1 Yaya 4 - Ala Wone Peenok Peebi Mbanak

“Aberiniki ari kenok yogwe a, Pilit Keritut ari kenok yogwe a?” wone

¹ Noreewi niniki kunik yi wae. “Aberiniki nen yo'nirage kenok, yokkira wogo o,” yogwe iinok, inoone abet mba'nuk ugun woorak mage o. It pilit wone yoraga nogo nen yi awi ndi awi abok aret yoranet nugwi me, “At Ala nen abet aret nappiya wagaarak agan wogwe ilik, it iniki koombunuk nen agan wogwe a?” yinuk, inabut mbambunuk inoone konenggo logomunggup o.

² “Ala Aberiniki inikime logonet, agan wogwe ilik,” yinuk, yelok kogo logorak nogo yi aret. “Yetut Keritut abet aret nggween paga wambi wage nagagerik, aap aret nda'nagagerak o,” yinuk, paganggwi iinok, “Aap ti, Ala nen abet aret nappiya wagagerak Aberiniki inikime logonet, yogwe iigo o,” yinuk, inoone konenggo logorak op kwe,

³ it aap ti nen wone ti, paganggwi lek iinok perak, “Aap ti, Ala nen nappiya woroolik iniki mba'nuk aret wagaarak,” mbarumunggup o. “O age yobok togon Pilit Keritut wage logomenggerik, ndogop agan wage logogin o,” yinuk, yogwe koneneegutak nogo, “Muk wagaarak yi aret iigo o,” yinuk, mbarumunggup o.

⁴ Napuri niniki kunik yi wae. Kit Ala apuri aret o. Ndi, kit Ala apuri aret me, at omaawi ambik Aberiniki wokkiragagerak kinikime wonage nogo ti, omaawi ambik, ndi, it aap nggween paga mendek mban mugurok nugwi inikime wonage nogo ti, omaawi mbuuluk me, it Ala nen yorage kagak yoraga inetenggen kumbunuk agan wogwe ti, muk tebenogo piyareegutak o.

⁵ It aap ti, nggween paga mendek mban mugurok nugwi nogo mendek aret me, it aap nggween paga mendek mban mugurok nugu menggaarak nen inoone yogwe iinok, it aap nggween paga mendek mban mugurok nugwi nogo nen inoone yogwe nogo inaruk konenggo menggaarak.

⁶ Ndi, nit perak, Ala apuri mbogut paga mendek aret me, nit ninoone yogwe nogo, it Ala inom kunik nogo nen mban inaruk konenggo menggaarak. Ndi, Ala apuri lek kenok perak, nit ninoone yogwe nogo konenggulik aret o. Nit ninoone konengga'lek ti paga, “Aberiniki nen yorage kenok yogwe ilik, iniki koombunuk nen pilit yogwe a?” yinuk, nineenu ogo monggoorak.

Ala nen aakumi iniki kunik aganake menggerak wone

⁷ Noreewi niniki kunik yi, wae. Aakumi niniki kunik aganako logowok nduk, Ala nen aret eeppinanege menggerak me, niniki-kiniki kunik eeko logowok o. Ninoreewi niniki kunik aganakwi niinok, “It yi ti, Ala nen aret ndaganabeegerak me, inogoba Ala ineenu aret iigo o,” yinuk, yogo logogun o.

⁸ Ndi, at Ala nen yi aap ndi aap abok aret inabuwa mbake logonet, iniki kunik lombok aganake kagak kwe, nit ninoreewi niniki kunik aganakwi lek niinok perak, “It aap yi, Ala ineenggo'lek aret iigo o,” yinuk, mbako logogun.

⁹ Nit nineenik logowok nduk, Ala nen at aput ambolom nggween paga nappi wagagerak ti paga, Ala abet aret ninabuwa mbake logonet, iniki kunik ee'ninake menggerak nogo ti, yelok kogo ogoorik o.

