2 Endagembogut 5 - Ala Wone Peenok Peebi Mbanak

Aap Naman awin aaga'ne obeelom eereegerak wone

¹ It Aram mendek inowe endagembogut awuri ineegin warak inowe aap wakaa'ngget lombok Naman aret wonagagerak me, at Aliku ALA nen Naman eegin tiyappege kagak, o Aram obeelom eerogo piige paga ogoba endagembogut nen iniki kunik eeke, wogoppege, eeke nagagerak kwe, awin aaga'ne agabolo paga telek aago wonagagerak.

² Ndi, it aap o a'nggan wagangga Aram mendek nen Iterali inom wim eeko logonet, kolaga Iterali mendek ambi kugun wonok nogogwaarak me, at Naman akwe ake yabu eeke nagagerak.

³ Eeke logonet, ne ambi paga kwe Naman akwe nogo yoge, “Nagalo o. Aap Ala nen yorage kagak yoraga ambi o Tamariya wonage me, at nen nogoba obeelom eeppuurak kagak logukwak, pekka nawak lak, ao, mbake agarik o,” yoreegerak.

⁴ Kolaga Iterali mendek yereegerak nogo, at Naman aruk konengge nagagerik, ogoba endagembogut mbininogo yori nage mbareegi,

⁵ aap Aram inowe endagembogut nogo nen yoge logonet, “Noorak op aret o. Ndi, aap Iterali inowe endagembogut wogoriyak nduk, an liiru mbanogo nappigin o.” Yoge mbareegi, at Naman wage logonet, wu mbuti perak aaninggin tiga ratus empat puluh wagangge, wu mbuti emas aaninggin 70 wagangge, yum agi-ogu yirika 10 wagangge,

⁶ ndi, aap Aram inowe endagembogut nogo nen it Iterali inowe endagembogut liiru paga yoge logonet, “Aap nimbirak yabu eeke minggirak Naman liiru mbanak wonok wage ti, at awin aaga'ne agabolo paga kunik me, obeelom eerenok nduk, nappagi wagi o,” yinuk, mbaneegerak nogo wagangge, ee'nuk wogori wagagerak.

⁷ Wogori wage mbareegi, aap Iterali inowe endagembogut liiru mbanak nogo malengge nagagerik, ayum nibinogo patinuk, ari logonet, “An Ala aret me, aakumi inooke, ineenik aganake, eeke minggirak me nduk, aap awin aaga'ne agabolo paga kunik yi, Obeelom eeppuwak, nomba'nuk, yo'nigi mbakop? An nano paga yilunogo, At maluk eeppikit, nombake nagaarik, liiru mbanogo nappani wagaarak yi kogop a?” yereegerak.

⁸ Ndi, aap Ala wone liirogon eeka Elita nogo nen Iterali inowe endagembogut ayum nibinogo pateegerak aruk konengge nagagerik, wone eerogo nappege logonet, “Nonggop nduk kat kayum nibinogo pakendak? Aap Ala nen yorage kagak yoraga ambi Iterali inenggela'me wonage eenu aruwak nduk, aap ti, nowagam nappi mok o.”

⁹ Yinuk, wone eerogo nappereegerak nogo Naman yoge mbareegi, at Naman nogo anggweendo eege, aguda eege, abok aret at inom Elita arungga paga taati puk ari wagagerak.

¹⁰ Puk ari wagagerak wonage me, at Elita nen wone yori nawak nduk, awot ambi yoge logonet, “Aap Naman niyo Yoraran paga nage logomenggerik, ngguu'mo ne 7 kuli wake kenok, awin ti lek aret age logonet, agabolo wonage menggi kwak arigin, yegerak, yori nak o.”

¹¹ Yoreegerak nogo yori nage mbareegi, at Naman nogo anini aago nage logonet, “At neya wundi wage logomenggerik, nawin andime eenggi tebembaninuk, Aliku ogoba Ala nggino yoge kenok, nawin lek arigin mbakirak kwe,

¹² niyo aakumi Iterali wonogwe me ti iya. Ndi, niyo o Ndamitik endage Abana inom, Parapat inom, ti meek me nduk, yigi mbakop? Niyo ti paga ngguu'mo wake neenok, obeelom ee'naburak nogo lek a?” yinuk, ena logurogon iniki ka'luk aagi negen a'nuk nagagerak.

¹³ Nage me, ayeloman mini nen at Naman owagam ka wogo nogogwaarik, yogo logonet, “Ninogoba o. At Ala nen yoge kagak yoraga nogo nen wone iya eeriyak mendek, Eeru o, yokkege kenok, Eerikit, mbarumunggun ilik, lek a? Ndi, Ngguu'mo wari nage keenok, obeelom eekkabigin o, yokkegerak nogo ti, we negen aret eeriyak me, eeri nak, ubi.”

¹⁴ Yogo mbareegwa, Naman nogo niyo Yoraran inikime unggwi nage nagagerik, Ala wone liirogon eeka nen wone yoreegerak nogo ndak-ndak, ne 7 kuli kuruk yagak mban eeke mbareegi, awin nogo lek aret age logonet, agabolo obaane'me obeelom wologwe inagabolo negen aret agagerak.

