2 Endagembogut 1 - Ala Wone Peenok Peebi Mbanak

2 ENDAGEMBOGUT WONE

Ala nen yoge kagak yoraga Eliya nen Akatiya kambuurak yoreegerak wone

¹ At aap Akap kambeegerak kagak it aakumi o Mowap mendek nen, “Aap Iterali mendek wone lengganogo yo'nirage logorak nineebi o,” yinuk, yereegwaarak.

² Ndi, ne ambi paga aap inowe endagembogut Akatiya nogo o Tamariya at awi wurik tiyarogon awe aago yagat-yagat wurik nogome nen yigeebu wambi wagagerak me, andi nggwok lombok eeke mbareegi, aap yonggo nappiige logonet, yorage, “Kit nen aakumi o Ekoron mendek inagugi Mba'an-Tebup nen, An andi yi, obeelom ee'nabigin ilik, lek a? yokkiraawak nduk, nanip o.”

³ Yoragagerak nogwe iigak, at Aliku ALA ayonggo malayikat nogo nen aap Titebe mendek Eliya yoge logonet, “Aap Tamariya mendek inowe endagembogut nen nappiya wagaarak wonogwe ti, kinom lambuni nage logomenggendik, wone yogop yoraamunggun o. It Iterali wonogwe me, Ala lek kenok, it Ekoron mendek inagugi Mba'an-Tebup nen yoraawak nduk, nggino yori nogo agaarik ya? yegerak o.

⁴ It togop eekwi me, at Aliku ALA nen ari logonet, At Akatiya ti, nogo yege menggim nen mi'narigin lek o. Ata, at nogo yege me time nen aret mondok kambigin, yegerak, yora nak o,” yinuk, yoge mbareegi, yora wagagerak.

⁵ Yoraanuk, nage kagak, it aap nappiyareegerak nogo iniyokan wogo mbareegwa, aap endagembogut nogo nen it yorage, “Nonggop nduk kit kiniyokan mbet-mbet aret wogop?”

⁶ Yorage mbareegi, it nen at onggo yogo logonet, “Nit nogwe me, aap ambi niya wage nagaarik, yo'nirage, At Aliku ALA nen ari logonet, It Iterali wonogwe me time Ala wonage lek kenok, it Ekoron mendek inagugi Mba'an-Tebup nen yoraawak nduk, nggino yoriyak nappiya wagaarak ya? Togop yegerak me, at nogo yege menggim nen mi'narigin lek o. Ata, at nogo yege me time nen aret mondok kambigin, yegerak o, yinuk, aap endagembogut nappinagi wagaarak nogo, wone ti, yori nanip o, yo'nirage mbaki, yokkiri wogo o.”

⁷ Yogo mbareegwa, aap endagembogut nen, “Aap kit kinom lambuni wage nagaarik, wone yokkiragaarak ti, etenggen nonggop o.”

⁸ Yorage mbareegi, it nen, “At aap ti, ayum amoori warak mendek yirik. Ndi, aa'ndok keele ti, tapi agabolo mendek yirik kogoorak o.” Yogo mbareegwa, aap endagembogut nogo nen, “Ti aap Titebe mendek Eliya nen aret yokkiragaarak kagi o,” yoragagerak.

⁹ Yorage nagagerik, aap ineegin warak inowe awuri ineebe 50 inom at Eliya yoruwak nduk, nappiige mbareegi, Eliya nogo puut kirin paga kwi'ndak wonage me ka laganggo nogogwaarik, yogo logonet, “Ala wone liirogon eeka yi wae! At aap endagembogut nen, Wambi woraayok, yegerak me, wambi nak o.”

¹⁰ Yogo mbareegwa, at Eliya nen aap ineegin warak inowe nogo yoge logonet, “An aap Ala wone liirogon eeka abet aret kenok, kat inom, kawuri 50 inom, kineebe apit kani namunggup nduk, kani mbogut paga nen kinoba wambi woraawak o.” Ari kagak, kani mbogut paga nen wambi wage logonet, awuri 50 nogo inom abok aret kani nunggugwaarak.

¹¹ Ti eeke mbareegi, ti'nuk, aap endagembogut nogo nen peebi aap ineegin warak inowe ambi awuri 50 inom at Eliya wonage me, nippiyareegerak laganggo nogogwaarik, inowe nen wone at yoge logonet, “Ala wone liirogon eeka yi wae. Aap endagembogut nen, Mbet-mbet wambi woraayok, yegerak me, mbet-mbet wambi nak o.”

¹² Yoge mbareegi, at Eliya nen, “An Ala wone liirogon eeka abet aret kenok, kat inom, kawuri ineebe 50 inom, kineebe apit kani namunggup nduk, kani mbogut paga nen kinoba wambi woraawak o.” Ari kagak, Ala kani mbogut paga nen wuppi wagagerak paga awuri ineebe 50 nogo inom abok aret kani nunggugwaarak.

¹³ Ti eeke mbareegi, ti'nuk, aap endagembogut nogo nen peebi aap ineegin warak inowe ambi awuri 50 inom at Eliya wonage me nippiyareegerak lagi nogo nogogwaarik, aap inowe nogo Eliya owagam endobanggun yindumbunuk, abuwa warak nggo-nggo logonet, at yoge, “Ala wone liirogon eeka yi wae. Kat kayeloman mini nawuri ineebe 50 ninom yi, aakumi aret me, ninoorugun o.

¹⁴ Kani mbogut paga nen wambi wagaarak paga ineegin warak mbere aago inoweewi inom aa'nduk wagaarak nogo kani nenggaarak kwe, an aakumi aret neenok, nili eerogo panu o.”

¹⁵ Yoge mbareegi, at Aliku ALA ayonggo malayikat nogo nen Eliya yoge, “At eebe paga kat kagabiti mbarugun o. Kimbirak wambi nak o.” Yoge mbareegi, Eliya nogo mi'na'nuk, aap nogo imbirak aret aap endagembogut ka wambi wogogwaarak.

¹⁶ Wambi woraanuk, at Eliya nogo nen aap endagembogut nogo yoge, “At Aliku ALA nen ari logonet, It Iterali wonogwe me yime an Ala neebe lek neenok, it Ekoron mendek inagugi Mba'an-Tebup nen yoraawak nduk, nggino yoriyak nappiigerak ya? Ti eekerak paga aap endagembogut nogo, nogo yege menggim nen mi'narigin mondok lek o. Ata, at nogo yege me time nen aret kambigin, yegerak me, yokkigi o,” yinuk, yoreegerak.

¹⁷ Ndi, at Aliku ALA nen Eliya yoge mbareegi, aap endagembogut yoreegerak nogo ndak-ndak aret kambeegerak. Kangge mbareegi, at Yotapat aput Yekoram nogo Yekura inowe endagembogut wonage kagak, tahun ambi eeppunuk, ambi age paga aap Akatiya nogo ti, apuluk lek aret me, obaane'me aap Yoram aret endagembogut agagerak.

¹⁸ Ndi, at Akatiya nogo endagembogut a'nuk wone lengganogo yorage logonet, eeke nagagerak ando abok ti, it Iterali inoweewi inendagembogut eeko nogogwaarak mbuku paga liiru mbanak wonage nogo paga, inom liiru mbanak wonage nogo lek a?