1 Tetalonika 4 - Ala Wone Peenok Peebi Mbanak

At ake leenak logorak yoragagerak wone

¹ Ndi, noreewi o. Wone irip paga iluk ambi yokkiroorak mbakoorak me yokkiraawi o. Ala inikilom kinombaruwak nduk, “Nonggop eerit nogo logorak?” mamunggirogogurak nogo, muk eerit nogwe aret kwe, ambinom mondok nggwok togon eerit nogo logobagip nduk, ninowe Yetut nen yo'nirage kenok lengganogo yokkirogo o.

² Ninowe Yetut nen, “Yoret o,” yinuk, yo'nirage mbareegi, wone, “Yogop ee'nu, ndogop ee'nu,” yinuk, lengganogo yokkirogo nogogurak ti, kineenu aret o.

³ At Ala nen kit maluk eeka'lek at ake leenak logorak mbake nogo ti, kit kumi ugun wurinabit noorak mage nduk, yereegerak o.

^4-5 It aakumi endekem mendek nogo nen Ala ineenggo'lek logonet, aganggen aganake kenok kumi ugun-ugun eeginabit nugwi nogo kwak, kit togop eeko logorak mage o. Ata, kinalitak lombok kinendage op logobagip nduk, “Ala endage paga lambumbinanuwak o,” yinuk, maluk eeka'lek inabuwa mbako logonet, kologo logonu o.

^6-7 Nit maluk eerit nugu logowok nduk, at Ala nen mii'ninabulik o. Ata, maluk eeka'lek at ake leenak logowok nduk, mii'ninabeegerak me, nit aa'nduk ninoone omaawi paga yokkirogo nogogurak nogo ndak-ndak, maluk togoti eekwi iinok, Ala nen onggo koonogo eeppinanege menggerak me, kinoreeluk ambi maluk eeppege logonet, at akwe kote wuriyak mage o.

⁸ Togop me, aap ambi nen, “Wone yi, Ala nen yegerak lek o. Aakumi nen aret yagaarak o,” yinuk, taganogo mbo pege kenok, at nen aakumi mbo piige ti lek o. Ata, at Aberiniki wo'nirage Ala nogo aret mbo pege menggerak o.

⁹ Kinoreewi kinom kiniki kunik aganabit nugwi nogo ti, Ala nen muk mamunggiragagerak me, wone ti mendek ambi liiru mbanggiroorak lek aret kagi o.

¹⁰ Kit kinoreewi abok o Makendoniya menggaarak nogo, abet aret kiniki kunik aganakwi kwe, ambinom kiniki kunik aganako logobagip nduk, lengganogo yokkirogo o.

^11-12 It aakumi abet mbaka'lek mendek nen kit liirogon eerit nugwi kiinok, kinayuk wuko logowak nduk, at ambi eerit nage paga kiniki panggombegak eerit nagup o. Ata, kit kinendage op logobagip nduk, kiname liirogon logonet, kit kinobaalombok mban eerit nugwi, ndi, kineenggi omaawi logobagip nduk, nit aa'nduk kinaruk wareegurak nogo liirogon aret eekwi, eeko logobagip nduk, wone lengganogo yokkirogo o.

Ninowe woroorak wone

¹³ Noreewi o. It aakumi kambunuk nonggop ogo menggaarak wone nogo, kineenggo'lek logorak ti, nineebi o. Aakumi ando iniki lunik ambi lek me, inore ambi kangge kenok iniki wakkologo mengga kwak, kit kiniki togop aret wakkologo logokwak, mbininogo yokkiraawi o.

¹⁴ At Yetut kangge nagagerik, mi'nagagerak nogo nit abet mbakwi kenok, it aakumi Yetut inom kunik logonet, kambeegwaarak nogo at Ala nen ineenik agago mippiyaagin abet aret mbako logowok o.

¹⁵ Ninowe yereegerak ndak-ndak, at wage kenok, it aakumi kambeegwaarak nogo wonogwe iigak, nit awo nineenik wonogwe nogo ninaa'nduk lagi nagun lek o.

¹⁶ At ninowe lombok kuum ari, yonggo mbogut paga inowe nogo oone ari, Ala amendek oone nggwok eeka trompet nogo oone eeke, eeko logonet, ninowe mbogut paga nen wambi wage kagak, it aap Keritut inom kunik logonet, kambeegwaarak nogo, at Ala nen inaa'nduk mippiyaagin o.

¹⁷ Mippiige logomenggerik, ti'nuk, nit nineenik awo wonogwe nogo, it ninom ndugwi enggela'me oolo taati ninowe ninom lambunuwok nduk, wo'niren nagin o. Wo'niren nage kenok, ninowe ninom mondok-mondok aret logogun o.

¹⁸ Wone ti, ninowe nen aret yo'niragagerak me, ti paga kiniki eyak wat-wat eeko logonip o.