2 Tamuwen 18 - Ala Wone Peenok Peebi Mbanak

Abatalom wareegwaarak wone

¹ At Ndawut nen aap at inom wonogwe nogo kuwak eeppiinok, aap ambi ineebe seribu inowe logowak nduk mippege, aap ambi ineebe 100 inowe logowak nduk mippege, eeginabit nage nagagerik,

² at Ndawut nen it ineegin warak nogo wim eeri nawak nduk, aap ambi eerak at Yowap nen wogoren nawak nduk koonogo piige, ambi eerak Yowap awuluk kwe Teruya aagaluk Abitayi nen wogoren nawak nduk koonogo piige, ambi eerak aap o Nggat mendek Itayi nen wogoren nawak nduk koonogo piige, eeppiige nagagerik, yorage logonet, “Kit ninom aret wim eeri nawok o.”

³ Yorage mbareegi, at inom nugwi nogo nen at yogo logonet, “It ninawim nen nit mu'niren wogwe iinok, nit mbaganggwi niigak, kat aret koori woraagun me, kat ninom wim eeri noorak lek o. Nit nineebe eegu ninooriyak nogo ti, iya lek kwe, kat kooriyak nogo perak, aap nineebe sepuluh ribu ninooriyak kwak kat aret koorukwak me, o kota yime logonet, kini wuppinanegak mban eeke logorak perak op o, ninogoba.”

⁴ Yogo mbareegwa, aap endagembogut Ndawut nen it yorage logonet, “Kit eeriyak nombakotak nogo mban eeke logokit o.” Yorage nagagerik, o kota tu unggwogo menggam taati mi'ndak wonage kagak, awuri ineebe 100 aago nogo aret wundi nogwe, seribu aago nogo aret wundi nogwe, eerit-eerit age yubuneegwaarak.

⁵ Age yubuk togon wundi nogwe iigak, at Ndawut nen Yowap inom, Abitayi inom, Itayi inom, wone lengganogo yorage logonet, “At Abatalom ti, an napuluk awo tawe aret me, yanggorogon aret eeppuurak o, nawuri,” yinuk, inoweewi wone lengganogo yoragagerak nogo, it aap ineegin warak abok aret inaruk koneneegwaarak.

⁶ Ndi, at Ndawut awuri ineegin warak nogo nen it aap Iterali mendek o Eparayim eyonggaame time wonogwe me, inoba kwi'nari unggwogo logonet, inom wim nambureegwaarak.

⁷ Wim nambuko logonet, at Ndawut awuri nogo nen it Iterali mendek ineegin warak nogo tebenogo piigo logonet, ne ti eyom paga aakumi mondok iya lombok ineebe dua puluh ribu aret inooreegwaarak.

⁸ Inooko nogogwaarik, o nogome wim nggwok wigak yereegerak nambuko logonet, wim tinime wooluwak paga inooreegwaarak nogo ti, we mbuuluk negen aret kwe, eyonggaame inabut nen kambit nogogwaarak nogo perak, mondok iya lombok aret kambeegwaarak.

⁹ Ne ti eyom paga at Abatalom nogo, kuda paga yarugu at Ndawut awuri wonogwe me nggelok ari nagagerik, kuda nogo nomok togon wonok eyo teno nggwok eno'mbak luurik-maarak aago abu'me nage me, anobak eyo teno eno'mbak ko'me nggelok yereegerak oolo taati yuwok talek ari kagak, kuda nogo nggarek yereegerak.

¹⁰ Nage kagak, at Ndawut awot ambi nen Abatalom eyo ko'me nggelenak wonage enegen kage nagagerik, Yowap yoge, “At Abatalom nogo, eyo teno eno'mbak ko'me nggelenak yuwok talek ari wonage nenegen kagarak o.”

¹¹ Yoge mbareegi, at Yowap nen aap nogo yoge logonet, “Ie! Abet aret yagan? Kenegen kagandak kenok, yabonogo nggween paga wuppi wa'nuk, wakembok, nonggop nduk teppegendak? Kat togop aret wa'netak en, an nen onggo nggwok wu mbuti perak 10 inom, aap wakaa'ngget kenok yiriko menggaarak kobee'le inom, wokkenetak o.”

