1 Yaya 3 - Ala Wone Peenok Peebi Mbanak

“Kit Ala apuri aret,” yoragagerak wone

¹ Nit at apuri abet aret wonogwe me, at Ala nen, “Kit an napuri aret o,” yo'nirage ti paga at ninogoba ninabuwa nggwok mondok alik negen mbake menggerak ti, kaanip o. It aakumi nggween paga mendek mban mugurok nogwe nogo nen aa'nduk Ala yelok kaga'lek wonogogwaarak kwak, yogondak at apuri nit kunduk yelok niiga'lek aret agaarik o.

² Noreewi o. Kit an niniki kunik me, wone ambi yokkira o. Nit yogondak aret Ala apuri ogoorik o. Ndi, peebi nonggop eeppinanege kenok wonogo logorak nogo, nit awo kin kaga'lek kwe, at wage kenok, “Etenggen yi kwak eeppinaniyak nduk, wonogoorak kagi,” yinuk, mbakwi niigak, “At etenggen kokwak eeppinanigin, nineenu aret ogoorik o.”

³ Nit eeppinaniyak nogo niniki lunik wonogwe niinok, at Keritut iniki kikak naka'lek wonage nogo pogom, nit ndak-ndak niniki kikak naka'lek aret eekkologo logowok o.

⁴ Maluk eekwi ti, Ala wone yugu aret taganggwi me, aap ambi maluk eeke kenok ti, Ala wone yugu nogo aret taganogo punuk eeke menggerak o.

⁵ At Keritut maluk abu eekeelik aret me, nit ninomaluk lek eerogo pinanikit nduk, wambi wagagerak nogo kineenu aret mbako o.

⁶ Aap ambi at Keritut imbirak kunik wonage kenok, at maluk eerit nageelik aret o. Ndi, aap ambi maluk eerit nage menggerak kenok perak, Keritut enegen kage, eebe eenu age, eeka'lek aret wonage menggerak o.

⁷ Napuri niniki kunik yi, wae. It aakumi ugun nen kit nomonggiren nogwe iyo, liippogo logonip o. Aap ambi maluk eeka'lek obeelom mban eeke kenok, at Keritut maluk eekeelik mondok obeelom mban wonage nogo pogom aret menggerak o.

⁸ At Tile o maan iyaalok nen maluk eerit wundi wage menggerak me, aap ambi maluk mban eeke menggerak kenok, at Tile aput aret menggerak. Ndi, at Ala aput wambi wagagerak nogo ti, at Tile nen yi eekak ndi eekak eeke menggerak nogo abok aret, mondok lek eerogo pikit nduk, wambi wagagerak.

⁹ Aap ambi Ala nen ndake kenok, at Ala obaabut aret wagangge me, at maluk eeke logogin lek o. At Ala nen aret ndaremenggerak me, at maluk eeke logorak ti meek o.

¹⁰ Ala apuri inom, Tile apuri inom, nano paga nineenu ariyak nogo yi aret. It aakumi obeelom eeka'lek maluk mban eekwi, inowe-inawot iniki kunik eekwi lek ineebi mbakwi, eekwi iinok ti, Ala apuri lek aret yelok iigo monggoorak.

Niniki-kiniki kunik eeko logorak wone

¹¹ O maan aa'nduk nen wone konenggo nogogutak nogo ti, “Niniki-kiniki kunik eeko logonip o,” yinuk, yo'niragagerak ti aret.

¹² At Kayin nen eereegerak nogo pogom, kit togop eeriyak mage o. Maluk eeriyak ee'ninake menggerak aput at aret me, awuluk mondok wareegerak. Nonggop nduk awuluk wareegerak mbakop? Lek o. At Kayin maluk mban eeke menggerak me, awuluk obeelom mban eeke kage nagagerik, anini nen aret awuluk wareegerak.

¹³ Togop kenok, noreewi o. It aakumi nggween paga mendek mban mugurok nogwe nogo nen ineebi kinombakwi iinok, “Ie,” yinuk, kinagabiti mbarugup o.

¹⁴ Nit ninoreewi ninom niniki kunik eeginakwi ti paga, kanggo menggam nen nineenik ee'ninake menggim muk pinani wagagerak wonogwe nineenu ogoorik o. Aap ambi nen aakumi iniki kunik aganake lek kenok, at kanggo menggam time awo aret wonage agaarik o.

¹⁵ Aap ambi at awot eebi lombok mbake kenok, at aakumi inooka aret o. Ndi, aakumi inooka nogo ti, at mondok-mondok ineenik logorak mendek unde eekkolaga'lek ti, kineenu aret o.

¹⁶ Nano eekwi paga ninoreewi niniki kunik eeginakwi nogo nineenu ariyak mbakop? Lek o. At Yetut iniki nen, “An aakumi inake nooruwak aret o,” mba'nuk, ninake kambeegerak ti kokwak, nit togon, ninoreewi inabuwa nen inake kambuurak op aret mbakwi kenok, aakumi iniki kunik eeginakwi nogo ti aret.

¹⁷ Aap ambi eenggi warak nen ore aaninggin oba agaarak enegen kage kwe, abuwa mbaka'lek, “Obaalombok o,” yinuk, mbo pege kenok, Ala nen aakumi inabuwa mbake menggerak nogo mendek inikime wonage abu lek aret mbako logowok o.

¹⁸ Napuri niniki kunik yi wae. Nit ninoone paga nen mban, “Aakumi ninom niniki kunik wonogwe o,” yinuk, yuurak mage o. Ata, niniki paga nen aret inabuwa lombok mbako logonet, obeelom eeppiinet nogo logowok o.

Ala enggaanom paga ninagabiti lek logonet yoriyak wone

^19-20 Nit eeko monggoorak nogo Ala enggaanom paga abe'nage logonet, maluk ambi eekoorak paga niniki nen ninenggali wappinanege kenok, ninagabiti mbariyak kwe, nit yi eekak ndi eekak eeko monggoorak nogo inom, ninikime ee'ninake menggerak nogo inom, abok aret at Ala eenu me, nit Ala enggaanom paga, “An aakumi inabuwa nen obeelom eeppiinet nage nagagirak nogo paga kat Ala ari menggendak nogo an ndak-ndak eeke nagagirak o,” mba'nuk, ninagabiti lek logonet, at yoriyak op aret o.

²¹ Noreewi niniki kunik yi wae. Nit ambi eekoorak paga ninikime nen ninenggali wappinanega'lek kenok, Ala enggaanom paga ninagabiti mbariyak lek o.

²² At Ala nen, “Yogop ee'nu, ndogop ee'nu,” yinuk, yo'nirage menggerak wone inom, at eeriyak inikilom mbake menggerak nogo inom, ndak-ndak eekwi me, nit yi mendek ndi mendek wo'niraawak nduk, nggino yogwi nogo, at wo'nirage logogin aret o.

²³ “Kit kiniki an naput Yetut Keritut oba panggombunuk abet mbakwi, ndi, an nen yokkiragagirak nogo ndak-ndak kinoreewi kiniki kunik aganakwi, eeko logonip o,” yinuk, wone lengganogo yo'nirage nogo ti aret.

²⁴ Wone, “Yogop ee'nu, ndogop ee'nu,” yo'nirage menggerak wone nogo, kit ambi nen ndak-ndak eekwi kiinok, Ala kit kinom kunik wonage, ndi, kit at kinom kunik wonogwe, eeko logomunggup o. Ndi, Aberiniki wo'niragagerak ninikime wonage ti paga at Ala abet aret nit ninom kunik wonage nogo nineenu ogo o.