2 Endagembogut 7 - Ala Wone Peenok Peebi Mbanak

¹ Ti yoge mbareegi, at Elita nen onggo yoge, “Aliku ALA nen wone ari yi, karuk liirogon konenu o! At Aliku ALA nen, O Tamariya tu unggwogo menggam time ne yogondak yi ndak-ndak ko'lu wu we mbuuluk mbuti perak ambit paga gandum anggen yigirik togolowak 8 wakkagak kunggwi, ndi, wu mbuuluk mbuti perak we ambit paga waabuk negen jelai anggen mbanak togolowak 15 wakkagak kunggwi, eekwi iyaamunggun, yegerak o.”

² Yoge mbareegi, aap endagembogut inom eeko menggaarak at wonok nega awot ambi nen aap Ala wone liirogon eeka nogo yoge, “At Aliku ALA agi mbogut paga nen yi mendek ndi mendek nunggwi mendek nobarak wonage nogo, tu paarogo ngginu-ngginu eerogo wuppit woroorak kwe, kat eeriyak yagandak nogo ti, eerugun op mbake agandik?” Yoge mbareegi, at Elita nen, “Kat kenegen abe nen kaamunggun kwe, mbi ambiriluk ambi namunggun lek aret o,” yinuk, yoreegerak.

It aap Aram mendek mbaganeegwaarak wone

³ Ne ti eyom paga it aap ineebe 4 inagabolo paga inawin aaga'ne kunik o Tamariya tu unggwogo menggam endekem wonogogwaarak. Wonogo logonet, at ambi nen at ambi yogak eeko logonet, “Nit kambuurak aret kagak nonggop nduk yime mban ogoorik?

⁴ Nit nen, O kota time unggwi nawok o, yinuk, unggwi nogo logomonggoorik, mbi abu nen time kanggwi, ndi, yime mban logogun kenok ti togon, kanggwi, eerugun aret me, it aap Aram mendek inawooliya wuppunuk wonogwe me time, Nit kinabu'me logowok o, yinuk, unggwi namonggoorak teppinanugwi iinok ti, nineenik wonogwe, ndi, ninookwi iinok ti, kanggwi, eerugun aret o,” yinuk, yereegwaarak.

⁵ Togop aret yogo nogogwaarik, o kiip arikit nduk ambe ndonggo agan nage kagak, it aap Aram mendek inawooliya wuppunuk wonogwe me, nogogwaarak. Nogo nogogwaarik, time ineebe ambi wonogwe lek aret iyareegwaarak.

⁶ Aap Aram ineegin warak nogo, kuda iniyogobit oone inom, nggweendo wim eeka iniyogobit oone inom, ndi, it aap wim eeka ineebe apit aago iniyok oone inom, agan wogwe inaruk konenuwak nduk, at Aliku ALA nen eeppiyareegerak paga konenggo nogogwaarik, ambi yogak eeko logonet, “It aap Iterali inowe endagembogut nen ninooriyak onggo it Ket mendek inowe endagembogut inom, Metit mendek inowe endagembogut inom, wogoroorak koonggerak nogo, ninoori wogwe yi aret o,” yinuk,

⁷ oonikiya ti paga inaguda inom, inageledai inom, abok aret inawooliyana time enaani wonage kagak mbo punuk ineebe mban inagap ndakko'nok kole mbaganeegwaarak it aap ineebe 4 nogo nen kogogwaarak.

⁸ Kogo nogogwaarik, it aap ineebe 4 inawin aaga'ne inagabolo paga kunik nogo, aap Aram mendek inawooliya mbo punuk mbaganeegwam nogome ooliya ambime unggwogo nogogwaarik, mbi inom, niyo inom, nenok, mbuti perak inom, emas inom, mbogoyum inom, wonage nogo waganggo nogogwaarik, kiraappi nanuk, ooliyana ambime unggwogo nogogwaarik, yi mendek ndi mendek wonage nogo, togop mban wonok kumaappi nogogwaarak.

⁹ Eeko nogogwaarik, it nen ambi yogak ambi yogak yogo logonet, “Wologwe wae! Nit yi eekwi nogo maluk aret eeko ogoorik o. O yogondak yi, wone obeelom aret eeppinanegerak kagak, nit nonggop nduk, puk mban ogoorik? O weege kero, tokkogwe puk logogun kenok, aaninggin ninoba arukwak, nit aap endagembogut awi o nggwok abe wurik me wonage me, mbet-mbet aret yori nawok o.”

¹⁰ Yogo nogogwaarik, iniyokan o Tamariya woraanuk inoone nggwok paga it aap o kota tu unggwogo menggam arum menggaarak nogo yorogwe, “Nit nogo aakumi Aram mendek inawooliya wuppunuk wonogwe me unggwi nogo nogoorik, inawooliya enaani wonage kagak, aakumi ineebe inom, inoone inom, abu lek we kuda inom, keledai inom, ti mban mbarenak wonogwe iigoorak o.”

