2 Tamuwen 15 - Ala Wone Peenok Peebi Mbanak

Abatalom nen ogoba obaane'me mi'nariyak kooneegerak wone

¹ Ti'nuk, ne ambi paga at Abatalom nogo nggweendo wim eeka ogobakkigirik inom, wonok nega kuda inom, ndi, at nggweendo paga nage kagak inaa'nduk aru koonogo pit nega aap ineebe 50 inom, koonogo pateegerak.

² Koonogo pake nagagerik, ko'lu-kii'me o kuubondendok tu kota unggwogo menggam time ari nanuk wonage me, it aakumi aap endagembogut nen inawone amburu mbanogo, “Yogop ee'nip o,” yoraawak nduk, ka wogwe iinok, at Abatalom nen it aakumi nogo yorage, “Kit kinawi ngga nen wogop?” Yorage kenok, it nen, “Nit Iterali ninanebunu ndi mendek nen wogo o,” yogwi iinok,

³ at Abatalom nen it yorage logonet, “Kit kinawone ti, abet aret me, aap endagembogut yoriyak op aret kwe, at obaane'me awuri nen liirogon koneniyak ineebe lek me, kinabuwa o.”

⁴ Yorage nagaatik, wone ambi ari logonet, “An nen o yime kinowak loongge logokit nduk, mippanugwi kiinok, kit yi aap ndi aap abok aret wone ambi kinoba a'nuk, kinawone mbaniyak nduk, an nowagam wogwe kiinok, an nen kinawone li'lak aret amburu mbangge logokit lak, ao,” yinuk, yorage nagagerak.

⁵ Ndi, it aakumi nen Abatalom owagam wogo nagaatik, abu'me tebe yinuk, ayuk wukwi iinok, at Abatalom nen lamooppiinok, inagandin eyak mbaninake nagagerak.

⁶ It aakumi Iterali mendek abok aret aap endagembogut nen inawone amburu mbanogo inowak looniyak nduk, at owagam wogwe iinok, at Abatalom ti eeke nagagerak paga iniki nomonogo at paga mban piige nagagerak.

^7-8 Ndi, tahun 4 eeppunuk, at Abatalom nogo aap endagembogut yoge logonet, “An kayeloman o Aram kota Nggetut paga time logonet, at Aliku ALA yoge, Kaliku ALA nen wo'neren niyokan o Yerutalem pani nage keenok, an o Keboron time Kaliku ALA kalut eeri nagin o, yinuk, wone kumbuk mbanogo yoreegirak me, yoreegirak nogo a'me lik yuwak nduk, o Keboron naakit nen, E, yo'niru o,” yoreegerak.

⁹ Yoge mbareegi, at Ndawut nen, “Op aret o. Kiniki ugun o Keboron nak o,” yoge mbareegi, aret nagagerak.

¹⁰ Nage logonet, at Abatalom nen it Iterali mendek inanebunu lombok wonogwe me abok aret wone kote eerogo nappiige logonet, “Oone eeka trompet nogo oone pu eekwi kinaruk konembunuk, Abatalom nogo o Keboron nen inowe endagembogut mi'naga, yinuk, keekok yuwak o,” yinuk, nappiyareegerak.

¹¹ Nappiyareegerak nogwe iigak, at Abatalom o Yerutalem nen aap ineebe dua ratus inom nagagerak. It aap inom nagagerak nogo ti, at eeriyak kooneegerak ineenggo'lek kagak we ugun, “Woraanip o,” yoragagerak paga aret nogogwaarak.

¹² Inom aret nogo nogogwaarik, at Abatalom nogo Ala ake warogo wogoge logonet, aap Nggilo mendek endage Akitoben Ndawut inom wone koongga nogo, ame o Nggilo time wonage me, woraawak nduk, ayeloman mini yonggo nappiyareegerak. Togop eereegerak paga Ndawut tebenogo puwok nduk iniki ambit eeppunuk, koonogo pereegwaarak nogo, nggwok aret age mbareegi, aakumi apit at Abatalom inom mban aret ogogwaarak.

