o, yinuk, wone obeelom aret mba'nuk, yo'niri wage mbaki, yo'negerak onggo at eebe aret pigagangge nagarik, wakirak nogo kokwak,

¹¹ aap maluk eeka'lek ame ageyo ndoonak paga windak ugun wonage kagak, kit aap maluk mendek nen ame unggunuk, warogo pogotak nogo ti, abunuk maluk nggwok eekotak me, kit teppinagarak mbakop? Amiya wunakotak onggo o nggween paga yime nen kinenggaawak lek eerogo pinagarak lek mbakop? Lek eerogo pinagarak areto.”

¹² Yorage nagagerik, it Erekap Mbaana imbirak at awuri nogo nen inooruwak nduk, yorage mbareegi, inooppunuk, ineenggi-iniyok mbanogo punuk, ineebe o Keboron yi yenggenak ambet paga taati tugumbiyareegwaarak. Tugumbiinok, at Itibotet anobak mbanak nogo perak, wonok o Keboron Abenet nggween taambereegwam nogome aret taambereegwaarak.