2 Korindut 2 - Ala Wone Peenok Peebi Mbanak

¹ Togop me, niniki mbake logonet, “It eereegwaarak paga an niniki wakkolage nogo, lek aga'lek kagak iya noorak lek aret,” mbareegirak o.

² An niniki wakkolage neenok, niniki eyak wappaniyak kit aret me, niniki puru agan kiya wage logominggirik, mbekkirage paga kit kunduk kiniki wakkologwe me, taamini nen an niniki eyak wappanemengga? Lek aret o.

³ Liiru aa'nduk mbaneegirak nogo ti, an niniki ale'nggen wonage neenok, kit togon kiniki ale'nggen wonogwe abet aret mbake me, kiya wage logominggirik, kit obeelom eekwi paga niniki ale'nggen kinombarikit lak, maluk eekwi paga niniki wakkolookwak me nduk, puk age logonet, liiru mban aa'nduk mbanogo nappi wagagirak nogo o.

⁴ Niniki aaninggin ndugu agan unggwage logonet, niniki wakkolage, kinale ambik ari, eeke logonet, kit kinake liiru mbaneegirak nogo ti, kit kiniki puru yubagip nduk mbanggiroolik o. Ata, kinabuwa nggwok lombok mbake minggirak kineenu arubagip nduk mbanggiragagirak o.

Aap ambi maluk eeke kenok, mari eerogo puurak wone

⁵ At aap maluk eereegerak paga nit niniki wakkologwe nogo ti, an nalik mban lek o. Nit abok aret maluk eeppinaneegerak o. Ndi, “Nit abok aret maluk eeppinaneegerak,” yuurak meek kenok, kit ando nen, “Maluk eeppinaneegerak kenok, niniki wakkologwe o,” yuurak op aret me, yokkiragi o.

⁶ Kit aa'nduk kineebe apit nen maluk onggo eeppereegutak ti mban aret logowak nen teppinip o.

⁷ Yogondak perak, aap nogo iniki wakkolage logonet, mbo pinaganuk mbaganukwak, eereegerak nogo mari eerogo mbo pogo logomonggotik, iniki eyak wappogo logonip o.

⁸ Kiniki abe paga at abuwa lombok mbako logonet, kiniki kunik eeko logobagip nduk, yokkiragi o.

⁹ An liiru kinake mbaneegirak nogo ti, yi eeriyak ndi eeriyak yokkirage neenok, “E o,” yinuk, “Ndak-ndak eekwi iyaamun ilik, mbo pugwi iyaamun a?” yinuk, kinabut mbanikit nduk liiru mbaneegirak o.

^10-11 It aakumi maluk eeppinagagwi nogo kit nen inomaluk mari eerogo mbo pugwi kiinok, an kunduk, inomaluk mari agago mbo pege logogin o. Ibilit nen eeriyak koongge menggerak nineenu me, nit nen aap ambi omaluk aberak wonogwe niinok, Ibilit nen, “Nanonggwan aga o,” yinuk, niniki nggagani wage menggerak me, maluk eeppaneegerak mari eerogo puurak, “Ambi wonage ilik, lek a,” ti, liirogon an neenggo'lek kwe, “Wonage negen aret,” mba'nuk, kinake aret Keritut enggaanom paga paganogo punuk mari eerogo mbo pereegirak.

Pawulut iniki piirik wonagagerak wone

¹² An Keritut eeke nagagerak obeelom wone yoraakit nduk, o Torowat wage nagagirik, obeelom wone yorage logokit nduk, “Ala nen tu koonogo paneegerak kagi,” mbareegirak kwe,

¹³ nawot Titut neya waga'lek mbareegi, niniki piirik logonet, it aakumi Torowat mendek keyage wappiinok, o Makendoniya yime aret wagagirak.

Keritut ninom ndegen-ndegen nugu logorak wone

¹⁴ Yime wagagirak wonage me, Ala nen mbo panulik o. It aap wim nambuppunuk, “Wi!” iraawak nduk, aap waka'ngget awuri inom ndegen-ndegen aago kombogonak wogo mengga kwak, nit ndak-ndak ninowe Keritut eegin tiyak ari kenok ninom ndegen-ndegen aago mondok tiyanak nugwi me, Ala mondok alut eeko logowok o. Obari obeelom wiganinuk nage menggi kwak, Keritut eeke menggerak obeelom wone nit paga nen wiganinuk nage logowak nduk, Ala nen eeppinanege menggerak.

¹⁵ It aakumi inagap ndarak inom, inagap ndarak lek mendek lek eerogo piige inom, inenggela'me logonet, obari abe Keritut nen Ala ake kungge menggerak nogo pogom nit aret o.

¹⁶ It aakumi lek eerogo piyaagin nogo nen obari nogo kogo nagaatik, “Yi ninooke menggerak mendek aret me, abet mbaruwok o,” yinuk, yuurak op aret kwe kagak, mbo punuk kambit nogo menggaarak. Ndi, it inagap ndarak nogo nen perak, obari kogo nagaatik, “Nineenik ee'ninaburak mendek yi aret kogo,” yinuk, waganggo menggaarak me, ineenik aret logogun o. Ala nen nit aakumi inenggela'me togop logorak kooneegerak kwe, nit nen eeriyak meek tit ee'ninake o, obak!

¹⁷ It ando nen Ala wone yorogwe paga, “Ambi kolaawok o,” yinuk, yokkirogo menggaarak kwe, nit perak, togop lek o. Yokkiraawok nduk, Ala nen nappinani wagagerak me, at enegen kagak Keritut ayeloman logonet, we ale'nggen paga aret yokkirogo monggoorak.