At Ndawut o Yerutalem nen kole mbaganeegerak wone

¹³ Aap ambit-ambi wone wonok Ndawut owagam wage nagagerik, yoge logonet, “Aap Iterali mendek abok aret Abatalom inom ariyak mban mbako agaarik o.”

¹⁴ Yori wage mbareegi, Ndawut nen at awuri inom yabu eeko menggaarak o Yerutalem wonogwe nogo, yorage logonet, “Wologwe! Nawi aret o. It Abatalom awuri inom ninooriyak nduk wogwe yi aret me, elaambirik wonogwe kenok, it wogo logomenggaarik, nit awo mbaganit nogwe me, mu'niren ninoori nogwe, inawooluwak paga o kota yime wonogwe nogo inoorogo piigwi, eerukwak, nit mbet-mbet aret kole mbaganuwi o.”

¹⁵ Yorage mbareegi, at awuri nogo nen inowe endagembogut Ndawut yogwi, “E o, ninogoba. Kat ari keenok mban nit kayeloman mini eeruwok nduk, pipuk aago ogoorik o.”

¹⁶ Yogo mbareegwa, at Ndawut nogo akuwi-apurilogwe inom, at inom menggaarak inom, abok aret mbaganggo logonet, akuwi ayeloman mendek wogo ineebe 10 nogo mban at awi o nggwok abe wurik nogo arum logowak nduk, piinok, wundi nogo nogogwaarik,

¹⁷ at Ndawut inom, inom nogogwaarak inom, abok aret o kota irip me time aret ari nogogwaarak.

¹⁸ Ari nogwe me, at inom yabu eeko menggaarak inom, it aakumi o Kereti mendek inom, Peleti mendek inom, aa'nduk Ndawut o Nggat nen wage me it Nggat mendek ineegin warak enam ratus inom wogogwaarak nogo inom, nen aap endagembogut Ndawut aaganapuri inom nogwe me, peleppiigak inaa'nduk ari nogogwaarak.

^19-20 Ari nogwe iigak, aap endagembogut nen aap o Nggat mendek Itayi nogo yoge logonet, “Kat kawi alom paga nen mbo pagareegwaarak ninenggela'me aap nggiru negen ari wagagindak me, nonggop nduk ninom nogo ogoorik? Kat ninom yaye mbanggak nugu logowok o, yokkiriyak op aret kwe, kat yogondak iluk aret neya wagandak o. Ndi, an kunduk, noorak neenggo'lek me, aap endagembogut Abatalom ti, kimbirak logonok nduk, kiyokan nage logonet, kowe-kawot wogoren aret nak o. Ndi, nage keegak, at Aliku ALA kabuwa nen liirogon ndegenggake logowak o.”

²¹ Yoreegerak kwe, at Itayi nen aap endagembogut yoge logonet, “Kat nowe kendagembogut o nggeeme nage logomenggendik, wonage logonet, kambuurak kenok, keenik logorak kenok, an kayeloman nimbirak time aret wonage neyaamunggun o, yinuk, abet mba'nok nduk, at Aliku ALA endage inom, kat kendage inom, kumbunuk yokkigi o.”

²² Yoge mbareegi, Ndawut nen Itayi yoge logonet, “Op aret yagandak me, nage logot o, naput.” Yoge mbareegi, aap Nggat mendek Itayi nogo awuri wim eeka inom, it inaaganapuri inom, abok aret nen at Ndawut aaganapuri inom inambokan piigak nogogwaarak.

²³ Ndi, Ndawut at inom menggaarak nogo abok aret inawi kota nogome mbo punuk, wundi nogwe iinok, it aakumi o time wonogwe nogo abok aret inoone nggwok paga inale yogwe iigak, niyo Kiriron wunda nanuk, o karume time aret nogogwaarak.

²⁴ Ndi, aap Tarok nogo it aap Lewi mendek inom Ala aloobut mbanak wone yugu yonggolak nogo eewurik wonok, inom nogo nogogwaarik, taati punuk iigak, at Abiyatat Ala ake warogo wogogak eeke kagak, aakumi nogo o kota nen age yobok togon wundi nogogwaarak.

