1 Tetalonika 1 - Ala Wone Peenok Peebi Mbanak

1 TETALONIKA

ALA APURI O TETALONIKA MENDEK INAKE LIIRU AA'NDUK MBANEEGWAARAK WONE

¹ Noreewi o. Kit Ala apuri ninogoba Ala ninowe Yetut Keritut kinom kunik o Tetalonika kuwak eeko monggotak nogo, an Pawulut kunduk, Tiliwanut kunduk, Timotiyut kunduk, nen wone ambi yokkiraawi o. Ala iniki kunik nen wokkirage, kiniki ugun tayenak ale'nggen logobagip nduk, eeppinagage, eeke logogin o.

It o Tetalonika mendek abet mbareegwaarak wone

² Nit tamban eeko monggoorak me, eeko logonet, kit abok kiinok kulinik-kalinik Ala, “Wa,” yogo monggoorak.

³ Kit abet mba'nuk eerit nugwi, aakumi kiniki kunik nen nggwiirit-nggwaarit obeelom eeppiinet nugwi, ndi, ninowe Yetut Keritut paga kiniki lunik wonogwe me, aaninggin kinoba age kagak kinogogumbuk logonet waganggwi, eekwi nogo ti, aberak logonet, ninogoba Ala yogo monggoorak o.

⁴ Noreewi o. Ala iniki kunik eekkinake logonet, miikkinabeegerak ti, nineenu aret o.

⁵ Nit nen wone obeelom wone yokkira wogogurak nogo ti, we nit ninoone paga mban lek o. Ata, Aberiniki omaawi eeppinanege kagak, yokkirogogurak paga kinikime nen, “Ie! Wone yi, mondok abet aret yo'nirogwe iigo o,” yinuk, waganeegutak nogo o. Kit mamunggolaabagip nduk, nit kinenggela'me logonet, nonggop eerit nogo nogogurak nogo ti, kineenu aret o.

⁶ Maluk eeppinagagwi iigak, Aberiniki nen kiniki ale'nggen eekkinake kagak, wone waganggo nogogutik, nit ninowe ninom eeko monggoorak nogo ndak-ndak aret eeko nogogutak.

⁷ Togop eeko nogogutak me, it aakumi abet mbakwi o Makendoniya inom, o Akaya inom, abok aret kit paga in wakkagak eeko agaarik o.

⁸ Kit eekwi paga ninowe wone nogo o Makendoniya inom, o Akaya inom, time mban wiganinuk noolik o. Ata, yi awi ndi awi abok aret kit Ala abet mbareegutak nogo wiganinuk nagagerak me, nit wone ambi yorogo logorak lek aret kogo o.

⁹ Nit kiya wogo mbareegu, wo'ninabeegutak nogo inom, kugiwak eeko nogogutak nogo mbo punuk, Ala abet aret eenik menggerak nogo mugurok nogo logobagip nduk miikkologogutak nogo inom,

¹⁰ ndi, Ala nen at aput Yetut kambunuk nogo menggam nen eenik agago mippege mbareegi, peebi anini nen nit maluk eeppinanege kero, ninagap ndareegerak Yetut mbogut paga nen wambi woroorak nduk, kit tokkogo monggotak nogo inom, abok aret nit yo'nirogo menggaarak.