2 Endagembogut 13 - Ala Wone Peenok Peebi Mbanak

Iterali inowe endagembogut Yowakat eeke nagagerak wone

¹ At Akatiya aput Yowat nogo aap Yekura inowe endagembogut a'nuk, wone lengganogo yorage kagak, tahun 22 eeppunuk, ambi age paga aap Yeku aput Yowakat Iterali inowe endagembogut age nagagerik, o Tamariya logonet, wone lengganogo yorage kagak, tahun 17 aret eereegerak.

² Iterali wone lengganogo yorage logonet, at Nebat aput Yerobeyam maluk eeke nagagerak paga, Iterali eerit nogo nogogwaarak nogo, at mbo puulik Aliku ALA enegen kagak maluk mban mugurok nage nagagerak me,

³ at Aliku ALA nen Iterali anini inoba piige logonet, aap Aram inowe endagembogut Katayen aput Mben-Karat imbirak inabu'me piinok logowak nduk, ineenggime piyareegerak.

⁴ Piyareegerak kwe, it aakumi Aram mendek nen Iterali aaninggin mondok alik negen inoba pugwi nogo, at Aliku ALA enegen iyareegerak me, at Yowakat nogo nen, “Aliku ALA ninabuwa mba'nuk yeenggwa niraawak o,” yinuk, nggino yoge mbareegi, Aliku ALA aruk koneneegerak.

⁵ Konengge nagagerik, aap ambi it Iterali mendek inagap ndaruwak nduk, koongge mbareegi, it aap Aram ineenggime nen mbaganit aa'nduk inawooliya wuppunuk, wonogogwaarak nogo ndak-ndak ari wogogwaarak.

⁶ Ti eerogo piyareegerak kwe, at aap Yerobeyam paga wiganak inom maluk eeko nogogwaarak paga Iterali eerit nogo nogogwaarak nogo, mbo puulik maluk kunik aret eerit nogo logonet, o Tamariya kugigwe Atiyera agago arelen yinik nogo minogo nappuulik yinik aret teppereegwaarak.

⁷ At aap Aram inowe endagembogut nogo nen at Yowakat awuri wim eeka abok aret gandum agabolo mbelenggo logonet, abupak lagangge menggi kwak, ineebe abu lek eerogo piyareegerak kwe, aap kuda wonok nega ineebe 50 inom, nggweendo wim eeka 10 inom, ndi, it ineegin warak iniyok paga nogo menggaarak sepuluh ribu inom, ti mban teppiyareegerak.

⁸ Ndi, at Yowakat nogo endagembogut a'nuk wone lengganogo yorage logonet, eeke nagagerak inom, eerit nage paga endage nggwok agagerak inom, ando abok ti, it Iterali inoweewi inendagembogut logonet, eeko nogogwaarak liiru mbanak paga, inom mbanak wonage nogo lek a?

⁹ Ndi, at Yowakat nogo at ombomini kambunuk nogogwam inom yonggonggola nage mbareegi, kanggwi piya unggwogo menggam o Tamariya nogome eebe pi unggwogogwaarak. Pi unggwogo mbareegwa, obaane'me aput Yokawat nogo Iterali inowe endagembogut agagerak

Iterali inowe endagembogut Yokawat nen eeke nagagerak wone

¹⁰ At Yowat nogo aap Yekura inowe endagembogut a'nuk, wone lengganogo yorage kagak, tahun 36 eeppunuk, ambi age paga at Yowakat aput Yokawat it Iterali inowe endagembogut a'nuk, o Tamariya logonet, wone lengganogo yorage kagak, tahun 16 eereegerak.

¹¹ At Yokawat nogo aap Nebat aput Yerobeyam maluk eeke nagagerak paga it Iterali maluk eerit nogo nogogwaarak nogo, ambiriluk ambi mbo puulik Aliku ALA enegen kagak maluk kunik aret eerit nage nagagerak.

¹² At Yokawat nogo Iterali inowe endagembogut a'nuk wone lengganogo yorage logonet, eeke nagagerak inom, eerit nage paga endage nggwok agagerak inom, aap Yekura endagembogut Amatiya imbirak wim eeke nagagerak nogo inom, ando abok ti, it Iterali inoweewi inendagembogut logonet eeko nogogwaarak liiru mbanak paga, inom mbanak wonage nogo lek a?

¹³ Ndi, at Yokawat nogo, ombomini kambunuk nogogwam inom yonggonggola nage mbareegi, eebe it Iterali inoweewi inendagembogut kambeegwaarak o Tamariya piya unggwogogwam nogome inom pi unggwogogwaarak. Pi unggwogo mbareegwa, Yokawat wone lengganogo yorage nagagim obaane'me aap Yerobeyam wone lengganogo yorage logowak nduk, endagembogut agagerak.