²⁵ It abok aret wundi nogo mbareegwa, aap endagembogut nen Tarot nogo yoge, “Aliku ALA nen an nabuwa mba'nuk, peebi o Yerutalem, Kiyokan nak o, yo'nege kenok, aloobut mbanak inom, at wonage menggim inom, nenegen ka noorak me, Ala aloobut mbanak yi, iyokan o kota wonok pi nak o.

²⁶ Ndi, Ala nen, Kat an ninikilom lek aret o, yo'nege kenok, ti op mban aret me, at eeppaniyak mbake kenok ti aret eeppanege logowak o,” yinuk, yoreegerak.

²⁷ Ti yoge nagagerik, aap endagembogut nen at Ala unde Tarok nogo ambinom yoge logonet, “Kat kobagari negen yaga nogo lek a? Kat ti mendek aret me, kaput Akimaat inom, at Abiyatat aput Yonatan inom, kinom kiniki ugun aret kiniyokan kiname o kota time nogo logonip o.

²⁸ Ndi, an niyo wunda nogo menggam karume time wonage me, wone yogop-ndogop yogwe iinok, an yo'niri woro o.”

²⁹ Yorage mbareegi, Tarok Abiyatat imbirak Ala aloobut mbanak nogo wonok, iniyokan o Yerutalem wogo nogogwaarik, time aret wonogogwaarak.

³⁰ Ndi, at Ndawut nogo iyok ogut nggoorogo pege, ayum anobak paga nobakkolage, ee'nuk, le agan puut Tayitun lagi nage mbareegi, it aakumi inom nogwe nogo kunduk, abok aret togop mban inayum inanobak paga nobappunuk, le agan lagi nogogwaarak.

³¹ Laganggwi iigak, aap ambi nen Ndawut yoge logonet, “Abatalom oreewi inom nen kat tebenogo pagarak iniki ambit eeppunuk, koonggwi nogo, aap Akitoben inom aret koonggo agaarik o.” Yogo mbareegwa, at Ndawut nen konembunuk, Aliku ALA yoge, “Kaliku nogoba ALA wae. At Akitoben wone koonogo yorage nogo, Wi negen agan nege agaarik, mbaruwak nduk, eeppu o,” agan puut kirin paga ari laganeegerak.

³² Puut kirin paga lagangge nagagerik, Ala alut eeko menggam puut paga time wonage me, aap Ariki mendek endage Kutayi ayum nibinogo pake, anobak paga purok yikut eekkolage, ee'nuk, Ndawut ka lagi nage mbareegi,

³³ Ndawut nen at yoge logonet, “An nage me kat nimbirak noorak kenok, aaninggin eerogo panukwak,

³⁴ kiyokan o kota nage logomenggendik, an nake at Abatalom yoge logonet, Kat nowe kendagembogut wae. An aa'nduk kat kogoba ayeloman aret wonagagirak kwe, yogondak nen kat kayeloman aret logokit o, yinuk, yoge kenok, ayeloman eeppagamenggerak wonage me, aap Akitoben nen wone inikime manabi nage kenok, kat nen yale-pale eerogo pege logomunggun o.

³⁵ It aap Ala unde Tarok Abiyatat imbirak kinom time logomunggun nogo lek a? Kinom logomunggun aret me, aap endagembogut awi o nggwok abe wurik me nogome logonet, karuk konengge logomenggendak nogo, abok aret it mbininogo yorage logonu o.

³⁶ Ndi, it Tarok aput Akimaat inom, Abiyatat aput Yonatan inom, it inogobamini inom nagaarak time wonogwe me, wone kat konenemenggendak abok aret it wologwe ti nen an yo'niri wogo logowak nduk, nappiya wagak eeke logonu o,” yoreegerak.

³⁷ Yoge mbareegi, Ndawut oreeluk Kutayi nogo o Yerutalem unggwi wage me, ne ti eyom paga aret at Abatalom nogo, nogome unggwi wagagerak.