2 Tamuwen 11 - Ala Wone Peenok Peebi Mbanak

Ndawut nen kwe Mbatiyeba maluk eeppereegerak wone

¹ Eyo anggup lake menggim eyom paga yi aap ndi aap inendagembogut wim namburi wunggo menggaarak me, tahun ti eyom ari wage mbareegi, at Ndawut nen aap Yowap inom, at awuri inom, it Iterali wim eeka abok inom, aakumi Amon mendek inom wim eeruwak nduk, nappiige mbareegi, nogo nogogwaarik, it Amon mendek inoorogo piigak, o kota Araba tebenuwok nduk, eerit unggwogwe iigak, at Ndawut nogo o Yerutalem aret wonagagerak.

² Nogome logonet, ne ambi paga oonegen kilu yi nage kagak, at Ndawut nogo, nogo yege nagagerik, eenik a'nuk, endagembogut awi o nggwok abe wurik nogo yugum paga ndoonogo maarak awe aago paga nege-wege logonet, kwe ambi abu kigirikwe ngguu'mo wake enegen kagagerak.

³ Enegen kage nagagerik, kin wakka nawak nduk, aap ambi nappereegerak yori nage nagagerik, Ndawut yori wage logonet, “Kwe nogo ti, aap Eliyam aput aap Ket mendek Uriya akwe Mbatiyeba aret o.”

⁴ Yoge mbareegi, at Ndawut nen aap ambi kwe nogo wa nawak nduk, nappereegerak wonok iri wage mbareegi, kwe nogo kumi tut kogwe iinok, “Yogop logorak,” yugu nogo abu aret agagerak me, imbirak nogo yege nagagerik, kwe nogo ame aret nagagerak.

⁵ Ame nage nagagerik, abila age mbareegi, at kwe nogo nen, “An nogo muk nabila agarak o,” yinuk, Ndawut wonage me wone agago nappi wagagerak.

⁶ Wone agago nappi wagagerak nogo at Ndawut konengge nagagerik, at Yowap paga wone agago nappege logonet, “Aap Ket mendek endage Uriya ti, an wonage me yime mbet-mbet nappi omok o.” Yoge mbareegi, at Yowap nen Uriya nogo Ndawut wonage me nappi wagagerak

⁷ ka wage mbareegi, at Ndawut nen Uriya yoge logonet, “At Yowap inom, it aakumi Iterali apit inom, wim eekwi nogo inom, nonggop iigak wagan o?”

⁸ Yinuk, abu aret yoge nagagerik, “Kat yonggonggolage kame nogo yi nak o.” Yoge mbareegi, at Uriya nogo aap endagembogut awi o nggwok abe wurik me nen wundi nage kagak, at Ndawut nen amendek ambi wonok iri nawak nduk, ambo'me nappiyareegerak.

⁹ Togop eereegerak kwe, at Uriya nogo ame noolik. At ogoba Ndawut ayeloman mini ame arum menggaarak nogo, aap endagembogut awi o nggwok abe wurik tu unggwogo menggam time inom nogo yereegerak.

¹⁰ It aakumi nen, “Uriya nogo ame noolik o,” yinuk, Ndawut yogo mbareegwa, at Ndawut nen Uriya yoge logonet, “Kat wim eekwi me o nda nen wagandak nogo lek a? Nonggop nduk kame noolik yime puk agandak?”

¹¹ Yoge mbareegi, at Uriya nen Ndawut yoge, “Ala aloobut mbanak inom, ineegin warak Iterali mendek inom, Yekura mendek inom, ooliya-ooliya wurik me wonogwe, ndi, an nogoba aap Yowap inom, nogoba kat kapuri inom, it kunduk, o endekem inawooliya wuppatinuk wonogwe, eekwi iigak, an name nage logominggirik, mbi inom, niyo inom, nenok, nakwe nimbirak nogo yuurak op mbaken? An togop eeri noorak meek nomba'nok nduk, kendage kunogo yokkigi o,” yinuk, yoreegerak.

¹² Yoge mbareegi, at Ndawut nen, “Abu aret yagandak me, ne yogondak yi, ambinom yime puk logomenggendik, ko'lu kuubondendok, Nak o, yokkege neenok aret namunggun o,” yoreegerak. Yoge mbareegi, ne ti paga at Uriya nogo o Yerutalem time puk agagerak

¹³ wonage me, ko'lu at Ndawut nen mbi imbirak nawok nduk, “Omok o,” yoge nagagerik, mbi inom, amburu inom, imbirak nonggo logonet, at Ndawut nogo nen Uriya kumili kunuwak nduk, anggur amburu wogoreegerak ambik aret nengge nagagerik, kumili kuneegerak kwe, oonikiya ame noolik. At ogoba ayeloman mini ame arum menggaarak inom nogo yereegim nogome nogo yi nagagerak.

