2 Tamuwen 2 - Ala Wone Peenok Peebi Mbanak

Ndawut nogo it Yekura inowe endagembogut mippereegwaarak wone

¹ Ti'nuk, ne ambi paga at Ndawut nen Aliku ALA yoge logonet, “An o Yekura inawi kota ambi time na ilik?” Yoge mbareegi, at Aliku ALA nen, “Nako.” Yoge mbareegi, at Ndawut nen yoge logonet, “Inawi kota nggeeme na o?” Ari mbareegi, at Aliku ALA nen, “O kota Keboron time aret nak o,” yoreegerak.

² Yoge mbareegi, at Ndawut nogo akwe ambi kwe Yiteren mendek Akinowam inom, akwe ambi aap Naban awi Karemen mendek kwe togwe pereegerak waganeegerak Abigayin inom, akuwi mbere ti, inom aret o Keboron woraawok nduk eeko mbareegwa,

³ at awuri nogo inalitik-inalitak inakuwi-inapurilogwe inom aret wogo nogogwaarik, o Keboron kota-kota time ye mbambatinuk wonogogwaarak.

⁴ Time wonogwe me, it aap Yekura mendek o Keboron nogome wogo nogogwaarik, at Ndawut nogo it aakumi Yekura mendek inowe endagembogut logowak nduk, amburu eerogo mippereegwaarak. Mippereegwaarak wonage logonet, it aakumi Yabeti-Nggileyat mendek nen at Tawun nggween taambereegwaarak yogwe nogo, at Ndawut konengge nagagerik,

⁵ it aap Yabeti mendek yora nawak nduk, wone eerogo nappege logonet, “Kit kinogoba Tawun nogo abuwa mba'nuk, at eebe nggween taambogotak me, at Aliku ALA nen ale'nggen kinoba pinagage logogin o.

⁶ Kit ti eekotak paga Aliku ALA nen iniki kunik eekkinake logonet, yokkirage nogo, li'lak aret eeppinagage, ndi, an kunduk togop aret obeelom eeppinagage, eeko logogun o.

⁷ Togop aret me, kit kinogoba Tawun kanggerak nogo, obaane'me it aap Yekura inowe endagembogut logokit nduk, amburu eerogo mippanggaarak me, kit kinagabiti mbaka'lek kinogogumbuk aret logonip o, yinuk, eerogo nappinani wagaarak me, yokkira wogo o,” yinuk, yorogogwaarak.

Ndawut Itibotet imbirak eereegwaarak wone

⁸ Ti eekwi iigak, aap Tawun awuri ineegin warak inowe Net aput Abenet nogo nen Tawun aput Itibotet wonok o Makanayim time pi nage nagagerik,

⁹ aakumi Nggileyat mendek inom, Atiyuri mendek inom, Yiteren mendek inom, Eparayim mendek inom, Mbeniyamin mendek inom, it Iterali ando abok aret inowe endagembogut logowak nduk, aap Itibotet nogo aret mippereegerak.

¹⁰ At Tawun aput Itibotet nogo ndarak kagak tahun 40 eeke mbareegi, it Iterali inowe endagembogut mippereegwaarak wone lengganogo yorage kagak, tahun mbere eereegerak. Ti yorage kagak, it aakumi Yekura mendek nogo perak, Ndawut mban mugurok nogo nogogwaarak.

¹¹ Ndi, at Ndawut nogo o Keboron logonet, aap Yekura mendek inowe endagembogut a'nuk, wone lengganogo yorage kagak, tahun 7 eeppunuk, tut 6 peneneegerak.

Itibotet awuri inom, Ndawut awuri inom, wim nambureegwaarak wone

¹² Ne ambi paga at Net aput Abenet inom, Tawun aput Itibotet awuri inom, o Makanayim nen Nggibeyon wogo mbareegwa,

¹³ kwe Teruya aagaluk Yowap inom, Ndawut awuri inom, niyo yenggenak Nggibeyon aa'nggi paga wonogwe me iya nogo nogogwaarik, it Abenet awuri inom yi yenggenak ambet ene paga ogwe, ndi, Yowap awuri inom yi yenggenak ambet yi paga ogwe, eeppunuk wonogogwaarak.

¹⁴ Ti eeppunuk, wonogo logonet, aap Abenet nen Yowap yoge, “Nit ninigen niigak, an nawuri inom, kat kawuri inom, ta omaawi age kaamun? yinuk, wakkaawak o.” Yoge mbareegi, at Yowap nen, “Op aret me wakkaawak o,” yoreegerak.

¹⁵ Yoge mbareegi, inawuri lombok mbiginogo piinok, it Mbeniyamin mendek ineebe 12 Tawun aput Itibotet iyok me aruwak nduk, lingginogo piinet nogwe, ndi, it Yekura mendek ineebe 12 at Ndawut iyok me aruwak nduk, lingginogo piinet nogwe, eereegwaarak.

