2 Endagembogut 2 - Ala Wone Peenok Peebi Mbanak

Eliya mbogut paga wonok laganeegerak wone

¹ At Aliku ALA nen o wiya nombok-kombok eeke logonet, Eliya mbogut paga wonok lagarak eyom panggoni wage mbareegi, ne ambi paga at Eliya nogo Elita imbirak o Nggilagan nen tu paga nogo logonet,

² at Eliya nogo nen Elita yoge, “At Aliku ALA nen an o Mbeten nappanegerak nage me, kat ya'i abu logot o.” Yoreegerak kwe, at Elita nen onggo yoge logonet, “An kat mbo pagagin lek nimbirak aret noorak o, yinuk, Aliku ALA inom, kat inom, kimbirak kinenggaanom paga abet aret yokkigi o.” Yoge mbareegi, imbirak o Mbeten nogogwaarak.

³ Nogwe me, aap Ala nen yorage kagak yoraga ineebe aago o Mbeten nen Elita ka wundi wogo nogogwaarik, yogo logonet, “At Aliku ALA nen o yogondak aret kat teppaganuk, kogoba Eliya wonok lagagin nogo keenu ilik?” Yogo mbareegwa, at Elita nen, “E o. Neenu aret me, wone ti, yugup o,” yoragagerak.

⁴ Yorage mbareegi, ti'nuk, at Eliya nen Elita ambinom yoge logonet, “Elita wae. At Aliku ALA nen an o Yeriko nappanegerak nage me, kat ya'i abu logot o.” Yoreegerak kwe, at Elita nen, “An kat mbo pagagin lek nimbirak aret noorak o, yinuk, Aliku ALA inom, kat inom, kimbirak kinenggaanom paga abet aret yokkigi o.” Yoge mbareegi, imbirak o Yeriko nogogwaarak.

⁵ Nogwe me, it aap Ala nen yorage kagak yoraga ineebe aago o Yeriko time nen Elita ka wundi wogo nogogwaarik, yogo logonet, “At Aliku ALA nen o yogondak aret kat teppaganuk, kogoba Eliya wonok lagagin nogo keenu ilik?” Yogo mbareegwa, at Elita nen, “E o! Neenu aret me, wone ti, yugup o,” yoragagerak.

⁶ Yorage mbareegi, ti'nuk, at Eliya nen Elita ambinom yoge logonet, “At Aliku ALA nen an niyo Yoraran aa'nggi paga nappanegerak nage me, kat ya'i abu logot o.” Yoge mbareegi, Elita nen, “An kat mbo pagagin lek nimbirak aret noorak o, yinuk, Aliku ALA inom, kat inom, kimbirak kinenggaanom paga abet aret yokkigi o.” Yoge mbareegi, imbirak aret nogogwaarak.

⁷ Nogo mbareegwa, it Ala nen yorage kagak yoraga ineebe aago nogo mendek 50 inambokan muguren nogo nogogwaarik, tayorogon taati mi'ndak logonet, Eliya Elita imbirak yi Yoraran aa'nggi paga ari nanuk wonogwe inigen nagiyareegwaarak.

⁸ Inigen nagiigwi iigak, at Eliya ayum nggorek yirik nogo nggoorogo perembunuk, niyo Yoraran wake mbareegi, niyo nogo mogonogo agi-ogu eerogo pege nagagerik, nggween woloonogo pereegerak paga imbirak wunda nogogwaarak.

⁹ Wunda nogo nogogwaarik, at Eliya nen Elita nogo yoge logonet, “An kat teppaganuk, awo wo'neren lagangga'lek kagak, kat nano eeppagarak nogo yo'niru o.” Yoge mbareegi, Elita nen Eliya yoge, “Kat kamunggat koba wonage nogo mban an noba paniyak mage o. Ata, ambinom nggwok togon aret noba panu o.”

¹⁰ Yoge mbareegi, Eliya nen, “Kat yo'negendak ti, eeppagarak meek kagak yo'negendak kwe, kenegen keegak, an mbogut paga lagangge neenok perak, kat yagandak ti ndak-ndak eeppagage kaamunggun o. Ndi, kenegen neyaamunggun lek kenok ti, eeppagagin lek aret o.”

¹¹ Yoge nagagerik, imbirak wone mban-mban tu paga nogwe me, abera'lek me kani wuninik negen kuda nen nggweendo nikkenok wogo nogogwaarik, Elita ogoorogo punuk, o wiya nombok-kombok eeke kagak, at Eliya nogo aret wonok mbogut paga laganggwi iigak,

¹² at Elita nogo enegen looge logonet, “Nogoba o. Nogoba o. Iterali inanggweendo inom, inaguda paga nega inom, ti aret kagi o.” Ari kagak, eebe lek aret ari nage mbareegi, ayum yirik nogo aret oolo muundak nibinogo pateegerak.

