2 Tamuwen 12 - Ala Wone Peenok Peebi Mbanak

At Natan nen Ndawut iniki wakkolaawak nduk, yoreegerak wone

¹ At Aliku ALA nen Ndawut wone yoruwak nduk aap Natan nappi wagagerak wage nagagerik, yoge logonet, “Aap mbere o kota ambit me wonogo logonet, ambi eenggi warak, ndi, ambi eenggi lek, wonogogwaarak.

² Aap eenggi warak nogo aanggumi kambin-ndomba inom, lembu-tapi inom, ambik aret wonagagerak.

³ Ndi, aap eenggi lek nogo perak, aanggumi abu lek aret kwe, ndomba aagaluk kooli ambit mban kunggolage nagagerik, aap ambi apuluk kolaga iniki kunik menggi kwak, ambi-agi nengge logonet ndomba nogo magage, ogome punuk nogo yege, eeke logonet, apurilogwe inom ndak-ndak aret tawe eeginake nagagerak.

⁴ Ne ambi paga aap nggiru ambi aap eenggi warak nogo ka wage mbareegi, aap eenggi warak nogo nen, Aap nggiru neya wagaarak yi, naanggo ndomba ilik, tapi a, abugo lariyak neebi, mba'nuk, aap eenggi lek aanggo ndomba aagaluk kooli ambiriluk nogo aret wagangge nagagerik, warogo aap nggiru at ka wagagerak nogo abugo lareegerak o,” yinuk, yoreegerak.

^5-6 Yoge mbareegi, at Ndawut nogo konembunuk, anini ambik age nagagerik, Natan yoge, “Aap ti, abuwa mbaka'lek eekerak me, aanggo 4 awi yakkage, ndi, kambuwak nduk, eebe warogo pege, eeriyak op aret mbarenok nduk, Aliku ALA endage kumbunuk, yokkigi o,” yinuk, yoreegerak.

⁷ Yoge mbareegi, at Natan nen Ndawut yoge, “Aap yagarak ti, kat aret o! At Aliku Iterali inogoba Ala nen ari logonet, At Ndawut nogo Tawun eenggime nen ndinogo punuk, aakumi Iterali inowe endagembogut logowak nduk, leenogo pege,

⁸ at ogoba Tawun awi o nggwok abe wurik nogo wogoge, at ogoba Tawun akuwi at ogome logowak nduk wogoge, ndi, it aakumi Yekura mendek inom, Iterali mendek inom, inowe endagembogut logonet, inarum logowak nduk mippege, eereegirak kwe, ti meek mba'nuk, Ambinom wo'niruwak, mbake kenok ti, wogoriyak aret kwe,

⁹ nonggop nduk, Naliku an ALA ari minggirak, Meek, nomba'nuk, nenggaanom paga maluk eekerak? At nen aap Ket mendek endage Uriya nogo, waruwak nduk, aap Amon mendek ineenggime pi nage nagaarik, eebe wako mbaka, akwe nogo at aret waganggerako.

¹⁰ An, Meek, nombake logonet, aap Ket mendek endage Uriya akwe nogo, at aret waganggerak me, aakumi inawooluwak at apurilogwe-ombowologwe wiganak ineebe paga andokon age logogin areto, yinuk, yegerak me, yokkigio.

¹¹ At Aliku ALA nen ambi ari logonet, Apuri lombok nen aaninggin-paaninggin at oba pugwi, at enegen kagak akuwi ndinogo at imbirak menggerak wogoge neenok kin paga wurinake, eeruwak nduk, eeppiyaagino.

¹² At nen kote eekerak kwe, an nen it aakumi Iterali mendek abok aret inenggaanom kin paga aret eerigin, yegerak me, yokkigio,” yinuk, yoreegerak.

¹³ Yoge mbareegi, Ndawut nen Natan yoge logonet, “An nen at Aliku ALA maluk aret eeppigirak kagio.” Yoge mbareegi, at Natan nen at yoge logonet, “At Aliku ALA nen komaluk nogo lek eerogo pagagerak me, kat kambumunggun lek aret kwe,

¹⁴ kat eekendak paga at Aliku ALA awim nen, At Aliku ALA ti, meek aret kogoo, yinuk, agi'ndok kanggwi me, kapuluk kobaane'me pakendak nogo ti, kambigin areto,” yinuk, yoreegerak.

Ndawut apuluk kambeegerak wone

¹⁵ Yoge nagagerik, at Natan nogo ame aret nage kagak, aap Uriya akwe Ndawut wagangge nagagerik, obaane'me pereegerak wulaga nogo, at Aliku ALA nen andi eeppereegerak.

¹⁶ Eeppege mbareegi, at Ndawut nogo wulaga ti paga, mbi niyo nengga'lek kagak, oonikiya age kenok, ame unggunuk, nggween paga windak mban logonet, Ala yoge nagagerak.

¹⁷ Yoge kagak, it aap at ame menggaarak inoweewi nogo wogo nagaatik, “Mi'naru o,” yogaatak kwe, mi'na'nuk it inom mbi noorak eebi mbake nagagerak.