¹² Yoreegerak kwe, at aap nogo nen Yowap yoge, “Aap endagembogut Ndawut nen kat inom, Abitayi inom, Itayi inom, wone yokkirage logonet, At Abatalom nogo ti, an napuluk awo tawe aret me, liirogon eeppuurak o, yinuk, wone lengganogo yokkirage nogo nit lombok ninaruk konenggoorak me, wu mbuti perak seribu wo'niriyak mbakendak kwe, aap endagembogut aput amiya neenggi paga wunaburak mondok lek aret o.

¹³ Ndi, an nen aap Abatalom wa'netak en aap endagembogut Ndawut yi wone ndi wone abok aret aruk konengge menggerak me, wone ti konembunuk, nooke kenok, kat nen nili yaga'lek nomo yenetak kombaki o.”

¹⁴ Yoge mbareegi, at Yowap nogo nen ari logonet, “Wone ti mban yogwe niigak, o abu aret age me, neebi a!” Ari nagagerik, wooluwak kenagan eenggime woppunuk, at Abatalom nogo eyo teno eno'mbak nogo paga nggelenak awo eenik nggik ari wonage me, inikinggup me ndanuk togon wareegerak.

¹⁵ Wake mbareegi, at Yowap awuri eegin-ombambile wonok nega ineebe 10 wogo nogogwaarik, at Abatalom nogo wanggeppunuk, karugum ne eerogo wako mbareegwa, kambeegerak.

¹⁶ Wappogo nogogwaarik, Yowap awuri wim eeka nen it Iterali mendek muguren nogwe nogo, puk aruwak nduk, at Yowap nen oone nggwok eeka trompet oone pu eeke mbareegi, puk ogogwaarak.

¹⁷ Puk ogo nogogwaarik, at Abatalom eebe warak nogo waganogo eyonggaame mbuun ambe nggwok me, mbo tek agago wuppogo nogogwaarik, yugum yele-kole yagabit tobo eerogo pugwi iigak, it aakumi Iterali mendek nogo abok aret inalitak iname lombok mbaganit nogogwaarak.

¹⁸ At Abatalom nen, “Nendage ki eeke logorak napuluk lek aret me,” mbake nagagerik, at kangga'lek awo eenik wonage logonet, aap endagembogut menggim kobappaga time abiriwak yugum paga ogobakkigirogo mippake nagagerik, “Yi an Abatalom nabiriwak o,” yinuk, toonogo pateegerak me, it aakumi nen, “Abatalom Abiriwak Pugu o,” yinuk, yogondak kuli yogwe wonogwe aret o.

Abatalom wareegwaarak nogo Ndawut yori nogogwaarak wone

¹⁹ Aap Abatalom wako mbareegwa, awuri mbaganit nogwe iigak, aap Tarok aput Akimaat nen Yowap yoge logonet, “At Aliku ALA nen awim ineenggime nen muk agap ndakerak o, yinuk, wone ti wonok aap endagembogut yori naakit nduk, Op aret, yo'niru o.”

²⁰ Yoreegerak kwe, at Yowap nen at Akimaat yoge logonet, “O yogondak yi paga kat nen wone ti wonok yori noorak mage o. Ne yogondak yi paga aap endagembogut aput kanggerak me, wone ti yori noorak lek o. Ata, wone alik ambi wonage kenok perak, ne ambi eyom yori noorak op aret o.”

²¹ Yoge nagagerik, aap Kuti mendek ambi yoge logonet, “Kat kenegen kagandak nogo, aap endagembogut yori nak o.” Yoge mbareegi, at aap ti, tebe yinuk, ayuk wuke nagagerik, mbe agan aret yori nagagerak.

²² Yori nage kagak kwe, at Tarok aput Akimaat nogo nen ambinom Yowap yoge logonet, “An togon aap Kuti nage ti, ambokan mbe agan mugurok ka naakit nduk, Op aret, yo'niru ubi, nogoba!” Yoge mbareegi, at Yowap nogo nen, “Naput o. Kat wone ngge mendek yori namenggendak paga ambi eeppagarak nduk, Na o, yinuk, koone nabenak mban yo'nege agandik?”