Elita kambeegerak wone

¹⁴ At Yokawat nogo kangga'lek awo eenik wonage logonet eeke nagagerak ando nogo yi aret. At Elita nogo andi eeke nagagerik, kambikit nduk, yagan wake me, aap Iterali inowe endagembogut Yokawat nogo wage nagagerik, enegen kenok, ale ari logonet, “Nogoba o! Nogoba o! Iterali inanggweendo inom, inaguda paga nega inom, ti aret kagi o!”

¹⁵ Ari mbareegi, at Elita nen aap endagembogut Yokawat nogo yoge, “Yigin inom, maale inom, wamen o.” Yoreegerak wagangge mbareegi,

¹⁶ at Elita nen Iterali inowe endagembogut ambinom yoge logonet, “Yigin agale paga maale lumbunuk, namburu o.” Yoreegerak namburikit nduk, eeke me, aap Elita nen aap endagembogut eenggi pigaganeegerak.

¹⁷ Pigagangge nagagerik, “Pugagi oonegen lagi wage menggim pa'nggwe ambe mbanak ti, kuuru o.” Yoreegerak kuuke mbareegi, Elita nen, “Time komaale namburogo nappet o.” Yoreegerak namburogo nappege mbareegi, at Elita oone nggwok paga ari logonet, “Komaale ti, Aliku ALA nen keegin tiyak yuwak nduk, wokkegerak me, it aakumi Aram mendek kinom wim nambuke logonet, keegin tiyak yigin o. Tiyak yigin me, o Apek it aakumi Aram mendek ineebe abok aret lek eerogo piyaamunggun o.”

¹⁸ Yoge nagagerik, at Elita nen, “Maale ando wagangge logomenggendik, nggween paga yinik-kunik eerogo pit nak o.” Yoreegerak ne kenagan kuli maale nggween yinik-kunik eerogo pit nage nagagerik, puk agagerak.

¹⁹ Puk age mbareegi, aap Ala wone liirogon eeka nogo nen at mberege logonet, “Ne 5 kuli ilik, ne 6 kuli a, nggween yinik-kunik eerogo penetak nen it aakumi Aram mendek tebenogo piige logonet, mondok lek eerogo piyoorak kwe, ne kenagan paga mban eekendak me, it Aram mendek nogo ne kenagan mban tebenogo piyaamunggun o,” yinuk, yoreegerak.

²⁰ Yoge nagagerik, logonuk lek aret, at Elita nogo kangge mbareegi, kanggwi piya unggwogo menggam eebe pi unggwogogwaarak. It aap aakumi a'nggan wogonaka Mowap mendek nen tahun ambi eekak paga o time unggwi wogo nogogwaarak.

²¹ Ne ambi paga aap Iterali mendek nen aap kambeegerak ambi taambuwok nduk eekwi me, aap a'nggan wogonaka wogwe inigen iigo nogogwaarik, aap kambak nogo Elita mambereegwam nogome mbo mambogo mbareegwa, aap ti, at Elita owak nogo mbaanggage nagagerik, eenik a'nuk mi'nagagerak.

Yokawat nen aap Aram mendek tebenogo piinok, eegin tiyak yereegerak wone

²² Aap Yowakat nogo Iterali inowe endagembogut logonet, wone lengganogo yorage kagak, aap Aram inowe endagembogut Katayen nogo nen it Iterali mendek tebenogo piigak mban eeke nagagerak kwe,

²³ aap Abarakam inom, Itak inom, Yakup inom, inom wone nggaruk togon koonogo pereegerak paga Aliku ALA nen it Iterali, “Nonggop wonogwe o,” yinuk, enegen wogonake logonet, inabuwa nggwok mba'nuk, iniki kunik aganake nagagerak me, it Iterali mendek lek eerogo piige, kobak eerogo mbo piige, eeriyak, “Neebi,” mbareegerak nogo, o yogondak togop mbake wonage aret o.

²⁴ Aap Aram inowe endagembogut Katayen nogo kangge mbareegi, obaane'me at aput Mben-Karat inowe endagembogut agagerak.

²⁵ Ndi, aap Mben-Karat nen Yokawat ogoba Yowakat imbirak wim eeko logonet, yi kota ndi kota tebenggolagagerak nogo, aap Yowakat aput Yokawat nogo nen obaane'me kolaakit nduk, ne kenagan paga aap Mben-Karat tebenogo punuk, o kota-kota nogo waganeegerak.