1 Tamuwen 7 - Ala Wone Peenok Peebi Mbanak

¹ Yonggo nappiigo mbareegwa, it aap Kiriyat-Yeyarim mendek nogo wogo nogogwaarik, at Aliku ALA aloobut mbanak nogo wonok aap endage Abinarap ame puurom time pi nogo nogogwaarik, at apuluk Eleyatat nogo, Aliku ALA aloobut mbanak arum logowak nduk, leenogo mippereegwaarak.

Aakumi Pilitin mendek o Mitapa time inoorogo piyareegwaarak wone

² Ndi, Ala aloobut mbanak nogo o Kiriyat-Yeyarim time mban wonage kagak, tahun 20 aret eereegerak. Time wonage kagak, it aakumi Iterali mendek abok aret iniki wakkologo logonet, “Aliku ALA mugurok nawok lak, ao,” yinuk,

³ mbakwi iigak, at Tamuwen nen aakumi Iterali mendek abok aret yorage logonet, “Kit kiniyokan at Aliku ALA abu'me abet aret ari woroorak mbakwi kiinok, kugigwe Atitoret inom, Ala obaane'me it aakumi alik mendek inagugi inayuk wukwi nogo mendek inom, abok aret mbo punuk, melak togon kiniki Aliku ALA wogo'nuk, at mban mugurok nogwe kiinok, aakumi Pilitin mendek ineenggime nen kinagap ndarigin o.”

⁴ Yorage mbareegi, it Iterali mendek nogo inagugi Mba'an mendek inom, Atitoret mendek inom, mbo pogo nogogwaarik, at Aliku ALA mban ayuk wuko logonet, mugurok nogo nogogwaarak.

⁵ Ti eeko mbareegwa, at Tamuwen nen, “Kit Iterali mendek abok aret o Mitapa taati kuwak ari nogwe kiinok, an nen kinake Aliku ALA yorikit o.”

⁶ Yorage mbareegi, it apit aret o Mitapa taati kuwak ari nogo nogogwaarik, niyo toologo Aliku ALA enggaanom paga kilirogo punuk, ne ti eyom paga inambe mage negen logonet, “Nit at Aliku ALA maluk nggwok eeppogoorak o,” yinuk, paganggo nogogwaarak. O Mitapa inomaluk paganggwi iinok, at Tamuwen nogo nen aret inowak loonogo, “Yogop ee'nip o,” yinuk, yorage nagagerak.

⁷ Ndi, it aakumi Iterali mendek o Mitapa kuwak ari nogogwaarak nogo it Pilitin mendek nen inaruk konenggo nogogwaarik, it aap inendagembogut Pilitin mendek nen, “Aakumi Iterali ninom wim namburi nawok o,” yinuk, “Wogwe o,” yogwe nogo aakumi Iterali mendek inaruk konembunuk, it Pilitin ineebe paga inagabiti nen

⁸ Tamuwen yogo logonet, “At Aliku ninogoba Ala nen it Pilitin ineenggime nen ninagap ndaruwak nduk, kat puk aga'lek koone nggwok paga ninake tamban mban eeke logot o.”

^9-10 Yogo mbareegwa, at Tamuwen nogo ndomba aagaluk awo yilak nengge ambi warogo enaani aret Aliku ALA ake kani kungge logonet, oone nggwok paga Iterali inake Aliku ALA yoge kagak, it Pilitin mendek nen Iterali inom perenggolaawok nduk, panggo yi wogwe iigak, Tamuwen nen Aliku ALA yoge nogo konembunuk, it Pilitin mendek inagabiti mbaruwak nduk, mbogut paga ngguurubu eeke logonet, mbogut telangge mbareegi, iniki ma'nogo nogogwaarik, Iterali inigen iigak, mbaganit nogo mbareegwa,

¹¹ aap Iterali ineegin warak nogo o Mitapa nen mbe agan wundi nogo nogogwaarik, Pilitin mendek nogo muguren-magaren inoorit o Mbet-Kat kagak kuli tayorogon time aret piya nogogwaarak.

¹² Inoorogo piinet nogo nogogwaarik, at Tamuwen nen yugum ambi waganogo o Mitapa o Yetana oolo taa'nogo mippunuk, “Aliku ALA nen yeenggwa niranet o yi kuli aret pinani wagaarak me,” yinuk, yugum mippereegim nogome endage, Eben-Kayetet aret o, yinuk, toonogo pereegerak.

¹³ It aap Iterali mendek nen aakumi Pilitin mendek togop aret tebenogo piyareegwaarak me, inooriyak nduk, Iterali iname ambinom unggwi waga'lek aret wonogogwaarak. Ndi, at Tamuwen eenik wonage kagak, at Aliku ALA nen it aakumi Pilitin mendek tebembiirogo wonagagerak me,

¹⁴ yi o ndi o, o Ekoron kuli nen Nggat kuli it aap Pilitin mendek nen aakumi Iterali ineenggime nen ndineegwaarak nogo abok aret iyokan it aakumi Iterali mendek nen kologwe, ndi, nggween enaagan-ambokan nogo aakumi Pilitin mendek ineenggi omaawi pippunuk wonogwe me, Iterali nen ndinggologwe, eeko nogogwaarik, it aakumi Iterali mendek inom, aakumi Amori mendek inom, inom ambit lambunik op aret wonogogwaarak.

Aap Tamuwen nogo aakumi Iterali inowak loongge nagagerak wone

¹⁵ Ndi, aap Tamuwen kangga'lek eenik wonage kagak, aakumi Iterali mendek inarum logonet, inowak loongge nagagerak.

¹⁶ At nogo tahun ambi eekak paga o Mbeten nen o Nggilagan nage, o Nggilagan nen o Mitapa nage, eeke logonet, aakumi Iterali inenggela'me wone ambi agaatak kenok, inowak loongge nagaatik,

¹⁷ o Arama ti, at ame aret me, iyokan wage nagaatik, time logonet, aakumi Iterali inowak loongge nagagerak. Ndi, time logonet, at Aliku ALA ake warogo kani kunggo logowam ogobakkigirogo pereegerak.