²³ Yoge mbareegi, at Akimaat nen, “An ambi kolaakit, mba'nuk, noorak ari lek me, kagak aret na o.” Yoge mbareegi, at Yowap nen, “Ti kenok, nak aret o.” Yoge mbareegi, aap Kuti mendek nogo awo nage kagak, at Akimaat nogo tu o Yoraran kobappaga mbe agan nage nagagerik, at aa'nduk aret unggwi nagagerak.

²⁴ Ndi, at Ndawut nogo yagat pak wurik tungga endekem-akem mbanak kagak oolo taati kwi'ndak wonage me, aap ambi o arum menggerak nogo, yugum yagat wurik paga lagangge nagagerik, tu unggwogo menggam awe aago ndoonak paga mi'ndak logonet, enegen pilarogon pe'nage nagagerik, aap ambi alik mban mbe agan wage enegen kagagerak.

²⁵ Kage nagagerik, aap endagembogut wonage me, oone agago wuppi wage logonet, “Aap ambi nggare agan keya wage ti o.” Yoge mbareegi, aap endagembogut nen, “Aap ambiret wage kenok ti, wone obeelom mendek aret wonok wage mbaki o,” yoge kagak, aap nogo koorok aret panggo yi wagagerak.

²⁶ Panggo yi wage kagak, aap o arum menggerak nogo nen aap alik ambi mbe agan wage enegen kage nagagerik, at ore tu unde menggerak nogo yoge logonet, “Wulaga! Aap alik ambi peebi wage ti,kenegen pekket o!” Yoge mbareegi, at endagembogut nen at yoge, “Aap ti kunduk, wone obeelom mendek mban wonok wage mbaki o,” yoreegerak.

²⁷ Yoge mbareegi, at o arum menggerak nen ari logonet, “Aap aa'nduk nggare agan wage ti, aap Tarok aput Akimaat tu mbe agan nege menggerak obaabut aret wage kagi o.” Ari mbareegi, aap endagembogut nen, “At aap obeelom aret me, wone obeelom aret wonok wage mbaki o.”

²⁸ Ari kagak, at Akimaat nogo nen oone nggwok paga aap endagembogut yoge logonet, “Nogoba wa!” yinuk, at owagam wage nagagerik, endobanggun yindumbunuk, ena nggween paga wuragik logonet yoge, “Kat nowe kendagembogut kooriyak koonggaarak nogo, at Aliku kogoba Ala nen waganogo keenggime pagi wagaarak me, endage tiyappege logot o!”

²⁹ Yoge mbareegi, aap endagembogut nen at yoge, “Aap tawe Abatalom nogo, eebe obeelom aret wonage ilik?” Yoge mbareegi, at Akimaat nen onggo at yoge logonet, “Kat nowe kendagembogut an kayeloman wagarak yi, at Yowap nen wone eerogo nappani wagaarak wage logonet, noone-koone yogwe iigak wagarak me, nonggop agaarak nogo an neenggo'lek o.”

³⁰ Yoge mbareegi, aap endagembogut nen Akimaat nogo yoge, “Ena abeenok nggwe yime mi'nari mok o.” Yoge mbareegi, ena time nggwe mi'nari nagagerak.

³¹ Mi'nari nagagerak kagak, aap Kuti mendek nogo wage nagagerik, ari logonet, “At Aliku ALA nen it aakumi kat tebenogo pagarak eekwi nogo, o yogondak yi paga ineenggime nen ndinogo kagap ndakerak me, kat nowe kendagembogut obeelom wone yi, wonok yokkiri wagi o.”

³² Yoge mbareegi, aap endagembogut nogo nen aap Kuti mendek nogo kin wakkage logonet, “Aap tawe Abatalom nogo eebe obeelom aret wonage ilik?” Yoge mbareegi, at aap Kuti mendek nogo nen, “It kat kinom wim mbanak menggendak inom, kat tebenogo pagawok nduk eekwi inom, kaput tawe eeppegaarak nogo ndak-ndak aret eeppiyaawak o,” yinuk, yoreegerak.

³³ Wone ti ari nogo, aap endagembogut aruk konengge nagagerik, ogut na'nuk, iniki puru agan tu unggwogo menggam o wurik irimbaga ko ambi ogoorak me, lagi nanuk, “Ai, napuluk Abatalom o! Abatalom o! Napuluk a! Napuluk a! Kat napuluk Abatalom kobaane'me an kogoba aret kambikit lak, naput a! Naput a!” yinuk, le ari nagagerak.