¹⁴ Ndi, at Uriya nen wonok Yowap wogori nawak nduk, ko'lu kuubondendok at Ndawut nen at Uriya eeppuurak liiru mbangge logonet,

¹⁵ “Yowap wae. Aap Uriya ti, waremenggaarak kambuwak nduk, kat nen wonok wim eenggabit kumbunuk nambukwi iigak, aa'nduk eeppunuk, pi nage logomenggendik, kat kakom niru yi wundi wa'nuo,” yinuk, liiru mbanogo wogoreegerak wonok Yowap iri nagagerak.

¹⁶ Wonok iri nage mbareegi, at Yowap nogo pekkage nagagerik, ne ti eyom paga o kota Araba wonogwe nogo inoba kwi'nari unggwogo logonet, Uriya nogo wonok aap wakaa'ngget wim nambukwi iige menggim time pi nage mbareegi,

¹⁷ aap o kota time mendek wundi woraanuk, Yowap awuri inom wim nambuko logonet, it Ndawut awuri ineegin warak ando inookwi, ndi, aap Ket mendek endage Uriya nogo kunduk, warogo pugwi, eereegwaarak.

¹⁸ Eeko mbareegwa, at Yowap nen wim eerit nogogwaarak nogo, Ndawut mbininogo yori woraawak nduk, wone eerogo nappi wage logonet,

¹⁹ “Ninookaarak wone yi, abu aret mbinik-mbenak eerogo yoge keenok,

²⁰ at endagembogut Ndawut nogo aruk konembunuk, anini nen yokkege logonet, Ninawim pak wurik irimbaga nen ninoorogo wuppi woroorak mbaka'lek nonggop nduk inawi kota ti paga panggok togon nogotak?

²¹ Ta nen aap Yeru-Mbetet aput Abimelek wareegerak mbakop? Kwe ambi nen aret yugum pak wurik irimbaga nen yugum gandum aambiranggak tumbu nogo paga oba kwippereegerak o Tebet taati aret kambeegerak nogo lek a? Togop ee'ninaburak mbaka'lek nonggop nduk, inawi pak wurik me panggok togon nogotak? yokkege kenok, kat nen at Ndawut onggo yoge logonet, Ndi, kayeloman aap Ket mendek endage Uriya nogo kunduk, wakaarak kanggerak, yorumunggun o,” yinuk, eerogo nappereegerak.

²² Nappege mbareegi, aap nogo Ndawut owagam wage nagagerik, Yowap nen yoreegerak nogo abok aret mbinik-mbenak eerogo yoge logonet,

²³ “Nit ninawim nogo ti, nit ndak-ndak lek inomaawi ambik aret me, iname o kota time nen karume wundi wa'nuk ninom wim perenggologo logonet, muguren tungga ambe mbanak paga time ari nogoorak me,

²⁴ it nen yugum pak wurik irimbaga nen nit kayeloman mini ninooruwok nduk, maale namburogo wuppi wogo logonet, it kawuri ando inookwi, ndi, aap Ket mendek kayeloman Uriya nogo wakwi, eekaarak o,” yinuk, yoreegerak.

²⁵ Yoge mbareegi, at Ndawut nen aap wone yori wagagerak nogo yoge, “Wim eeko logonet, aap inetenggen yomboonogo inookulik ugun aret inooko menggaarak me, aap Yowap iniki ma'narugurik o. Ata, iniki nu'lek ogogumbuk a'nuk, awim inawi kota paga kwi'nari unggwage logomenggerik, mondok pup eerogo piyoorak wakkenet unggwage logowak nduk, wone yi yori nak o,” yinuk, eerogo nappereegerak.

²⁶ Ndi, aap Uriya akwe nogo nen ogonggelo Uriya wareegwaarak kambeegerak aruk konengge nagagerik, arigi nen leenggu maareegerak.

²⁷ Maake nagagerik, ogonggelo erabun ndoombunuk wonagagerik, tu mbaninuk wundi wage mbareegi, at Ndawut nen kwe nogo wa nawak nduk nappiyareegerak wonok iri wogo mbareegwa, kwe nogo at aret kolagagerak me, time logonet, Ndawut obaane'me aagaluk aap aret ndareegerak. Ndi, at Ndawut ti eereegerak paga at Aliku ALA nen, “Maluk lombok aret eekerak kagi,” mbareegerak.