2 Endagembogut 11 - Ala Wone Peenok Peebi Mbanak

Kwe Ataliya wappunuk obaane'me Yowat endagembogut mippereegwaarak wone

¹ Aap Akatiya agalo kwe Ataliya nogo nen, “Naagaluk kanggerak, kagi,” mbake nagagerik, aap endagembogut Akatiya apuri wiganak abok aret inoorogo piyaakit nduk eereegerak.

² Inoorikit nduk, eeke kagak, aap endagembogut Yekoram aput Akatiya awuluk kwe Yoteba nogo nen aap Akatiya aput Yowat nogo, kwe Ataliya nen inom wake kero, apuri inenggela'me nen nggiginogo Ala awi wurik me nogo yogo menggam ambime kolaga ndegengga imbirak time kumaappiyareegerak me, warulik.

³ At ndegengga imbirak Aliku ALA awi wurik me kumaarak wonogwe iigak, kwe Ataliya o time wone lengganogo yorage kagak, tahun 6 aret eereegerak.

⁴ Tahun 6 eeppunuk, ambi eeke paga aap Yoyara nogo nen it aap Kari mendek inom, it aap endagembogut wonok nega inom, aap ineegin warak ambit aago ineebe 100, ambit aago ineebe 100, inoweewi inom, Aliku ALA awi wurik me ka woraawak nduk, inayonggo piyareegerak ka wogo mbareegwa, at nen yorage logonet, “Ninigen kogo logomonggoorik, aakumi yoraagun lek o, yinuk, kumbuk mbaninip o.” Yorage mbareegi, it abok aret Aliku ALA awi wurik me time wone kumbuk mbanggo mbareegwa, at aap endagembogut aput kumaarak nogo nigiyareegerak.

⁵ Nigiyareegerak inigen kogo mbareegwa, it yorage logonet, “Kit yogop ee'nip o. Kit nogo 6 yippunuk, ko'lu yonggonggologwe paga yabu eeko monggotak kenagan aago nogo, ambi aago aap endagembogut awi o nggwok abe wurik arum wonogwe,

⁶ ambi aago tu unggwogo menggam endage Tut nogome arum wonogwe, ndi, ambi aago it aap endagembogut wonok nega wonogwe me ambokan tu unggwogo menggam nogome arum wonogwe, eeko logonip o.

⁷ Ndi, nogo 6 yippunuk, ko'lu yonggonggologwe paga yabu eekwi lek puk monggotak kit kineebe mbere aago nogo, Ala awi wurik aap endagembogut wonage me arum wako logonip o.

⁸ Aap endagembogut wundi nage, unggwi wage, eeke kagak, kinalitak lombok kineegin kineenggime li'luk eeppunuk, enaagan-ambokan ee'nuk nugwi me, aap ambi owagam wage kenok, mondok warogo punu o,” yoragagerak.

⁹ Yorage mbareegi, aap ineegin warak ambit aago ineebe 100, ambit aago ineebe 100, inoweewi nogo nen aap Ala unde Yoyara yoragagerak nogo konembunuk, aap eegu nogo 6 yippunuk, ko'lu yonggonggologwe paga eeko menggaarak inom, eegu yonggonggologwe paga yabu eeka'lek puk menggaarak inom, inawuri lombok wogoren, aap Ala unde Yoyara nogo owagam wogo mbareegwa,

¹⁰ at Yoyara nen aap inowe endagembogut Ndawut awooluwik-awooluwak inom, anggeemi-anggeemu inom, Aliku ALA awi wurik me pereegerak nogo abok aret kabulogo it wogoragagerak.

¹¹ Wogorage mbareegi, it aap endagembogut arum waka nogo abok aret ineegin ineenggime woppunuk, aap endagembogut Yowat nogo wakwi iyo, warogo kani kunggo menggam nen at wonage enaagan-ambokan Ala awi wurik irip-irip abok aret mi'narit nogogwaarak.