¹³ Nibinogo patinuk, at Eliya ayum nggorek nggorok togon wambeegerak nogo, wagangge nagagerik, iyokan niyo Yoraran aa'nggi paga mi'nari wage nagagerik,

¹⁴ Eliya ayum nggorok togon wambeegerak nogo paga niyo warikit nduk, oone nggwok paga ari logonet, “At Aliku Eliya ogoba Ala nogo ngga agandik?” Ari nagagerik, yum nogo paga niyo wareegerak mogonogo agi-ogu eeke mbareegi, Elita nogo wunda wagagerak.

¹⁵ Wunda wage mbareegi, it Ala nen yorage kagak yoraga aago o Yeriko mendek nda nen nagiyareegwaarak nogo nen yogo logonet, “Eliya amunggat oba wonagaarak nogo, muk Elita oba agaarak kogo o.” Yinuk, owagam nogo nogogwaarik, abu'me inete wanduk yinuk, Elita yogo logonet,

¹⁶ “Wone yokkugwi yi, liippu o. Nit kayeloman mini ninenggela'me yime Eliya kwaari noorak inobam aap ineebe 50 wonogwe me, Aliku ALA Aberiniki nen kogoba ti, wonok puurom paga pi nagaarak a, alu'me pi nagaarak a, it kwaari nawak o.” Yogo mbareegwa, at Elita nen, “At kwaari noorak yoroorak mage o.”

¹⁷ Yoragagerak kwe, inoone nabenak mban yorit unggwogo mbareegwa, ineraaket nen, “Kwaari nawak o.” Yorage mbareegi, ineebe 50 nogo kwaari nawak nduk, nappiyareegwaarak kwaari nugwi iigak, nogo kenagan yereegwaarak kwe, Eliya eebe nogo kwaakkoolik me,

¹⁸ iniyokan at Elita nogo o kota Yeriko torinake wonage me, ka wogo mbareegwa, it yorage logonet, “Kit kwaari noorak mageo, yinuk, an yokkiragarak kwe, nogotak nogo lek a?” yinuk, yoragagerak.

At Elita nen o Yeriko niyo obeelom eereegerak wone

¹⁹ It aap o kota Yeriko menggaarak nen Elita yogo logonet, “Ninogoba wae. O kota yi, kenegen pekket o. O yi abu obeelom mban kagandak kwe, niyo perak, maluk mban wonage me, yi mendek ndi mendek yakootak kwe, tari kunit nage o.”

²⁰ Yogo mbareegwa, at Elita nen it yorage, “Niyoowak ngget mendek kenok, mayu yonggoppunuk, wonok niri woraanip o.” Yorage mbareegi, wonok iri wogogwaarak.

²¹ Iri wogo mbareegwa, at Elita nen niyoowak nogo wonok niyo eneerime nage nagagerik, mayu nogo kilirogo wuppege logonet, “At Aliku ALA nen yegerak yi o. Niyo yi, abu obeelom eerogo pigirak me, nunggwi iinok kanggwi, yi mendek ndi mendek yarak mbu'lo kunit nage, eerigin mondok lek, yegerak o.”

²² Ari mbareegi, at Elita yereegerak nogo ndak-ndak, niyo nogo obeelom agagerak o yogondak kuli wonage aret.

Wologwe-aabologwe nen Elita meek eerogo pereegwaarak wone

²³ At Elita nogo o time nen Mbeten wage mbareegi, wologwe-aabologwe inawi kota time menggaarak nen wundi nanuk, inoone nggwok paga Elita miyuk-meya eerogo pogo logonet, “Anobak mbela aago yi, mbet lagi nak. Anobak mbela aago yira, mbet lagi nak.”

²⁴ Yogwe iigak, at Elita nogo ena logurogon pegiige logonet, at Aliku ALA endage paga pulunogo piige mbareegi, wam nggwiya negen beruang ineebe mbere eyonggaame nen nggigik togon wundi wogo logonet, wologwe-aabologwe ineebe 42 ineyak nibik-nobak eerogo piinet nogogwaarak.

²⁵ Ndi, at Elita nogo perak, time nen puut Karemen paga lagi nanuk, ti'nuk, time nen iyokan o Tamariya wagagerak.