1 Yaya 2 - Ala Wone Peenok Peebi Mbanak

Keritut ninake eeke menggerak wone

¹ Napuri o. Kit an niniki kunik me, maluk eekwi kiyo, wone yi, liiru mbanggiragi o. Togop kwe, nit ambi nen maluk eekwi niinok, at a'me nggelok eeke menggerak Yetut Keritut nogo nen nit ninake wone wonok ninogoba yori nagak eeke menggerak o.

² Ala iniki yanggo yuwak nduk, ninomaluk lek eerogo punuk, Ala ninom lambunogo pinaniyak ninake eeka ti, at Yetut aret o. Nit mban ninomaluk lek eerogo punuk, Ala ninom lambunogo pinaniyak nduk, ninake eeke ti lek o. Ata, nit yi aakumi ndi aakumi o nggween paga yime monggoorak abok aret ninomaluk lek eerogo punuk, Ala ninom lambunogo pinaniyak nduk, ninake eeke menggerak o.

³ Ala nen, “Yogop ee'nu, ndogop ee'nu,” wone yo'nirage nogo ndak-ndak eekwi paga, “Nit Ala apuri abet aret wonogwe kogo o,” yinuk, yogo monggoorak kwe,

⁴ aap ambi nen Ala wone yo'nirage nogo eeka'lek logonet, “An Ala aput aret o,” ari kenok perak, Ala ndogop menggerak wone nogo at inikime lek kagak ari me, aap ti pilit pugungga aret o.

^5-6 Ndi, aap ambi nen Ala wone yugu nogo ndak-ndak eeke kenok perak, aap ti mondok abet aret Ala iniki kunik lombok eeke menggerak. “Nit Ala ninom kunik wonogwe o,” yogo logonet, at Yetut eeke nagagerak ndak-ndak eekwi ti paga, Ala ninom abet aret kunik wonogwe nineenu ogo monggoorak.

Wone ngget mendek eeko logorak wone

⁷ Noreewi o. Kit an niniki kunik me, an nen, “Yogop eeko logonip o,” yinuk, liiru mbanggirage yi ti, wone ngget mendek liiru mbanggirage lek o. Wone yi, o maan togon kinaruk konenit wundi wogo monggotak nogo aret liiru mbanggirage kwe,

⁸ o apit lek age kagak o eya abe lombok unggwi wage logonet, wone maan yugu nogo aret Keritut nen eerit nage, ndi, kit nen niniki-kiniki kunik eekko'net nugwi, eekwi paga kin age me, wone ngget yugu negen aret kenok, liiru mbanggiragi o.

⁹ Aap ambi nen, “An o eya paga nage agarik o,” ari logonet kwe, awot eebi mbake kenok, aap ti, iniki o apit pogom yogondak wonage aret o.

¹⁰ Ndi, aap ambi nen at awot iniki kunik eeke kenok perak, at o eya paga nage me, nage logonet, aganak kolaagin lek kwe,

¹¹ aap ambi nen at awot eebi mbake kenok perak, aap ti, iniki o apit pogom logonet, o apit paga wonage menggerak o. O apit nen at enegen mbuk eerogo pereegerak me, “An o ndime aret nage agarik,” mbaka'lek aret menggerak o.

¹² Napuri niniki kunik yi wae. At Keritut eereegerak nogo paga Ala nen kinomaluk lek eerogo pinagareegerak me, Kinake liiru yi, mbanggirage,

¹³ Nogobamini yi wae. At o aa'nduk nen nok-nok yogondak kuli itok mondok menggerak kit kineenu ogogutak me, Kinake liiru yi, mbanggirage, Nawuri yi, wae. At maluk ee'ninaka nogo tebenogo pogotak me, Kinake liiru yi mbanggirage, Eeke agarik o. Kit an napuri niniki kunik yi, wae. Ninogoba Ala kineenu ogogutak me, Liiru yi, mbanggirage,

¹⁴ Kit an nogobamini yi wae. At o aa'nduk nen nok-nok, yogondak kuli itok mondok-mondok menggerak kineenu ogogutak me, Liiru yi, mbanggirage, Kit an nawuri yi wae. Kit Ala wone kinikime kologo nogogutik, kiniki kole ogogutak nogo nen at maluk ee'ninaka nogo tebenogo pereegutak me, Liiru yi, mbanggirage, Eeke agarik o.

¹⁵ It aap nggween paga mendek nen iniki koombunuk eeko menggaarak inom, yi mendek ndi mendek nggween paga mendek inom, abok aret kiniki kunik eerugup o. It aap nggween paga mendek nen iniki koombunuk eekwi nogo kinikilom mbakwi kiinok, ninogoba kiniki kunik eeko logomunggup lek aret o.

