2 Tamuwen 10 - Ala Wone Peenok Peebi Mbanak

Aakumi Amon mendek inom, Aram mendek inom, tebenogo piyareegerak wone

¹ Ti'nuk peebi, ne ambi paga aap Amon mendek inowe endagembogut kangge mbareegi, at aput Kanun ogoba obaane'me aap endagembogut agagerak.

² Age mbareegi, at Ndawut nen ari logonet, “At Kanun ogoba Nakat nogo ti, an iniki kunik ee'nake logonet, obeelom eeppanege nagagerak nogo kokwak, aput Kanun niniki kunik logonet, obeelom eeppikit o,” yinuk, ogoba kambeegerak iniki eyak wappuwak nduk, at inom yabu eeko menggaarak nogo nappiyareegerak. Nappiyareegerak nogo, o Amon ari nogo mbareegwa,

³ it aakumi Amon mendek inoweewi nagawan-nagawan nen inogoba Kanun nogo yogwi, “Kat kogoba kanggerak nogo, abuwa nen kiniki eyak wappagarak nduk, Ndawut nen awuri nappiya wagaarak mbaken? Lek o. Ata, o kota yime tebenggolaawok nduk, inigen yambik-yambok eeri wagaarak yi lek a?”

⁴ Yogo mbareegwa, at Kanun nen it aap Ndawut awuri nappiyareegerak nogo pippiinok, inamboro abeenok mban mbanogo piige, inayum nggorek yirik nogo inakom kuli mbanogo piige, eerogo piinok, “Kiname nanip o,” yinuk, nappiya wagagerak.

⁵ Nappiya wage mbareegi, it nogo inenggali nen Ndawut wonage me woroolik. Ata, at Kanun nen eeginabeegerak nogo, Ndawut yori wogo mbareegwa, aap endagembogut Ndawut nen, “Kinamboro wungge kenok woraabagip nduk, o Yeriko time puk a'nip o,” yinuk, wone eerogo nappiyareegerak.

⁶ Ndi, it aap Amon mendek nen mbako logonet, “Nit eekoorak paga at Ndawut nen obari maluk kogo mengga kwak ninombake kogo o.” Yogo nogogwaarik, wim eekwi iinok, onggo wogoraawok nduk, aap wim eeko logonet, iniyok paga nugu menggaarak Aram mendek o Mbet-Erekop wonogwe nogo inom, o Toba wonogwe inom, ineebe apit lambunik dua puluh ribu wogonakwi, it aap o Maaka mendek inowe endagembogut awuri wim eeka ineebe seribu wogonakwi, ndi, it aap wim eeka o Top mendek ineebe dua belas ribu wogonakwi, eereegwaarak.

^7-8 Eeppunuk, Ndawut inom wim namburuwok nduk, it aap Amon mendek nogo iname nen wundi wogo nogogwaarik, it inawi kota tu unggwogo menggam taati ina koombunuk wonogwe iigak, it aap Aram mendek o Toba nen wogogwaarak inom, o Erekop nen wogogwaarak inom, it aap o Top mendek inom, aap Maaka mendek inom, wogogwaarak nogo nen o karume time inalik ina koombunuk wonogwe, eereegwaarak nogo at Ndawut aruk konengge nagagerik, aap Yowap awuri wim eeka wakaa'ngget abok aret it aakumi ti, inom wim namburuwak nduk, nappiyareegerak.

⁹ Nappiige mbareegi, Yowap awuri inom nogo nogogwaarik, inawim mendek nogo inambo'me-inaame nogome abok yengget-wangget eereegwaarak wonogwe nogo, aap Yowap enegen iige nagagerik, at awuri Iterali mendek aap wim abu wakaa'ngget kero mban it Aram mendek inom wim eeruwak nduk, leenogo piige,

¹⁰ ndi, it Iterali mendek ineegin warak apit negen mogonogo awuluk Abitayi inowe a'nuk, aap Amon mendek inom wim namburuwak nduk wogoge, eeke nagagerik,

¹¹ awuluk Abitayi nogo yoge logonet, “An aap Aram mendek ninom wim namburiyak nduk wakkaminggirak kwe, it inomaawi age kenok ti, kat nen an yeenggwa niri wage, ndi, kat eeke me time aakumi Amon mendek inomaawi age kenok ti, an nen kat yeenggwa kiri nage, eeruwok o.”

¹² Yoge nagagerik, “Kogogumbuk nu'lek logot o. It aakumi nit mendek inili eerogo piigwi, ninogoba Ala nen kota-kota wo'niragagerak ili eerogo pugwi, eeruwok nduk, ninogogumbuk wakaa'ngget eeppunuk, wim eekwi niigak, at Aliku ALA nen eeppinaniyak mbake nogo mban eeppinanege logowak o,” yinuk, yoreegerak.

¹³ Yoge nagagerik, at Yowap awuri wim eeka leenogo piyareegerak nogo inom nen aap Aram mendek inom wim namburuwok nduk, nogo mbareegwa, inayuk nen aap Aram mendek nogo kole mbaganit nogogwaarak.

¹⁴ Ndi, it aakumi Amon mendek nen it Aram mendek mbaganit nogwe nogo, inigen iigo nogogwaarik, it kunduk, togop mban aap Abitayi ayuk nen mbaganit o kota nogome unggwi nogogwaarak. Unggwi nogwe iigak, aap Yowap nogo it aap Amon mendek abu aret mugogo nappiige nagagerik, iyokan o Yerutalem wagagerak.

¹⁵ Ndi, it aap Aram mendek nogo yogo logonet, “It Iterali mendek nen abok aret ninooko logonet, mappinanggaarak kogo o.” Yogo nogogwaarik, ambinom kuwak ari wogogwaarak.

¹⁶ Wogo mbareegwa, at Kararetet nogo nen it aap Aram mendek niyo Eparat enebagan wonogwe nogo woraawak nduk, yonggo nappiige mbareegi, aap Kararetet awuri wim eeka inowe Tobak nen wogoren o Kelam piya wagagerak.

¹⁷ Piya wagagerak nogo at Ndawut yogo mbareegwa, at Ndawut nen aakumi Iterali abok aret kuwak eeppiige nagagerik, wogoren niyo Yoraran wunda nanuk, o Kelam nogo mbareegwa, it Aram mendek nogo nen Ndawut awuri inom wim namburuwok nduk, ina koonogo punuk, inom wim nambureegwaarak.

¹⁸ Nambuko mbareegwa, it Aram mendek nogo Iterali inayuk nen mbaganggwi iigak, at Ndawut awuri inom nen it aap nggweendo wim eeka wonok nega nogo ineebe tujuh ratus inookwi, it aap wim eeka iniyok paga nogo menggaarak ineebe empat puluh ribu inookwi, eeko logonet, it Aram mendek wim eeka inowe Tobak nogo inom aret wareegwaarak taati aret kambeegerak.

¹⁹ It aakumi inoweewi inendagembogut aap Kararetet abu'me logonet, oone konenggo nogogwaarak nogo nen yogo logonet, “It Iterali nen abu aret tebenogo pinanugwi iigo o.” Yogo nogogwaarik, it Iterali inom paalungga wappunuk, inabu'me logonet, inoone konenggo nogogwaarak. Ti eereegwaarak paga it aap Aram mendek nen aakumi Amon mendek yeenggwaaroorak inagabiti ogogwaarak.