2 Endagembogut 10 - Ala Wone Peenok Peebi Mbanak

Yeku nen Akap ombowologwe lek eerogo piyareegerak wone

¹ Aap Akap paga wiganak ombowologwe aap mban ineebe 70 o Tamariya time wonogogwaarak me, at Yeku nen it aap o kota Yiteren arum wonogwe Iterali inoweewi inom, it Akap ombowologwe 70 inarum menggaarak inom, it paga nappiya woraakit nduk, liiru mbangge logonet,

² “Kit kinogoba Akap ombowologwe inarum wonogwe, nggweendo wim eeka kuda wonok nugwi, kinawi kota pak wurik me logonet kineegin porogo wonogwe, eeko monggotak nogo an liiru mbangge yi, pekkogo logomonggotik,

³ kinogoba Akap ombowologwe inenggela'me nen at abu obeelom op eeke logorak kenok, leenogo ombo Akap endagembogut logonet, wone lengganogo yorage nagagim obaane'me endagembogut logowak nduk mippugwi kiinok, kinombo paga wiganak apuri-ombowologwe inili eerogo wim eeruwak nduk, pipuk eeke logowak o,” yinuk, liiru mbanogo nappi wagagerak.

⁴ Nappi wagagerak nogo ira wogo mbareegwa, malembunuk, inagabiti ambik ogo nogogwaarik, yogo logonet, “It aap inendagembogut mbere nogo imbirak lambumbunuk, at inom wim eeko logonet, ko wariyak meek iigoorak me, nit kunduk, at ninom wim eeko logonet, nonggop togon ko wariyak mbakop?”

⁵ Yogo nogogwaarik, at aap endagembogut awi o nggwok abe wurik unde menggerak inom, at o kota arum menggerak inowe inom, it aakumi inoweewi inom, it Akap ombowologwe inarum menggaarak inom, nen at Yeku ake liiru mbanggo logonet, “Nit yi, kat kayeloman mini aret me, eeriyak yo'nirage menggendak ti, eeko logogun aret kwe, Aap kinowe endagembogut mippuurak, yo'niragandak ti perak, nit nen mippuurak mbakwi lek me, kat eeriyak op mbake kenok, ti aret ee'nu o,” yinuk, wone onggo eerogo nappereegwaarak.

⁶ Nappereegwaarak at Yeku nen pekkage nagagerik, liiru peebi ambi mbangge logonet, “Kit an ninom a'nuk an yokkirage nogo ndak-ndak eeriyak mbakwi kenok, at kinogoba ombowologwe inenggaanok mba- mbogo logomonggotik, o yogondak yi ndak-ndak ko'lu inanobak mbanak wonok an Yiteren yime wonage me, niri wa'nu o,” yinuk, wone eerogo nappi wagagerak. It aap inendagembogut ombowologwe ineebe 70 inarum menggaarak ti, o kota time inendage warak wonogogwaarak me,

⁷ liiru peebi mbanogo nappi wagagerak nogo pekkogo nogogwaarik, aap endagembogut ombowologwe ineebe 70 nogo abok aret inooppunuk inenggaanok mbanggo nogogwaarik, inanobak mbanak muun yarak me yonggoppunuk, at Yeku o Yiteren wonage me nappiyareegwaarak.

⁸ Nappiyareegwaarak inanobak mbanak nogo wonok, Yeku wonage me nogo nogogwaarik, at ambi nen at yoge logonet, “Aap endagembogut ombowologwe inanobak mbanak wonok wagaarak yi o.” Yoge mbareegi, at Yeku nen, “An ko'lu kuubondendok koonikit nduk, inanobak mbanak ti, o kota tu unggwogo menggam endekenggwe taati mbere logonogo pinip o.”

⁹ Yorage nagagerik, nogo yinuk, ko'lu kuubondendok at Yeku nogo wundi nage nagagerik, it aakumi ambik kuwak aago wonogwe inaame mi'na'nuk, wone yorage logonet, “Wologwe wae. Aap endagembogut ombowologwe inanobak mbanak yi, kit nen eerulik me, kinoba lek o. Nogoba wariyak koombunuk, wakirak ti, an nen aret eekirak kwe, inenggaanok mbanak yi perak, taani nen eekaarak o?

¹⁰ At Aliku ALA nen wone abuk nggaruk togon ayeloman Eliya yoge mbareegi, yoragagerak nogo ndak-ndak, Aliku ALA nen aap Akap paga wiganak inom eeppiyoorak yereegerak wone nogo, ambi yobonnarulik a'me lik yereegerak kineenu arumunggup nduk, yokkiragi o,” yinuk, yoragagerak.

¹¹ Yorage nagagerik, at Yeku nogo nen aap Akap paga wiganak ando piyareegwaarak o Yiteren wonogwe nogo inom, at inom eeko menggaarak inendage warak inom, at inom kunik inom, Ala unde at Akap ake eeko menggaarak inom, ineenik ambi teppiyoolik, abok aret inoorogo piyareegerak.

