2 Endagembogut 12 - Ala Wone Peenok Peebi Mbanak

Aap Yekura inowe endagembogut Yowat nen eeke nagagerak wone

¹ At Yeku nogo endagembogut wonage kagak tahun 6 eeppunuk, ambi age paga aap Yowat Yekura inowe endagembogut a'nuk, o Yerutalem logonet, wone lengganogo yorage kagak tahun 40 eereegerak. At agalo ti, awi Mberetiyeba mendek endage Tibiya aret.

² At Yowat nogo aap Ala unde Yoyara nen wone mamunege kagak, Aliku ALA enegen kagak abu obeelom mban eeke nagagerak.

³ At togop aret eeke nagagerak kwe, puut-puut kugi inake warogo wogogo menggam perak, minogo mbo puulik me, it aakumi nen time inagugi inake warogo wogorogwe, inake warogo kani kunggwi, eeko nogogwaarak.

⁴ At Yowat nen it aap Ala unde nogo yorage logonet, “It aakumi ineenggi lingginogo inendage liiru mbanggo logonet, wu kuwak eekwi inom, Ndogop pigin o, yinuk, kumbuk mbanemenggaarak ndak-ndak pi wogwe inom, iniki nen, Pi na o, yinuk, pi wogwe inom, wu Ala ake leenak Aliku ALA awi wurik me pi wogwe nogo ti mendek abok aret

⁵ it aap wu porogo menggaarak nogo nen kit Ala unde kinalitak wokkirogwe iinok, liirogon waganggo logomonggotik, Ala awi wurik ambi maluk aremenggerak wonage kenok, wu ti paga ogobakkigiko logomunggup o,” yinuk, yoragagerak.

⁶ Ndi, aap Yowat endagembogut a'nuk, Yekura wone lengganogo yorage kagak tahun 23 eereegerak kwe, it aap Ala unde nen Ala awi wurik maluk agagerak nogo ogobakkigika'lek wonogo mbareegwa,

⁷ at endagembogut Yowat nen aap Ala unde Yoyara inom, it aap Ala unde alik inom, inayonggo pereegerak wogo mbareegwa, yorage logonet, “Nonggop nduk kit nen Ala awi wurik maluk agaarak kagak ogobakkigika'lek ogotik? Ne yogondak yi kuli, wu wokkira wogwe iinok, kit koloorak mage o. Ata, Ala awi ogobakkigiko logowak nduk, ake pogo logonip o.”

⁸ Yorage mbareegi, it aap Ala unde nogo nen, “Wu wo'nira wogwe iinok, nit waganggwi, ndi, Ala awi wurik nit nen ogobakkigikwi, eeko logogun lek o,” yinuk, yereegwaarak.

⁹ Yogo mbareegwa, aap Ala unde Yoyara nogo nen eyo ambi ogobakkigirogo abit nariyak nogo paga eno pelenogo punuk, waganogo Aliku ALA awi wurik me tu unggwogo menggam abe'nggan Ala ake warogo wogogak eraanu paga kwippereegerak. Kwippereegerak me, it aakumi Aliku ALA awi wurik me unggwogo logonet, wu wonok wogwe nogo, it aap Ala unde Ala awi wurik me tu unggwogo menggam arum wonogwe nogo nen waganogo eyo ogobakkigirik me nogome yonggoppegak eeko nogogwaarak.

¹⁰ Ndi, wu pegaatak eyo ogobakkigirik nogome aret yagabit agaatak kogo nagaatik, at aap endagembogut ake liiru mbangga inom, it aap Ala unde inowe nogo inom, yorogwe iinok, wogo nagaatik, Aliku ALA awi wurik me unggwogo logonet wu pegaatak nogo, ineenggi linggimbunuk, keele maarogo pogo nogogwaarak.