¹⁶ Ti eeppunuk, it inalitik-inalitak lombok inenggaanok yomon-yomon a'nuk, ndut kenenak paga at ambi kirip me linggagak, at ambi kirip me linggagak, eerogo patinuk, kambeegwaarak. Ti eereegwaarak paga o Nggibeyon nogome endage, “Ndut Paga Ndanun-Ndanun Yereegwam o,” yinuk, tooneegwaarak.

¹⁷ Ne ti paga wim mondok eenggabit kumbunuk, nambuko logonet, at Ndawut awuri nogo nen Abenet inom, at awuri Iterali mendek inom, mondok inoorogo piyareegwaarak.

^18-19 Ndi, Teruya aagalogwe ineebe kenagan inendage Yowap, Abitayi, Atayen, inom time aret wonogwe me, at Abenet nogo, mbaganit nage mbareegi, mba'ngge penaame nen nggare agan nage menggi kwak, at Atayen nogo ogowa ambik me, ena agigan-ogugan aga'lek mondok nggare agan mugurok nage me,

²⁰ at Abenet nogo ambokan ena logurogon pekkage logonet, “Kat Atayen aret a?” Yoge mbareegi, “Ebi, an aret o.”

²¹ Yoge mbareegi, at Abenet nogo nen Atayen yoge, “Kat an mban mu'neren wage ti, mage o! Ata, kena agigan-ogugan a'nuk, aap tawe eegin warak wonage kero, eegin ndinu o.” Yoreegerak kwe, at Atayen nogo nen kagak aret Abenet nogo mban mugurok nagagerak.

²² Mugurok mban nage mbareegi, at Abenet nen Atayen nogo ambinom yoge logonet, “Kat an mban mu'neren wage keenok, koorogo pagage logominggirik, kowe Yowap nimbirak ninengga mbiirik logukwak, kat mu'neren mban wage ti mage ubi!”

²³ Yoreegerak kwe, kagak aret mugurok mban nege mbareegi, at Abenet nen awooluwak paga ambo'me nen aanogum ndanunggagagerak polok togon ambokan wungge mbareegi, mbo noolik, iyok pereegim taati aret ngginnage nagagerik, kambeegerak. Kangge mbareegi, it aap wim mbaganit nogwe nogo, aap Atayen warak me ari nogo nogogwaarik, uwik togon taati puk ogogwaarak.

²⁴ Togop aago iigak kwe, at Yowap Abitayi imbirak nen at Abenet nogo mondok mugurok mban nugwi iigak, oonegen kilu yi nage mbareegi, o Nggibeyon abeenok karume nogo menggam o Nggiya oonegen lagi wage menggim pa'nggwe puut endage Ama time ari nogogwaarak.

²⁵ Ari nogogwaarak wonogwe iigak, it aakumi Mbeniyamin mendek nogo Abenet inom lambunggo nogogwaarik, puut kirin paga time kuwak eeppunuk, enaarak wonogogwaarak.

²⁶ Ti eeppunuk logonet, at Abenet nen Yowap nogo yoge, “Kawooluwak ti paga mban nenet nage logorak ti op mbaken? Nit yi eekwi paga peebi niniki andi eeppinaniyak lek mba'nuk, eeke agandik? Kawuri nen kinowe-kinawot nit mu'niren wogwe nogo, ne mande logonuk, puk aruwak nduk, yoraamunggun o?”

²⁷ Yoge mbareegi, at Yowap nen wone onggo yoge logonet, “Kat wone yi yo'nenetak lek nen, an nawuri ninom nen nowe-nawot kit mukkiren-makkiren nugwi niigak, o aret wee'netak o, yinuk, at eenik menggerak Ala endage kumbunuk, abet aret yokkigi o,” yoreegerak.

²⁸ Yoge nagagerik, at Yowap nen oone nggwok eeka trompet nogo oone pu eeke mbareegi, awuri nogo nen Iterali muguren nogwe, inom wim ambinom eekwi, eerulik puk aret ogogwaarak.

²⁹ Ndi, at Abenet nogo, awuri inom oonikiya ti eyom paga tu o Araba kobappaga ti paga nogo nogogwaarik, yi Yoraran wunda nanuk, nogwe aret iigak, o liingge-liingge aret o Makanayim unggwi nogogwaarak.

³⁰ Ndi, at Yowap awuri inom nen Abenet mugurok nogo nogogwaarak nogo mbo punuk, iniyokan wogo nogogwaarik, Ndawut awuri nogo abok aret kuwak eeppiinok, eenggi linggininake nagagerik, ineebe 19 inom, aap Atayen inom, lek aret iyareegwaarak kwe,

³¹ at Ndawut awuri nen Abenet awuri inanebunu Mbeniyamin mendek inooreegwaarak perak, ineebe tiga ratus enam puluh aret inooreegwaarak.

³² Ti'nuk, at Yowap awuri inom nen Atayen eebe warak nogo ogoba nggween taambereegwam owak paga o Mbe'lekem nogome taambereegwaarak. Taambogo nogogwaarik, oonikiya paga wogwe mban iigak, o Keboron unggwi wogo mbareegwa, o aret weereegerak.