¹⁰ Ninoreewi niniki kunik aganaburak nogo ti, ngge kokwak mbakop? Lek o. Nit nen Ala niniki kunik eerulik o. Ata, Ala ninabuwa nen iniki kunik ee'ninake nagagerik, ninomaluk lek eerogo pege logonet, ninom lambumbinanuwak nduk, at aput aret nappi wagagerak nogo kwak, nit togop aret ninoreewi niniki kunik aganako logowok o.

¹¹ Noreewi niniki kunik yi, wae! At Ala nen togop aret ninabuwa mbake logonet, iniki kunik ee'ninabeegerak me, nit togon ndak-ndak niniki-kiniki kunik eeko logowok o.

¹² Nit abok aret Ala eebe ninigen kaga'lek aret wonogwe kwe, niniki-kiniki kunik eekwi niinok perak, Ala ninom kunik logonet, aakumi ando eebi mbake, ando inikilom mbake, eekeelik abok aret inabuwa mbake menggi kwak, nit togop aret aakumi abok niniki kunik aganako logowok nduk, ee'ninake menggerak o.

¹³ At Ala nen Aberiniki wo'niragagerak ti paga at nit ninom kunik wonage, ndi, nit at ninom kunik wonogwe, eekwi nogo nineenu aret o.

¹⁴ Ndi, ninogoba nen yi aakumi ndi aakumi abok aret inagap ndaruwak nduk, at aput nappi wagagerak nogo ninigen kogo nogogurik, paganogo yokkirogo monggoorak.

¹⁵ Kit nen, “Yetut ti, Ala aput aret o,” yinuk, paganggwi kiinok, at Ala kit kinom kunik wonage, ndi, kit at kinom kunik wonogwe, eeko logomunggup o.

¹⁶ At Ala ninabuwa mbake nagagerik, iniki kunik ee'ninabeegerak nogo, nineenu ogo nogoorik, “Abet aret,” mba'nuk, niniki ti paga panggombunuk, ogoorik o. At Ala nen nit yi aakumi ndi aakumi abok ninabuwa mbake logonet, iniki kunik ee'ninake menggerak me, kit kinoreewi kiniki kunik aganakwi kiinok, Ala kit kinom kunik wonage, ndi, kit Ala kinom kunik wonogwe, eeko logomunggup o.

¹⁷ O peebi age yobok ninowak loonninaburak eyom paga, “At Yetut eeke nagagerak nogo kwak, nit o nggween paga yime logonet, ndak-ndak eeko nogogurak o,” mba'nuk, ninagabiti mbaka'lek niniki teeluk logowok nduk, Ala nen ambi eebi mbake, ndi, ambi abuwa mbake, eekeelik abok aret ninabuwa mbake menggerak nogo pogom, nit yogondak ti ndak-ndak aret eeko logowok o.

¹⁸ Aap ambi nen oreewi inabuwa mba'nuk iniki kunik aganake kenok, oreewi nen at paga inagabiti ombarugun lek o. At aap nogo nen abet aret inabuwa mbake me, inabuwa mbake ti paga inagabiti mbakwi nogo lek aret age menggerak kwe, ninagabiti mbakwi kenok ti perak, “Ninoreeluk maluk eeppogoorak me, onggo ninooke kaamun ilik,” yinuk, ninagabiti mbakwi me, ninom niniki kunik lek aret mbako logowok o.

¹⁹ Aa'nduk at Ala nen nit ninabuwa mba'nuk, iniki kunik ee'ninabeegerak me, yogondak nit togon togop aret aakumi inabuwa mba'nuk, niniki kunik aganako logowok o.

²⁰ Aap ambi at awot enegen kage logonet kwe, iniki kunik eekeelik kenok, at Ala enegen kaga'lek me nonggop togon iniki kunik eeriyak mbakop? Meek me, awot eebi ombake logonet, “An Ala niniki kunik eeke o,” ari kenok, aap ti pilit pugungga aret o.

²¹ At Ala nen ari logonet, “Kit an kiniki kunik ee'nakwi kiinok, kinoreewi kunduk inabuwa mbako logonet, kiniki kunik aganako logonip o,” yinuk, wone lengganogo yo'niragagerak nogo ti aret.