¹⁸ Nogo 6 yippunuk, ko'lu wulaga nogo kambeegerak. Kangge mbareegi, at ayeloman mini nogo nen, “Wulaga awo kangga'lek eenik kagak Ndawut yogoorak nogo aruk konengga'lek kogoorak me, yogondak, Eebe kanggerak o, yogwi niinok, at aret wakkolookwak, yoriyak ninagabiti o,” yinuk, wulaga nogo kanggerak yorulik puk aret ogogwaarak.

¹⁹ Puk ogo nogogwaarik, it at ayeloman mini nogo inoone yagap wone paga mban yogwe at Ndawut enegen iige nagagerik, “Wulaga nogo muk aret kanggerak kagi,” mba'nuk, it yorage logonet, “Wulaga nogo muk kanggerak ilik?” Yorage mbareegi, it nen at yogo logonet, “E o. Muk kanggerak o, ninogoba,” yoreegwaarak.

²⁰ Yogo mbareegwa, at Ndawut nggween paga windak wonagagerak nogo mi'nage nagagerik, ngguu'mo wake, amburu agabolo paga mbenanggolage, ayum abe yirikkolage, ee'nuk, Aliku ALA awi wurik me unggwage nagagerik, Ala alut eereegerak. Alut eeppunuk, ame wage nagagerik, “Mbi wo'niri woraanip o.” Yoragagerak wogori wogo mbareegwa, nenggegerak.

²¹ Nengge mbareegi, at ayeloman mini nen at Ndawut yogo logonet, “Kat kapuluk kangga'lek kagak mbi mbo pege, le ari, eeke keegoorak kwe, yogondak eebe kangge mbaki, kat mi'na'nuk, mbi nengge ti, alom ngge nduk eeke agandik?”

²² Yogo mbareegwa, at Ndawut nen it yorage logonet, “An napuluk andi kenok, mbi niyo nengga'lek logonet, le ari neegotak nogo ti, wulaga kambigin ilik, at Aliku ALA nabuwa nen eenik eeppigin a? nogo ti, nit ambi nineenggo'lek me, eekirak o.

²³ Togop eekirak kwe, yogondak napuluk ti, muk aret kanggerak me, an mbi niyo nengga'lek logorak ti paga at eenik arigin mbakop? Lek aret o. At nen iyokan an neya woraagin lek o. An perak, at wonage me aret ka nagin o,” yinuk, yoragagerak.

Talomo nda'nagagerak wone

²⁴ Ti'nuk, at Ndawut nogo akwe Mbatiyeba iniki eyak wappege nagagerak. Iniki eyak wappege nagagerik, kwe nogo imbirak nogo yege mbareegi, abila age nagagerik, aagaluk aap aret ndareegerak me, endage Talomo tooneegwaarak. Ndi, at Aliku ALA nen wulaga ti, iniki kunik eeke logonet,

²⁵ Natan yoge, “Wulaga ti, an niniki kunik aret me, at endage, Yeriya, tooni nak o,” yoreegerak.

At Ndawut nen aap Amon mendek iname Araba tebeneegerak wone

^26-27 Ti eekwi iigak, at Yowap awuri inom nogo nen aap Amon mendek iname o Araba nogome abu tebenggola ungguwok nduk, eeko logonet, Ndawut yori woraawak nduk, awuri yorage, “An aakumi o Araba mendek ninom wim nambuko logonet, niyo nonggo menggam muk aret tebenggirak wonage me,

²⁸ o ti, an nen tebengge neegak, aakumi nen, Yowap nen tebeneegerak, yogo logokwak, at Ndawut nen it aap wim nambuka eegu wonogwe ti, kuwak eeppiinok, o kota Araba yi, inom wim eeko logonet tebeni woraawak o,” yinuk, wone eerogo nappiya wagagerak.

²⁹ Nappiya wagagerak wogo nogogwaarik, at Ndawut yogo mbareegwa, Ndawut nen at awuri wim eeka nogo abok aret kuwak eeppiinok, nogo nogogwaarik, o Araba oba kwi'nari unggunuk, o nogo tebenggologogwaarak.

³⁰ Tebenggologo nogogwaarik, aap inowe endagembogut enggare-nggare mbuti emas paga ogobakkigirik yugum kere'li-kere'lo aago pugunik aaninggin 34 wakkagak anobak paga yirik nogo, wagangge nagagerik, yirikkolage, yi mendek ndi mendek o kota wonage kugun wogo apit aret wagangge, eeke nagagerik,

³¹ it aakumi Amon mendek inawi kota-kota tebenggolage kenok, yabu eeko logowak nduk, eeppiige nagagerak me, it aakumi o kota Araba menggaarak nogo wogonake nagagerik, nggege wogorage, mbuti tegewa wogorage, yembuti wogorage, eeppunuk, yabu nggwiirit-nggwaarit eeko logowak nduk, yugum worako menggam piinok, Ndawut awuri wim eeka inom abok aret o Yerutalem iniyokan wogogwaarak.