¹⁶ It aap nggween paga mendek nen iniki nengge kenok mugurok nogwe nogo inom, inigen pekkenok, uugwe mbakwi nogo inom, “An koongge mban iya o,” yinuk, wogoppatit nugwi nogo inom, ti eeko menggaarak abok aret eerit nugu logowak nduk ninogoba nen koonggeelik o. Ata, it aap nggween paga mendek nen aret iniki koombunuk, eeko menggaarak o.

¹⁷ It aap nggween paga mendek nen iniki koombunuk eekwi inom, yi mendek ndi mendek iniki nengge kenok mugurok nogwe inom, abok aret lek arigin kwe, Ala iniki mbake menggerak nogo, kit ndak-ndak eekwi kiinok perak, mondok-mondok kineenik aret logomunggup o.

Pilit Keritut nen agan woroorak wone

¹⁸ Napuri niniki kunik yi wae. O age yobok paga eeriyak nogo muk panggo yegerak o. Ndi, “Pilit Keritut woraagin,” koneneegutak nogo, yogondak ti mendek ineebe ambik muk mi'nagaarak wonogwe ti paga, “Ie! O age yobok paga eeriyak nogo muk panggo yegerak kagi,” yinuk, mbako ogoorik o.

¹⁹ It aap ti, aa'nduk ninom kuwak eeko nogogurak kwe, “It ti, nit mendek lek o,” yinuk, mbo pinaninuk mbaganeegwaarak. “It aap ti, nit mendek aret,” mba'netak en, ninom aret logonetak kwe, “It ti, nit mendek lek,” kin aruwak nduk, mbo pinaninuk mbaganeegwaarak o.

²⁰ Kit perak, aap ambi eeke logowak nduk, leenogo punuk amburu kilippogo mengga kwak, at maluk eekeelik alik leenak menggerak nogo nen, kit leenogo pinaganuk, Aberiniki wokkiragagerak me, wone abe wone mamunggirage nogo, kit abok kineenu aret kiigi o.

²¹ Ala ndogop menggerak wone nogo kit kineenggo'lek me nduk liiru yi mbanggirage lek o. Kineenu aret me, it aap nen Ala ndogop menggerak wone yogo logonet, alik ambi inom nabenogo yogwe iinok, “Yi pilit aret yogwe o,” yinuk, yelok kaabagip nduk liiru yi, mbanggirage agarik o.

²² Aap pilit pugungga ti, ta mbakop? Lek o. Aap ambi nen, “Yetut ti, Keritut lek o,” ari kenok, pilit pugungga at aret o. “Yetut ti, Keritut lek o,” yogwe ti paga Ala aput Yetut inom, ogoba Ala inom, “Nineebi o,” yinuk, mbo pugwi me, Pilit Keritut nogo it aret o.

²³ Aput Yetut mbo pugwi kenok, ogoba kunduk mbo pugwi, ndi, “Yetut ti, Ala aput Keritut aret o,” yinuk, waganggwi iinok perak, ogoba kunduk waganggwi, eeko menggaarak o.

²⁴ Kit perak, o maan aa'nduk togon wone konembunuk, waganeegutak nogo, kinikime mondok aberak logonet, porogo logonip o. Mondok nu'lek porogo wonogwe kiinok, ninogoba Ala aput imbirak kinom kunik aret logomunggup o.

²⁵ Nit ee'ninaburak Ala nen koonogo pereegerak nogo ti, “Kit mondok-mondok kineenik logobagip nduk, eekkinabigin o,” yinuk, yo'niragagerak ti aret o.

²⁶ It nen kit kinambo'me laganggo logonet, nomonggiren nogwe iyo, liiru yi mbanggiragi o.

²⁷ Napuri o. Aberiniki kinoba wuppinagi wagagerak kinikime wonage me, aap ambi nen kit mamunggiroorak lek aret o. At nen yi wone ndi wone abok aret mamunggirage logonet, pilit mamunggirageelik abet mban mamunggirage menggerak me, at mamunggirage nogo ti, ndak-ndak eekwi kiinok, Keritut kinom kunik aret logomunggup o.

²⁸ Ndi, napuri niniki kunik yi wae. Peebi at woroorak nogo eyom paga nit ninenggali lek niniki teeluk logowok nduk, yogondak nen niniki ambit a'nuk Yetut ninom kunik aret logowok o.

²⁹ At Keritut ti, abe koonak mban eeke menggerak kineenu me, it aap obeelom eeko menggaarak nogo, “Yi at Ala nen aret ndaganabeegerak kagi o,” yinuk, abet aret mbarumunggup o.