¹¹ Yorogo mbareegwa, it aap o kota tu unggwogo menggam arum menggaarak nogo nen inoone nggwok paga yogo mbareegwa, aap endagembogut awi o nggwok abe wurik me wonage me, wone yogwe nogo aruk koneneegerak.

¹² Konengge nagagerik, nogo iniki paga at aap inowe endagembogut nogo mi'na'nuk, inom eeko menggaarak nogo wone yorage logonet, “It aap Aram mendek nen eeppinaniyak koonggaarak kagarak nogo an yokkira o. Nit mbi noogelo ee'ninake yi, ineenu me, iniki mbako logonet, It iname o kota time nen wundi wogwe iinok, ineenik ngge-ngge pippiinok, inawi kota time tebenggola nawok o, yinuk, inawooliya mbo punuk, o endekem kumaa'nari nagaarak wonogwe mbaki o.”

¹³ Yorage mbareegi, at inom eeko menggaarak ambi nen aap endagembogut nogo yoge, “Togop kenok, nit Iterali o kota paga wonogwe yi, mbi abu nen kanggwi, ndi, wundi namonggoorak ninookwi iinok kanggwi, eeriyak nogo ti, ndak-ndak aret eerugun me, kuda ineebe 5 o kota yime awo wonogwe nogo, waganogo nonggop agaarak iyaawok nduk, kuda ti paga nappiyaawok o,” yoreegerak.

¹⁴ Yoge mbareegi, nggweendo wim eeka mbere inaguda nikkenok noorak nogo, aap inom leenogo piinok, aap endagembogut nen it aap Aram ineegin warak muguren nawak nduk, yorage logonet, “Nonggop agaarak nogo pegiya nanip o,” yinuk, nappiyareegerak.

¹⁵ Nappiyareegerak it Aram mendek muguren niyo Yoraran kuli paga ari nanuk, it aap Aram mendek nogo nen yi mendek ndi mendek inom, inayum inom, tu paga yumbuk-yumbuk eerogo pit nogogwaarak kogogwaarak. Kogo nogogwaarik, it nappiyareegerak nogo iniyokan wa'nuk aap endagembogut nogo mbininogo yogo mbareegwa,

¹⁶ it aakumi Tamariya mendek inawi kota time nen wunggo nogogwaarik, it aap Aram mendek inawooliya wurik me yi mendek ndi mendek inagugun wa unggwogogwaarak. Ti eereegwaarak nogo ti, at Aliku ALA nen yoragagerak nogo ndak-ndak, wu we mbuuluk mbuti perak ambit paga gandum anggen yigirik togolowak 8 wakkagak kunggwi, ndi, wu we mbuuluk mbuti perak ambit paga waabuk negen jelai anggen mbanak togolowak 15 wakkagak kunggwi, eereegwaarak.

¹⁷ Ne ti eyom aap endagembogut inom eeko menggaarak ambi at wonok nega nogo, o kota tu unggwogo menggam arum logowak nduk mippereegerak me, aap endagembogut nen aap Ala wone liirogon eeka ka wage mbareegi, yoreegerak nogo ndak-ndak, it aakumi nen yi mendek ndi mendek nili-kili kunggo logonet, iniyok aan lebenogo pereegwaarak paga kambeegerak.

¹⁸ Ti agagerak nogo ti, at aap Ala wone liirogon eeka nen aap endagembogut yoge logonet, “O yogondak yi ndak-ndak, ko'lu o Tamariya tu unggwogo menggam wu we mbuuluk mbuti perak ambit paga gandum anggen yigirik togolowak 8 wakkagak kunggwi, ndi, wu we mbuuluk mbuti perak ambit paga waabuk negen jelai anggen mbanak togolowak 15 wakkagak kunggwi, eerugun o.”

¹⁹ Yoge mbareegi, aap endagembogut inom eeko menggaarak ambi nogo nen Ala wone liirogon eeka yoge, “At Aliku ALA agi mbogut paga nen yi mendek ndi mendek nunggwi mendek nobarak wonage nogo, tu paarogo ngginu-ngginu eerogo wuppit woroorak kwe, kat eeriyak yagandak ti, eerugun op aret mbake agandik.” Yoge mbareegi, at Ala wone liirogon eeka nen onggo yoge logonet, “Kat kenegen abe nen kaamunggun kwe, mbi ambiriluk ambi namunggun lek aret o.”

²⁰ Yinuk, yoreegerak nogo abu ndak-ndak o kota tu unggwogo menggam at eebe aakumi iniyok aan lebenogo pereegwaarak me, kambeegerak.