¹¹ Pogo nagaatik, “Wu ndi kuli wogoroorak,” koonogo pegaatak nogo waganogo it aap Ala awi wurik ogobakkigiruwak nduk, unde eeppiyareegwaarak nogo, wogorogwe iinok, it nen aap Aliku ALA awi wurik ogobakkigiko menggaarak o wuka inom, eyo paga wurik ogobakkigika inom,

¹² yugum nggagangga inom, yugum paga wuka inom, wogorogo logonet, wu nogo eegu paga Aliku ALA awi wurik maluk age kenok ogobakkigiruwak nduk, eyo inom, yugum ogobakkigirik inom, kunggwi, ndi, eegu Ala awi wurik ogobakkigiko logonet wumbugwi, eeko nogogwaarak.

¹³ Ndi, wu Ala awi wurik me pi unggwogogwaarak nogo paga ambi waganogo mbuti perak paga niyo toologo nenggak ogobakkigikwi, ndi abo mbanggak ogobakkigikwi, niyo kilirogo pit nagak togolowak ogobakkigikwi, oone nggwok eeka trompet ogobakkigikwi, mbuti perak-emas paga Aliku ALA awi wurik me yi mendek ndi mendek eekak yuurak abok aret ogobakkigikwi, eeko logolik.

¹⁴ Ata, it aap Ala awi wurik ogobakkigiruwak nduk, wogorogo nogogwaarak.

¹⁵ Ndi, it aap Ala awi wurik ogobakkigikwi inarum wonogwe nen wu wogorogo logonet, eegu kolagak eeko logolik liirogon nggilik-nggelok wogorogo nogogwaarak me, “Wu wungge nineenu aruwok nduk, liiru mbanogo wo'niraanip o,” yinuk, yoraga'lek aret wonogogwaarak.

¹⁶ It aakumi inomaluk aberak wonogwe iyo, Ala ake warogo wogogo logonet wu pugwi inom, ndi, inomaluk lek eerogo piyaawak nduk, Ala ake warogo wogogo logonet wu pugwi inom, ti, it Ala unde inamendek aret me, Aliku ALA awi wurik me pi wogo logolik o.

¹⁷ Ne ti eyom paga aap Aram inowe endagembogut Katayen nogo, aakumi Nggat mendek inom wim eeppunuk, tebenogo piige nagagerik, ti'nuk, o Yerutalem tebenikit nduk, eereegerak mendek,

¹⁸ aap Yekura inowe endagembogut Yowat nogo nen ombomini it aap Yekura inoweewi inendagembogut aap Yotapat inom, Yoram inom, Akatiya inom, Ala ake leenogo pereegwaarak yi mendek ndi mendek inom, at nen yi mendek ndi mendek leenogo pereegerak inom, Aliku ALA awi wurik me wu pogo menggam mbuti emas wonage nogo inom, aap endagembogut awi o nggwok abe wurik me mbuti emas wonage inom, abok aret waganogo aap Aram inowe endagembogut Katayen nappiige mbareegi, aap Katayen nen wim Yerutalem eerikit mbareegerak nogo eerulik puk aret agagerak.

¹⁹ Ndi, at Yowat nogo aap endagembogut a'nuk wone lengganogo yorage logonet, eerit nage nagagerak ando abok ti, it Yekura inoweewi inendagembogut logonet, eeko nogogwaarak liiru mbanak paga, inom mbanak wonage nogo lek a?

^20-21 Ti'nuk, at Yowat inom eeko menggaarak aap Timeyat aput Yotakat inom, Tomet aput Yotabat inom, imbirak iniki ambit eeppunuk, Yowat wariyak wone mbambunuk, tu o Tila wambi nogo menggam nggween pit laganuk o Milo wurik me nogome warogo pereegwaarak. Warogo pogo mbareegwa, ombomini kambeegwaarak Ndawut agota piya unggwogogwam inom tabonogo pi unggwogogwaarak. Pi unggwogo mbareegwa, obaane'me aput Amatiya inowe endagembogut agagerak.