¹⁵ Age nagagerik, aap Naman inom nogogwaarak nogo, Naman inom aap Ala wone liirogon eeka nogo ka wogo nogogwaarik, Elita enaame taati logonet, “O nggween paga yime abok Ala wonage lek Iterali inenggela'me mban wonage nogo o yogondak yi paga neenu agarak me, an kayeloman nale'nggen nen wokkege yi, kolet o.”

¹⁶ Yoge mbareegi, Elita nen onggo yoge logonet, “An nen kamendek ambiriluk ambi waagin abu lek o, yinuk, kat abet aret ari nomba'nok nduk, at enggaanom paga eeke minggirak Aliku ALA endage paga yokkigi o.” Yoge mbareegi, aap Naman nen, “Kolet o,” yinuk, nabenak mban yoreegerak kwe, “Neebi o,” yinuk, mbo pereegerak.

¹⁷ Mbo pege mbareegi, at Naman nen, “Ti kenok, yogondak kuli an kayeloman nen Ala obaane'me alik ambi mippunuk ake warogo kani kungge, ake warogo wogoge, eerigin lek Aliku ALA mban ake eeke logogin me, an kayeloman yi, kuda kwak bagal mbere'mbo nen aaninggin wonok noorak ndak-ndak nggween ambi wo'niru o.

¹⁸ Ndi, at Aliku ALA nen nomaluk ambi lek eerogo panege logorak nogo yi o. An nogoba endagembogut kugi Irimon awi wurik me endobanggun yindumbunuk, alut eeruwak nduk, an wonok unggwi nage logominggirik, alut eeke kagak, an kunduk, kugi Irimon awi wurik me nendobanggun yindumbege neenok, Aliku ALA nen an kayeloman nomaluk ti lek eerogo panege logowak o.”

¹⁹ Yoge mbareegi, at Elita nen at yoge, “Kat kiniki ugun aret nak o.” Yoreegerak awo nage kagak,

²⁰ at Ala wone liirogon eeka Elita ayeloman Nggekati nen iniki mbake logonet, “Aap Aram mendek Naman yi nen amendek nogoba wogogerak woolik, We nak, yogerak nogo ti, nonggop nduk, eekerak? Ambi wo'niruwak nduk, mbe agan mugurok na o,” yinuk, Aliku ALA endage kumbunuk mugurok nagagerak.

²¹ Mbe agan mugurok nage nogo, at Naman enegen nakka wage nagagerik, “Wone ngge ari kaamun?” yinuk, nggweendo paga nen wambi wage nagagerik, yoge logonet, “Wulaga! Wone ambi wonage ilik?”

²² Yoge mbareegi, at Nggekati nen, “Wa nogoba! An nogoba Elita nen yo'nege logonet, Aap Ala nen yorage kagak yoraga inenggela'me nen aap tawe mbere puut nggelok-nggobok Eparayim nen neya wagaarak me, wu mbuti perak aaninggin 34 inom, yum agi-ogu mbere inom, wogoroorak nduk, Naman yori nak o, yo'nege mbaki, wone wonok yokkiri wagi o.”

²³ Yoge mbareegi, at Naman nen, “Wokkirigin aret me, wu mbuti perak aaninggin 34 mban woorak mage o. Ata, aaninggin 70 aret wamen o,” yinuk, nabenak mban yoge kenok, “Op aret o.” Ari mbareegi, at Naman nen wu mbuti perak aaninggin 70 inom, yum agi-ogu mbere inom, yum mbere yonggologo ayeloman mini mbere wogorage mbareegi, at Nggekati nen inaa'nduk piinok, inom

²⁴ puut paga ari wogo nogogwaarik, at Nggekati nen it at Naman ayeloman mbere wonok wogogwaarak nogo waganogo ame pi unggwage nagagerik, aap ineebe mbere nogo, “Kiname nanip o,” yoragagerak iname nogwe iigak,

²⁵ at Nggekati nogo Elita owagam mi'nari unggwage mbareegi, at Elita nen, “Kat ngga nen wagan?” Yoge mbareegi, at Nggekati nen, “An kayeloman yi, yime-ndime ambi noolik o, nogoba.”

²⁶ Yoreegerak kwe, at Elita nen Nggekati yoge logonet, “At Naman anggweendo paga nen wambi wage eyom kat kimbirak lambungge keegak, an niniki time nagaarak nogo lek a? Wu inom, yum inom, eyo tayitun yarak inom, eyo anggur yarak inom, kambin-ndomba inom, lembu-tapi inom, kayeloman mini kumi-aap inom, abok aret woorak eyom yogondak yi aret panggoni wagaarak mbaken?

²⁷ Lek aret me, at Naman awin aaga'ne kunik nogo kat kagabolo paga inom, kapuri-kombowologwe wiganak inagabolo paga inom, kinoba aremenggerak mondok-mondok lenggenak aret logogin o.” Yoge mbareegi, at wonage me nen awo wundi nage kagak, awin aaga'ne agabolo paga lenggek ari mbareegi, yanggwi kwak lan ari nagagerak.