¹² Mi'narit nogogwaarak wonogwe iigak, at Yoyara nen aap endagembogut aput nogo wonok, endekem wundi nage nagagerik, nggare-nggare anobak paga yippege, Ala nen Iterali inom wone abuk nggaruk togon koonogo pereegerak mbuku paga mbanak nogo wogoge, eeppunuk, “Ninowe endagembogut yi aret o,” yinuk, amburu eerogo mippege mbareegi, it aakumi abok aret ineenggi telanggo logonet, “Kendagembogut aret logonok o,” yinuk, keekok yogogwaarak.

¹³ Ndi, it aap endagembogut arum waka aakumi inom keekok yogwe nogo, kwe Ataliya nen aruk konengge nagagerik, it aakumi Aliku ALA awi wurik me yogwe wonogwe nogo, pegiya nage nagagerik,

¹⁴ aap inowe endagembogut nen wone yoroorak kenok mi'nari laganggo menggam mi'nari laganeegerak wonage, ndi, it aap endagembogut inom eeko menggaarak inom, it aap oone nggwok eeka trompet oone eeko menggaarak inom, eraanu wonogwe, eekwi iigak, it aakumi o time abok aret inale'nggen yogwe, trompet nogo oone pu eekwi, eekwi nogo enegen iige nagagerik, ayum nibinogo patinuk, oone nggwok paga, “Nambokan lagangga o! Nambokan lagangga o!” yinuk, yereegerak.

¹⁵ Ari kagak, aap Ala unde Yoyara nen it aap ineegin warak ambit aago ineebe 100, ambit aago ineebe 100, inoweewi nogo yorage logonet, “Kwe ti, Aliku ALA awi wurik me yime nen wariyak lek me, kinawuri nen oolo punuk, endekem wonok wundi nogo logomenggaarik, at ili yogwe nogo abok aret inom wooluwak paga inoorogo puwak o.”

¹⁶ Yorage mbareegi, kwe nogo pippogo nogogwaarik, wonok aap endagembogut awi o nggwok abe wurik oore'nggam tu unggwogo menggam endage, Kuda, time pi nanuk, warogo pereegwaarak.

At Yoyara nen wone ngget mendek eeriyak kooneegerak wone

¹⁷ Pogo mbareegwa, at Yoyara nen it aakumi inom, aap endagembogut Yowat inom, “Kaliku ALA kapuri aret logowok o,” yinuk, Aliku ALA inom wone koonogo pugwi, ti'nuk, aap endagembogut aakumi inom iniki ambit eeppunuk logorak wone koonogo pugwi, eeruwak nduk, yoragagerak abu aret koonogo pogo nogogwaarik,

¹⁸ it aakumi o time mendek abok aret kugi Mba'an awi wurik me nogo nogogwaarik, minogo pugwi, kugi Mba'an ake warogo wogogo menggam eerak nogo langgunogo pit nogwe, inagugiwak yigirik-noonom eerogo pugwi, ndi, aap kugi Mba'an unde Matan nogo Mba'an ake warogo wogogo menggam eerak enaame taa'nogo warogo pugwi, eereegwaarak. Ti eerogo punuk, aap Ala unde Yoyara nen aap endagembogut arum waka nogo Aliku ALA awi wurik arum logowak nduk, punogo piyareegerak.

¹⁹ Punogo piige nagagerik, at inom, it aap Kari inom, it aap endagembogut wonok nega inom, aap ineegin warak ambit aago ineebe 100, ambit aago ineebe 100, inoweewi nogo inom, it aakumi o time wonogwe abok aret inom, it nogo nen aap endagembogut Yowat nogo Aliku ALA awi wurik me nen wonok wambi wa'nuk, aap endagembogut awi o nggwok abe wurik tu unggwogo menggam it aap endagembogut wonok nega wonogwe me nogo paga unggwi nogo mbareegwa, aap endagembogut logonet, wone lengganogo yorogo menggam nogome kwi'nagagerak.

²⁰ Kwi'nage mbareegi, it aakumi o time wonogwe abok aret iniki ale'nggen agagerak. Ndi, kwe Ataliya nogo aap endagembogut awi o nggwok abe wurik nogome wooluwak paga warogo pereegwaarak me, o nogo abolok lek obeelom aret wonagagerak.

²¹ Ndi, at Yowat nogo ndarak kagak tahun 7 eeppunuk, Yekura inowe endagembogut a'nuk, wone lengganogo yorage nagagerak.