Aap endagembogut Akatiya owe-awot inooreegerak wone

¹² Inoorogo piinok, at Yeku o time nen o Tamariya wage logonet, it kambin-ndomba ndegeninaka wonogo menggam o Mben-Eket ari wage nagagerik,

¹³ aap Yekura inowe endagembogut Akatiya owe-awot inom lambumbunuk, iniki kwaake logonet, “Kit taani o?” Yorage mbareegi, “Nit yi, at Akatiya owe-awot aret me, aap endagembogut apuri-ombowologwe inom, aap endagembogut owanggelo-aagalogwe inom, keyage wappiya nogo ogoorik o.”

¹⁴ Yogo mbareegwa, at Yeku nen, “It aap ti, ineenik ngge-ngge piginabinip o.” Yinuk, awuri yorage mbareegi, ineebe 42 aret ineenik ngge-ngge pigiren niyo nggween kabunik Mben-Eket time piya nanuk, it ambit-ambi ineenik teppiyoolik, abok aret inoorogo piyareegerak.

Akap owe-awot ando teppiyareegwaarak nogo inooreegwaarak wone

¹⁵ Inoorogo piinok, o time nen wage logonet, aap Erekap aput Yonarap at ka nage me, imbirak lambumbunuk at Yeku nen Yonarap nogo keyage wappunuk, yoge logonet, “An eeri nage yi ndak-ndak, kat eeppagarak mbarulik kwe, Op aret, eerit nage nombake ilik, lek a?” Yoge mbareegi, at Yonarap nen, “Op aret mbake agarik o.” Yoge mbareegi, aap Yeku nen, “Ti kenok, keenggi nippi mok.” Yoreegerak eenggi nippege mbareegi, at Yeku nen eenggi yabonogo nggweendo paga kwippi lagangge nagagerik,

¹⁶ at yoge logonet, “At Aliku ALA ake nanggena luk togon eerit nage minggirak kenegen neyaanok nduk, nimbirak nawok o.” Yoge nagagerik, at Yeku nen Yonarap nogo anggweendo wim eeka nogo paga wonok imbirak aret wagagerak.

¹⁷ Wonok o Tamariya unggwi wage nagagerik, at Akap paga wiganak o Tamariya ando piyareegwaarak wonogwe nogo inoorogo piyareegerak. Inoorogo piyareegerak nogo ti, at Aliku ALA nen Eliya yoreegerak nogo ndak-ndak, it abok tigitogon aret lek eerogo piyareegerak.

It aap kugi Mba'an unde inooreegwaarak wone

¹⁸ Ti inoorogo piige nagagerik, at Yeku nogo nen it aakumi Tamariya mendek abok aret kuwak eeppiinok wone yorage logonet, “At Akap nogo nen kugi Mba'an mugurok nage logonet, alut eeke nagagerak ti we mbuuluk negen eeke nagagerak kwe, an perak, abu iya negen aret eeke logogin me,

¹⁹ it aap kugi Mba'an wone yoraga inom, it kugi Mba'an alut eeka inom, it kugi Mba'an unde inom, an nen kugi Mba'an ake nggwok lombok warogo wogoriyak me, it ambi puk ariyak lek tigitogon woraawak nduk, yoranet nogo logonip o. It ambit-ambi wogwe lek puk ogwe iinok, ineenik teppiyaagin lek inoorigin aret o,” yinuk, yoragagerak. At Yeku ti yoragagerak nogo ti, it kugi Mba'an mugurok nogo logonet, alut eeko menggaarak abok aret lek eerogo piyaakit mbake nagagerik, yoragagerak.

²⁰ Yorage nagagerik, at Yeku nen ambinom yorage logonet, “Togop aret me, at kugi Mba'an alut eeriyak nduk, Ne ndi eyom paga kuwak eeri woroorak, punogo pinip o.” Yoragagerak punogo pogo mbareegwa,

²¹ at Yeku nen aakumi Iterali wonogo menggam yi o ndi o abok aret it kugi Mba'an alut eeko menggaarak kuwak eeri woraawak nduk, inayonggo pereegerak. Inayonggo pege mbareegi, ambiriluk ambi puk arulik, apit aret kuwak ari wogogwaarak me, o kugi Mba'an awi wurik me akem ilin-unggut abu yagabit eerogo pi unggwogogwaarak.

²² Unggwogo mbareegwa, at Yeku nen it Mba'an alut eeko logonet yum yiriko menggaarak pogo menggam arum menggaarak nogo yorage, “It kugi Mba'an alut eeka kuwak agaarak yi, abok aret yiriruwak nduk, yum ti, wunabi wa'nip o.” Yoragagerak nogo abok aret wunako mbareegwa,

²³ at Yeku nogo Erekap aput Yonarap imbirak kugi Mba'an awi wurik me unggwi nogo nogogwaarik, it aap Mba'an alut eeka nogo yorage logonet, “Kit kinenggela'me yime kugi Mba'an alut eeriyak mban wonogwe ilik? Ata, Aliku ALA ayeloman mini mendek ambi yime kinom wonogwe kiigak eerukwak kinigen luk ee'nip o,” yoragagerak.

²⁴ Yorage nagagerik, at Yeku nogo Yonarap imbirak kugi Mba'an aanggo warogo wogogwi, ake warogo kani kunggwi, eeruwok nduk, ko akem time ungguwok nduk, eereegwaarak. Ungguwok nduk eeko logonet, at Yeku nogo nen it aap ineebe 80 kugi awi wurik me endekem time inarum logorak yorage logonet, “It kineenggime pinagaminggirak kagak ambiriluk ambi mbaganggwi iinok, inobaane'me kit aret kinooriyak o,” yoraanuk unggwi nagagerak me,

²⁵ at Yeku nogo kugi Mba'an ake warogo kani kumbunuk endekem wundi wage nagagerik, it aap inarum wonogwe nogo inom, at awuri ineegin warak inoweewi inom, yorage logonet, “Unggwi nanuk, aakumi ti, eegu teppiyaagup. Abok aret wundugun-naagun inoorogo pinip o.” Yorage mbareegi, unggwogo nogogwaarik, inobaloowi paga inoorogo piinok, inoorak nogo endekem mbo wumbiinok, kugi Mba'an awi wurik alut eeko menggam ko akem lombok unggwi nanuk,

²⁶ inagugiwak wonok wundi wogo nogogwaarik, kani kunggwi,

²⁷ inagugi Mba'an ogut eerak nogo yigirogo pugwi, Mba'an awi wurik minogo pugwi, eeko mbareegwa, it aakumi kugi Mba'an awi wurik wonagagim nogo inomayo mboonggo menggam aret eerogo pereegwaarak me, o yogondak togop aret wonage o.

²⁸ At Yeku nen it Iterali wonogwe me, kugi Mba'an eeko menggaarak lek eerogo pereegerak nogo ti aret.

²⁹ Lek eerogo pereegerak kwe, aap Nebat aput Yerobeyam nen maluk eerit nage logonet tapi inogut mbere mbuti emas paga ogobakkigirogo ambi o Mbeten pege, ambi o Ndan pege, eereegerak paga Iterali nen inalut eerit nogo logonet, maluk eeko nogogwaarak nogo, at Yeku perak, mbo puulik aret eeke nagagerak.

³⁰ Togop eeke mbareegi, at Aliku ALA nen at Yeku yoge logonet, “An nenegen neegak kat op mban eerit nage logonet, aap Akap paga wiganak eeppiyaakit mbareegirak nogo abok aret eeppiigendak me, kapuri nen wigannarit nok, 4 nda'narit nogwe paga Iterali inarum logonet, wone lengganogo yorogo logogun o,” yinuk, yoreegerak kwe,

³¹ at Yeku nen eeko logorak Aliku Iterali inogoba Ala wone yugu nogo iniki panggombunuk, liirogon eerit noolik. Yerobeyam nen maluk eerit nage nagagerak paga Iterali maluk eerit nogo nogogwaarak nogo, at Yeku kunduk ndak-ndak eerit nage nagagerak.

Yeku kambeegerak wone

³² Ne ti eyom paga at Aliku ALA nen o it Iterali wonogo menggam logorogon eerogo pi unggwikit nduk, eeke mbareegi, at Katayen nen it Iterali tebenogo piya unggwage logonet, it inanggween

³³ niyo Yoraran oonegen lagi wage menggim pa'nggwe o kota Arowet niyo Aronon aa'nggi paga wonage me nen nok, o Nggileyat Mbatan kuli abok aret aakumi Nggat menggam inom, Uruben menggam inom, Manate menggam inom, kolagagerak.

³⁴ At Yeku nogo Iterali inowe endagembogut a'nuk wone lengganogo yorage logonet eeke nagagerak inom, eerit nage paga endage nggwok agagerak nogo inom, ando abok ti, it Iterali inoweewi inendagembogut logonet, eeko nogogwaarak liiru mbanak paga, inom mbanak wonage nogo lek a?

^35-36 At Yeku nogo o Tamariya logonet Iterali inowe endagembogut a'nuk wone lengganogo yorage kagak, tahun 28 eeke nagagerik, ombomini kambunuk nogogwam nogome inom yonggonggola nage mbareegi, eebe kanggwi piya unggwogo menggam o Tamariya nogome pi unggwogo mbareegwa, obaane'me aput Yowakat Iterali inowe endagembogut agagerak.